ჯოვინკო: “ჩემპიონი “მილანი” გახდება”

„პარმა“ ახლოსაა გასავარდნთა ზონასთან, ხოლო „მილანი“ და „იუვე“ ჯერ კიდევ ჩემპიონობისთვის იბრძვიან. თუმცა სებასტიან ჯოვინკოს ფავორიტი მაინც „მილანია“. შეგახსენებთ, რომ „ატომურმა ჭიანჭველამ“ მიმდინარე სეზონში 25 მატჩი ჩაატარა „ჯალობლუს“ შემადგენლობაში და 10 გოლის გატანა მოახერხა. ხოლო შაბათს კი პარმელები საკუთარ მოედანზე ჩემპიონატის ლიდერს – „მილანს“ უმასპინძლებენ.

„ჩვენ შევინარჩუნებთ ადგილს სერია ა-ში და მე ამისათვის ყველაფერს გავიღებ“ – განუცხადა Corriere dello Sport-ს „პარმას“ პლეიმეიკერმა.

„წინ ურთულესი მატჩი გველის „მილანთან“, ჩვენ უნდა ვაჩვენოთ უმაღლესი კლასი. „იუვენტუსი“ დღესდღეობით უფრო მეტ ქულას იმსახურებს, ვიდრე მათ აქვთ სატურნირო ცხრილში, თუმცა ჩემპიონატს მაინც „მილანი“ მოიგებს. შავ-წითლები უკეთეს ფეხბურთს თამაშობენ და ამ ყველაფერს ზლატან იბრაგიმოვიჩი უწყობს ხელს.“ – აცხადებს სებასტიან ჯოვინკო.

წყარო: Football Italia