დაუვიწყარი მატჩები: იუვენტუსი 3:1 რეალი

როდესაც უკან იხედები ყოველთვის ცდილობ გაიხსენო ყველაზე ნათელი, ყველაზე შთამბეჭდავი, ყველაზე ემოციური ეპიზოდები ცხოვრებიდან, რომლებიც არასოდეს მიეცემა დავიწყებას. მოვლენები რომლებიც სამუდამოდ რჩება ადამიანების გონებაში და გულებში. 2003 წლის 14 მაისი არის დღე რომელიც არასოდეს დაავიწყდება ტურინს და მის ლეგენდარულ სტადიონს ”დელე ალპის”.

უეფას ჩემპიონთა ლიგა, ეს ის ტურნირია რომელმაც ბევრი საოცარი მატჩი აჩუქა საფეხბურთო სამყაროს. ”იუვენტუსის” გულშემატკივრებისთვის ერთ-ერთი ყველაზე გამორჩეული მატჩი 2003 წლის 14 მაის გაიმართა. როდესაც ტურინს მსოფლიოს ერთ-ერთი ყველაზე გამორჩეული გუნდი მადრიდის ”რეალი” ეწვია. პირველი მატჩი რომელიც მადრიდში გაიმართა მასპინძელთა გამარჯვებით 2:1 დასრულდა. ასე რომ ”იუვენტუსს” ერთი ბურთი გასაქვითი ქონდა. არადა გადახედავ მადრიდელების შემადგენლობას და ტანში ჟრუანტელი გცრის: რონალდო, ზიდანი, რაული, ფიგუ, გუტი, კარლოსი.. ”ამ გუნდის დამარცხება შეუძლებელია”! – ამბობენ ერთნი. ”იუვენტუსს შანსები მიზერული აქვს”! – ამბობენ მეორენი. მაგრამ გულშემატკივრის ის ნაწილი რომელთა გულები იმ დროს შავ-თეთრად ფეთქავენ, ამბობდნენ.. ”ჯერ არაფერია გარკვეული.. ჩვენ ხომ დელ პიერო გვყავს, თან ნედვედი რა მაგარ ფორმაშია, იქნებ ტრეზეგემაც თავის სტილში, გვაჩუქოს ნახევრად მომენტიდან ერთი გოლი, ასევე დავიდსიც ხომ ბოლომდე იბრძოლებს, არ შევრცხვებით.. როგორმე გადავიტანთ მათ იერიშებს , ჩვენ ხომ კარში ჯიჯი გვყავს”.

მაშ ასე, გადაჭედილ ”დელე ალპიზე” ერთმანეთის წინააღმდეგ წარსდგნენ გუნდები. ალბათ არავის ახსოვს ამდენი ვარსკვლავი ერთად, ერთ მატჩში. დაიწყო მატჩი და იფეთქა ემოციებმა. პირველად ტრიბუნები 12 წუთზე აფეთქდა, როდესაც ნედვედის და დელ პიეროს ორ სვლიან კომბინაციას ტრეზეგემ ბრწყინვალე გაგრძელება უპოვა და ანგარიში გახსნა. მაგრამ ეს ჯერ კიდევ ყველაფერი არ იყო, მადრიდის რეალს კიდევ ერთი ქარბორბალა 43 წუთზე დაატყდა თავს, როდესაც ალესანდრო დელ პიერომ ბურთი მიიღო საჯარიმოს სიახლოვეს, ბევრი დღესაც იხსენებს იმ ეპიზოდს: ”ბიჭოს გახსოვს რა უქნა დელ პიერომ იეროს და სალგადოს?! როგორ დააჩოქა ორივე”?!

კიდევ ბევრი საინტერესო რამ მოხდა მეორე ტაიმში. იმ დღეს ”იუვენტუსის” ყველა ფეხბურთელი თავის საუკეთესო თამაშს თამაშობდა. ჯიჯიმ ფიგუს აუღო თერთმეტმეტრიანი. ყველა აჩვენებდა საუცხოო თამაშს მაგრამ იუვენტუსის შემადგენლობაში იყო ერთი ფეხბურთელი რომელსაც თავისი სიტყვა უნდა ეთქვა ამ ”სპეკტაკლში”, უნდა გაებრწყინა.. ის ხომ მთელი სეზონი მოწოდების სიმაღლეზე იდგა. კულუარებში ლაპარაკობენ რომ სწორედ ნედვედი მოიგებს ”ოქროს ბურთს”. ჩეხი ხომ საუკეთესო იყო იმ წელს მთელს ევროპაში. მისი ძლიერი დარტყმები შიშის ზარს სცემდა ყველა მეკარეს. სწორედ მან ააფეთქა 73 წუთზე სტადიონის ტრიბუნები და ანგარიში 3-0 გახადა. საბოლოო ანგარიში კი იუვენტუსის გულშემატკივრებისთვის ნაცნობმა და საყვარელმა ფეხბურთელმა, ყოფილმა ტურინელმა ზინედინ ზიდანმა დასვა.

ეს იყო ერთ-ერთი უდიდესი დღე ტურინის ”იუვენტუსის” არსებობის მანძილზე. მე მხვდა ბედნიერება საკუთარი თვალით მენახა ეს თამაში და მას არასოდეს დავივიწყებ. გავა დრო და გავიხსენებთ ნედვედს, დავიდსს, დელ პიეროს, ტრეზეგეს და სხვებს, და გავიხსენებთ ამ დიდებულ თამაშსაც. რომელმაც აალაპარაკა მთელი მსოფლიო.