მასიმილიანო ალეგრის წინასამატჩო პრესკონფერენცია

 მასიმილიანო ალეგრის გუნდი ხვალ ჩემპიონატის ლიდერებს დაუპირისპირდება და გამარჯვების შემთხვევაში, მოქმედ სეზონში პირველად პირველ პოზიციაზეც განთავსდება. ტურის და, შესაძლოა, სეზონის ცენტრალური მატჩის წინ ზეწოლა ორივე გუნდზე დიდია. ხვალინდელ შეხვედრაზე მასიმილიანო ალეგრი საუბრობს…

“”ნაპოლი” შესანიშნავ სეზონს ატარებს, უკვე 56 ქულა აქვთ აქტივში და შესაძლებლობათა მაქსიმუმს აჩვენებენ. ჩვენ, ჩვენიმხრივ, დაახლოებით ისეთივე სეზონს ვატარებთ, როგორც შარშან, გვაქვს რა სამი ქულით ნაკლები გასულ წელთან შედარებით და ჩამოვრჩებით ნეაპოლელებს სწორედ იმ სამი ქულით, რომელიც სეზონის სტარტზე მათთან დაპირისპირებისას დავთმეთ. “

” რა თქმა უნდა, ტაქტიკური და ტექნიკური კუთხით, დიდებული მატჩი იქნება. ეს არ ნიშნავს, რომ “სკუდეტოს” ბედი გაირკვევა, რადგან 13 შეხვედრა დაგვრჩება სათამაშო და, შესაბამისად, 39 ქულა ასაღები. ხვალინდელ შეხვედრას მშვიდი გონებით უნდა შევხვდეთ. შედეგზე არ უნდა ვიფიქროთ, მაგრამ ამავე დროს უნდა ვხვდებოდეთ, რომ საუკეთესო თამაშის ჩვენების გარეშე “ნაპოლის” ვერ მოვუგებთ. “

” ვფიქრობ, იგუაინი კარიერის საუკეთესო სეზონს ატარებს. უბრალოდ გასაოცარი გოლების შეფარდება აქვს, ნეაპოლელებს მხოლოდ ის სჭირდებათ, რომ ბურთი მიაწოდონ. ამასთან “ნაპოლიში” სხვა მაღალი დონის ფეხბურთელებიც ირჯებიან, ჩემი თვალსაზრისით, ძლიერი ინდივიდუალური ტალანტები ჰყავთ შუა ხაზში და შეტევაშიც, მაგრამ რაც მთავარია, “ნაპოლი” შესანიშნავად თამაშობს, როგორც გუნდი. “

” ძაძა დისკვალიფიკაციის შემდეგ, ჩემს განკარგულებაში დაბრუნდა, შესაძლოა მოედანზეც დაბრუნდეს ან მორატა გამოვიდეს პირველი წუთებიდან. ხედირა დღეს დაუბრუნდება მინდორს და შევაფასებთ, რამდენად შეუძლია “ნაპოლისთან” თამაში. “

” “იუვენტუს სტედიუმი” ჩვენი ციხე-სიმაგრეა, დარწმუნებული ვარ, გულშემატკივრები მე-12 მოთამაშეები გახდებიან ფეხბურთელებისთვის, ეს კი ძალიან მნიშვნელოვანია, რადგან ხვალ აუცილებლად დაგვიდგება რთული მომენტები. თითოეულ ფანს აქვს მნიშვნელობა სტადიონზე. “

” არ ვიცი რამდენად უნდა “სკუდეტო” “ნაპოლის”, მხოლოდ ის ვიცი, რომ თუ ჩვენი გუნდი ზედიზედ მეხუთედ მოიგებს ამ ტიტულს, ისტორიაში შევალთ, რადგან ბოლოს ეს “იუვემ” 1930-იან წლებში გააკეთა. ამიტომაც მგონია, ამას ფეხბურთელები ბოლომდე უნდა აანალიზებდნენ. ზოგჯერ ვეუბნები ხოლმე, წარმოიდგინონ, როგორი იქნება 16 მაისს “სკუდეტოს” მოგება.”

წყარო: “იუვენტუსის” ოფიციალური ვებ-გევრდი