Sky : სატრანსფერო ჭორები და სიახლეები დღის ბოლოს

დღის ბოლოს სკაი სპორტმა “იუვენტუსის” გარშემო არსებული სატრანსფერო სიტუაცია შეაფასა..

უპირველეს ყოვლისა, ბრძოლა გონსალო იგუაინისთვის გრძელდება.ტურინელები ყველანაირად ცდილობენ, დე ლაურენტისსა და არგენტინელ ფორვარდს შორის კონფლიქტი გამოიყენონ და კალჩოს საუკეთესო ბომბარდირი ბებერ ქალბატონში გადმოიყვანონ.ფაბიო პარატიჩი შაბათს ან კვირას თავდამსხმელის ძმასთან გეგმავს შეხვედრას, ორშაბათს კი ჯუზეპე მაროტა თავად აურელიო დე ლაურენტისს შეხვდება და რობერტო პერეირას ტრანსფერზე გაესაუბრება, თუმცა, ბუნებრივია, თემა პიპიტასაც შეეხება.

ბიანკონერებს წინახაზის გაძლიერება აქვთ გადაწყვეტილი და უკანასკნელ ვარიანტად გამოსასყიდი თანხის, 94,7 მილიონი ევროს გადახდაზეც არიან მზად.ისე კი, ოფიციალური ტურინი მზადაა მოლაპარაკებებში ზემოთ ხსენებული პერეირა, სიმონე ძაძა, დანიელე რუგანი ან სტეფანო სტურარო ჩართოს.შესაძლოა, არსებული 94 მილიონი იუვემ ორ ნაწილად დაფაროს.მოკლედ, ორშაბათს ბევრი რამ გადაწყდება.არ დაგვავიწყდეს, რომ 28 წლის წინახაზელის ხელში ჩასაგდებად “არსენალიც” იბრძვის და ლონდონელები მზად არიან, ტრანსფერში ოლივიე ჟირუ ჩართონ.

მარკო პიაცა კი “იუვენტუსს” უახლოვდება.მხარეებს ყველანაირი დეტალი შეთანხმებული აქვთ და უკვე მომავალი კვირის დასაწყისში, ხორვატი ნახევარმცველი ტურინს სამედიცინო შემოწმების გასავლელად უნდა ეწვიოს.ჯუზეპე მაროტას 21 წლის ფეხბურთელის ტრანსფერი 23 მილიონი ევრო დაუჯდება.

მომავალ კვირაში უნდა დაიგეგმოს შეხვედრა “სანტოსის” ხელმძღვანელობასთანაც, გაბრიელ ბარბოსას თაობაზე.გაბიგოლში იტალიელები 19 მილიონ ევროს იხდიან, ბრაზილიური კლუბის მესვეურებს კი სურთ, 25 მილიონი გამოიმუშავონ.

რაც შეეხება სიმონე ძაძას, მის შესაძენად რამდენიმე კლუბი გამოთქვამს პრეტენზიას.საუთჰემტონი, ტოტენჰემი, ვოლსბურგი და ვესტ ჰემი მზად არიან ტურინელთა მოთხოვნები დააკმაყოფილონ და მაროტასაც სურს, ფორვარდის სანაცვლოდ მსუყედ შეავსოს ბიუჯეტი, შემდგომ კი ის თანხა იგუაინის სანაცვლოდ გამოიყენოს.აღსანიშნავია, რომ ძაძას გასხვისების შემთხვევაში მეოთხე ფორვარდად ბიანკონერები ჩირო იმობილეს ტურინში დაბრუნებას განიხილავენ.

წყარო : Tuttojuve; Tuttosport; Football Italia