ბრწყინვალე 11 – პაველ ნედვედი

იმ ლეგენდარული ფეხბურთელების სიაში, რომლებიც “იუვენტუსში” 90-იანი წლებიდან გამოდიოდნენ და დღეს გუნდში აღარ ირიცხებიან შეუძლებელია არ შევიდეს ისეთი კაშკაშა ვარსკვლვავი, თავისი დროის შემადგნელობის უდავო ლიდერი და “იუვენტუსის” უამრავი ტრიუმფი სიმბოლო, პაველ ნედვედი. ჩეხი ფეხბურთელი ერთ-ერთი გამორჩეული იყო თავისი ასპარეზობისას გუნდში და ნებისმიერ “ტიფოზიზე” წარუშლელი შთაბეჭდილება დატოვა. სანამ უშუალოდ ფეხბურთელის ბიოგრაფიის გახსენებას შევუდგებით, კიდევ ერთხელ გადავავლოთ “ბრწყინვალე 11”-ის შემადგენლობას თვალი.როგორც ხედავთ, გუნდი 4-4-2 ფორმაციით თამაშობს. დაცვის ხაზი შემდეგნაირად გამოიყურება: მარცხნივ ალესანდრო ბირინდელი, დაცვის ცენტრში პაოლო მონტერო და ლილიან ტურამი თამაშობენ, ხოლო მარჯვენა ფლანგზე ჯანლუკა პესოტოა განთავსებული. ჯერ-ჯერობით სრულად არ ჩამოყალიბებულა გუნდის ნახევარდაცვა და თავდასხმა. როგორც სქემის მიხედვით ხედავთ, ნახევარდაცვის ცენტრში განლაგებული არიან ედგარ დავიდსი და ალესიო ტაკინარდი. ხოლო ნახევარდაცვის მარცხენა ფლანგზე პაველ ნედვედი, რომლის შესახებაც ჩვენ დღეს ვისაუბრებთ…
პაველ ნედვედი დაიბადა ჩეხეთში, 1972 წლის 30 აგვისტოს. ის ახლადჩამოყალიბებული ჩეხეთის რესპუბლიკის საფეხბურთო ნაკრების ერთპიროვნული ლიდერი იყო და მოახერხა უამრავი ტიტულის მოგება რომაულ “ლაციოსთან” და შემდეგში უკვე ტურინის “იუვენტუსთან” ერთად. ის არის ასევე უეფას “თასების თასის” უკანასკნელი გათამაშების გამარჯვებული.  თანამედროვე ფეხბურთის ერთ-ერთი საუკეთესო ნახევარმცველი 2003 წელს დააჯილდოვეს ყველაზე პრესტიჟული პერსონალური ტიტულით – ოქროს ბურთით. ნედვედი აღმოჩნდა მეორე ჩეხი ფეხბურთელი ვინც ეს ტიტული მოიპოვა ჩეხოსლოვაკიის დანგრევის შემდეგ. მას ორჯერ გადაეცა “ოქროს ბუცის” ტიტულიც. ჩეხი ფეხბურთელი იყო ერთ-ერთი ძირითადი ფიგურა “ევრო 96”-ის გათამაშების დროს, როცა ჩეხეთის ეროვნული ნაკრები გათამაშების ფინალში გავიდა. შემდეგში ნედვედი ნაკრების კაპიტნადაც იყო არჩეული და ამ საპატიო სამკლავურით უამრავჯერ გაუძღვა ეროვნულ ნაკრებს მინდორზე. ნედვედი ცნობილი ხდებოდა თავისი უშრეტი ენერგიითა და თავდაუზოგავი დრიბლინგით, ასევე გოლის გატანის ბრწყინვალე უნარი ეხმარებოდა ფეხბურთელს თანდათან დაეპყრო მსოფლიო ფეხბურთი.  2008-2009 საფეხბურთო სეზონის შემდეგ ნედვემდა წერტილი დაუსვა თავის 19 წლიან კარიერას, რომლის განმავლობაშიც მან 664 საკლუბო მატჩი ჩაატრა და 146 გოლი გაიტანა, ჩეხეთის ნაკრებში კი 91-ჯერ იყო გამოძახებული და მის ანგარიშზე 18 გოლია.
