ATTACCO ALLA JUVE – იერიში “იუვენტუსზე”…

11 years ago აკაკი მეტრეველი

დღეს დილით იტალიურ პრესაში “იუვენტუსის” გულშემატკივრებისთვის შოკისმომგვრელი ინფორმაცია გავრცელდა. მოგეხსენებათ, მიმდინარე თვის პირველ ნახევარში ანტონიო კონტე დაკითხულ იქნა იტალიის პროკურატურის მიერ. დაკითხვა ეხებოდა ყველასათვის ნაცნობ თემას, ჩაწყობილ მატჩებს, რომელშიც კონტეს ყოფილმა შეგირდმა სტეფანო კარობიომ “იუვენტუსის” ამჟამინდელი მწვრთნელი დაადანაშაულა. კერძოდ, საუბარია უშუალოდ ორ კონკრეტულ მატჩზე, რომლებიც ჩატარდა “ნოვარასა” და “ალბინოლეფეს” წინააღმდეგ. მიუხედავად ანტონიო კონტეს მიერ მიცემული ჩვენებისა და პრაქტიკულად “სიენას” იმდროინდელი შემადგენლობის მიერ ხელმოწერილი დოკუმენტისა, რომლის მიხედვითაც ჩაწყობილ მატჩში მონაწილეობაზე საუბარიც კი ზედმეტია და ეს არის სრული აბსურდი, იტალიის პროკურატურა, როგორც ჩანს, ამ ეტაპზე რატომღაც მაინც კარობიოს მხარეს იჭერს. თუ კონტე დამნაშავედ სცნეს, მას ელის დაახლოებით 6-თვიანი დისკვალიფიკაცია. თუმცა, ეს ყველაფერი არ არის…

საფრთხე ემუქრება “იუვენტუსში” მოთამაშე ორ ფეხბურთელსაც, ლეონარდო ბონუჩისა და სიმონე პეპეს. სასამართლო პროცესის გავლა მათაც მოუწევთ, რადგან მათ შემთხვევაში საუბარია 2010 წელს ჩატარებულ “ბარი” – “უდინეზეს” საეჭვო შეხვედრაზე, რომელშიც ორივე მოთამაშე იღებდა მონაწილეობას. თუ ბონუჩი და პეპე დამნაშავედ სცნეს, ისინი მიიღებენ გრძელვადიან დისკვალიფიკაციას. ამ ეტაპზე ეს არის ბოლო ინფორმაცია, რაც გავრცელებულია სხვადასხვა წყაროებში.

რაიმე სიახლის შემთხვევაში, საიტის ადმინისტრაცია უმოკლეს დროში მოგაწვდით ინფორმაციას.

წყარო: Football-Italia; TuttoJuve; Tuttosport