“იუვე” ლორენტეს აკვირდება, ჯეკო : “იმედი მაქვს, იტალიაში ვითამაშებ”

რობინ ვან პერსისთან და ლუის სუარესთან მოლაპარაკებების ჩაშლის შემდეგ ტურინის “იუვენტუსის” გენერალური დირექტორი, ჯუზეპე მაროტა ფორვარდისთვის ბრძოლას განაგრძობს.Tuttosport –ის მიერ გავრცელებული ინფორმაციით, ბიანკონერების ინტერესთა სფეროში ბილბაოს “ატლეტიკის” ესპანელი წინახაზელი, ფერნანდო ლორენტი მოექცა, რომელსაც ბასკებთან კონტრაქტი 2013 წელს უმთავრდება და ხელშეკრულების გახანგრძლივებას არცერთი მხარე არ ჩქარობს.გუნდის ხელმძღვანელობასთან მოლაპარაკებებისას ლორენტე “ატლეტიკს” პირად ხელფასზე ვერ შეუთანხმდა და გასაკვირი არ იქნება, თუ მისი ტრანსფერი ზაფხულის სატრანსფერო პერიოდშივე განხორციელდება.გარდა ფერნანდოსა, ტურინელები ბოსნიელ ჯეკოსა და ჯამპაოლო პაცინის აკვირდებიან.

რაც შეეხება ზემოთხსენებულ ჯეკოს, ედინი საკუთარი მომავლის გარკვევას ჯერჯერობით ამაოდ ცდილობს.ჟურნალისტებთან საუბარში ბოსნიელმა აშკარად დააფიქსირა მანჩესტერ “სიტიდან” წასვლის სურვილი, თუმცა მანამ, სანამ ქალაქელები კონკრეტულ ნაბიჯებს არ გადადგამენ, მისი ტრანსფერი ფაქტიურად შეუძლებელია : “ამ მომენტისთვის სიტის ფეხბურთელი ვარ და ვნახოთ, რა მოხდება, შეიძლება გუნდში ვან პერსი ან სხვა ფორვარდი მოვიდეს.იტალია ? – მაქვს ინფორმაცია იმის შესახებ, რომ “მილანმა” ზლატან იბრაჰიმოვიჩისა და ტიაგო სილვას სახით ორი ლიდერი გაყიდა,სერია A – ს თვალს ვადევნებ და იმედი მაქვს, ოდესმე იქ თამაშის საშუალება მომეცემა.”

არსებული ინფორმაციით, ედინ ჯეკოს ყიდვას სწორედ ტურინის “იუვენტუსი” და “მილანი” ცდილობენ, თუმცა რომელი გრანდის წინადადება დააკმაყოფილებს “სიტის” მფლობელ შეიხ მანსურ ბინ ზაიედ ალ ზაიანს, ამ დროისთვის უცნობია.

წყარო : Football Italia; Football Italia