საკლუბო კარიერა:
ჩეხეთის ქალაქ სკალნასთან მახლობლად დაბადებულმა ფეხბურთელმა თავისი კარიერა მშობლიურ ჩეხოსლოვაკიაში დაიწყო. მისი პირველი კლუბი ადგილობრივი “ტატრან სკალნა” იყო, მომავალი “ბიანკონერი” მაშინ სულ რაღაც 5 წლის იყო ხოლო ეს შორეულ 1977 წელს ხდებოდა… ნედვედმა მრავალი ჩეხური კლუბი მოიარა მანამ სანამ იტალიას მიაშურებდა. მათ შორის ყველაზე დასამახსოვრებელი იყო ასპარეზობა პრაღის “სპარტაში”, რადგან სწორედ აქ მოიპოვა პაველმა პირველი ტიტული და გახდა ჩეხოსლოვაკიის ჩემპიონი. პრაღაშივე მოიგო ნედვედმა ჩეხოსლოვაკიის თასი და 1996 წლის ევროპის ჩემპიონატზე წარმატებული ასპარეზობის შემდეგ ჩეხი ნახევარმცველი მიუხედავად იმისა, რომ მოლაპარაკებებს ჰოლანდიურ “პეესვესთან” აწარმოებდა, იტალიის დედაქალის კლუბ “ლაციოში” ჩაირიცხა. 1996 წლის 7 სექტემბერს პაველ ნედვედმა პირველი ოფიციალური შეხვედრა გამართა “ლაციალეს” რიგებში.  ნახევარმცველი გუნდის ერთ-ერთ საკვანძო ფიგურად იქცა და გუნდს დაეხმარა იტალიის თასის მოგებაში, ასევე დიდი წვლილი შეიტანა “თასების თასის” უკანასკნელი გათამაშების მოგებაში და ამ ტურნირის ბოლო გოლიც სწორედ ჩეხის ანგარიშზეა. ამ ტიტულების გარდა,  პაველ ნედვედმა რომალ კლუბთან ერთად 2 იტალიის სუპერთასი და ერთი სკუდეტო მოიგო. პაველი გუნდს უეფას თასის ფინალში გასვლაშიც დაეხმარა, სულ გუნდთან ერთად მან 206 მატჩი ჩაატარა და 54 გოლის გატანა შეძლო. მას შემდეგ რაც დედაქალაქურ კლუბში ნედვედმა 5 სეზონი დაჰყო, ის ტურინის “იუვენტუსის” რადარზე აღმოჩნდა. ტურინული გრანდი ლეგენდარული ზინედინ ზიდანის შემცვლელს ეძებდა, მისი პოვნა კი იოლი ნამდვილად არ იყო. “ბიანკონერებმა” ასეთად სწორედ პაველ ნედვედი მიიჩნიეს და 2001 წლის ზაფხულში ჩეხი ფეხბურთელი 41 მილიონ ევროდ მოვიდა გუნდის შემადგენლობაში. 2001-2002 და მომდევნო სეზონში “იუვემ” სკუდეტოს მოგება შეძლო და ნედვედიც თანდათან ძირითადი შემადგენლობის ფეხბურთელად ყალიბდებოდა.  ის იყო სულისჩამდგმელი   “იუვენტუსისა”, რომელმაც 2003 წლის ჩემპიონთა ლიგის ფინალში გააღწია, თუმცა ფინალი ნედვედისთვის მიუწვდომელი აღმოჩნდა… ის ყვითელი ბარათების დაგროვების გამო დისკვალფიცირებულ იქნა და იძულებული გახდა ფინალი გამოეტოვებინა. მას ნახევარფინალში მადრიდის რეალის ფეხბურთელის სტივ მაკმანამანის წინააღმდეგ უხეშობა არ ეპატია.  იტალიაში მომხდარი კალჩოპოლის სკანდალის შემდეგ ნედვედის ბედი გაურკვეველი რჩებოდა. მის ირგვლივ უამრავი ჭორი დადიოდა, რომ ფეხბურთელი კლუბს დატოვებდა, თუმცა მან საბოლოოდ დაუსვა წერტილი ამ ჭორებს, როცა განაცხადა, რომ რჩებოდა “იუვენტუსში”, რათა კლუბს დახმარებოდა ძველი დიდების დაბრუნებაში. ნედვედმა ერთწლიანი კონტრაქტი გააფორმა. რითაც ფეხბურთის მესვეურებს გაუჩინა ეჭვი, რომ პაველი საფეხბურთო კარიერას ასრულებდა, თუმცა სეზონის მართლაც შთამბეჭდავი აღმოჩნდა და კლუბის სამმა ლეგენდამ, დავიდ ტრეზეგემ ალესანდრო დელ პიერომ და პაველ ნედვედმა საერთო ჯამში 47 გოლი გაიტანეს 82 ტურინული გოლიდან. რითაც გუნდმა სერია ბ მოიგო და უმაღლეს დივიზიონში დაბრუნდა. შემდეგ სეზონშიც ნედვედი “იუვენტუსის” ძირითადი შემადგენლობის ფეხბურთელი იყო, თუმცა პრესა არც თუ ისე კარგი ჰქონდა, ჟურნალისტების წნეხი მას შემდეგ გაძლიერდა, როცა პაველმა მილანის “ინტერის” ლეგენდარულ ნახევარმცველს ლუიშ ფიგუს უხეში ვარდნით ფეხი მოტეხა. ჩეხი ფეხბურთელი უკავშირებდნენ იაპონურ კლუბს და ყველას ეგონა, რომ პაველი კარიერას “ამომავალი მზის” ქვეყანაში გააგრძელებდა, მაგრამ 2008-2009 სეზონის მიწურულს მან “იუვენტუსთან” კიდევ ერთ წლიან კონტრაქტს მოაწერა ხელი. ბოლო ტურინული სეზონი ნედვედმა ღირსეულად ჩაატარა, მან მიიღო ტრავმა ჩემპიონთა ლიგის მერვედ ფინალში ლონდონის “ჩელსის” წინააღმდეგ მატჩში და ეს აღმოჩნდა მისი ბოლო მატჩი ევროთასებზე. პაველმა უკანასკნელი შეხვედრა თავისი ყოფილი გუნდის ლაციოს წინააღმდეგ ჩაატარა და ის მართლაც დამსახურებულად გააცილეს დიდი ფეხბურთიდან. იმ მატჩში ნედვედი კაპიტნის სამკლაურით გამოვიდა და თავი საგოლე პასით გამოიჩინა. ნედვედი მატჩის დამთავრებამდე გავიდა მოედნიდან და ორივე კლუბის გულშემატკივარმა ის ფეხზე ადგომით და მხურვალე ოვაციით გააცილა. მატჩის დასრულების შემდეგ ფეხბურთელებმა ნედვედს ცოცხალი “ღირსების კორიდორი” მოუწყვეს, რომელშიც ჭეშმარიტმა “ბიანკონერომ” დამსახურებული სიამაყით გაიარა. “იუვენტუსის” კიდევ ერთმა ლეგენდამ, ალესანდრო დელ პიერომ კი მას სამახსოვრო მაისური გადასცა… ლეგენდარული პაველი დღესდღეობით ტურინის “იუვენტუსის” სამეთაურო ბანაკში გადავიდა და იქ აგრძელებს საყვარელი კლუბისადმი სამსახურს.

მიღწევები:
(სპარტა პრაღა)
ჩეხოსლოვაკიის ჩემპიონი
ჩეხოსლოვაკიის თასი
ჩეხოსლოვაკიის გამბრუნუს ლიგა
(ლაციო)
სერია ა
იტალიის თასი
იტალიის სუპერ თასი
თასების თასი
უეფას თასის ფინალისტი
უეფას სუპერთასი
(იუვენტუსი)
სერია ა 4-ჯერ
იტალიის თასი 2-ჯერ
სერია ბ 1-ჯერ
ჩემპიონთა ლიგის ფინალისტი
პირადი მიღწევები:
ჩეხეთის რესპუბლიკის ოქროს ბურთი 6-ჯერ
ჩეხეთის წლის მოთამაშე 1-ჯერ
სერია ა-ს საკეთესო მოთამაშე 1-ჯერ
სერია ა-ს საუკეთესო უცხოელი მოთამაშე 1-ჯერ
ოქროს ბურთი 1-ჯერ
ოქროს ბუცი 1-ჯერ
უეფას წლის გუნდის წევრი
ფიფა 100