“We say it all by saying nothing at all #holidays” – ანუ დუმილი ფრანგულად

მანჩესტერ “იუნაიტედი” პოლ პოგბას შეძენას ცდილობს, “იუვენტუსი” შენარჩუნებას, თავად ფეხბურთელი კი დუმს..

უკვე რამდენიმე კვირაა, პოგბას ხან მადრიდის “რეალის” ფორმას მოარგებენ, ხან მანჩესტერ “იუნაიტედის”, თუმცა, ფაქტია, გადაწყვეტილი არაფერია.ბრიტანულმა პრესამ დღეს დაწერა, რომ მხარეებს საერთო ენის გამოსანახად მხოლოდ 10 მილიონი აშორებდათ, თუმცა საქმე არც ასე მარტივადაა.გვიან საღამოს გალილეო ფერარისზე მდებარე ოფისში “იუვეს” ხელმძღვანელობის შეხვედრა შედგა, სადაც რამდენიმე მნიშვნელოვანი საკითხი გადაწყდებოდა.უპირველესი თემა, რა თქმა უნდა, გონსალო იგუაინია.ტურინელებს არგენტინელი ფორვარდის დამატება გადაწყვეტილი აქვთ, მაგრამ გასარკვევია, რა მოგებას ნახავს ტრანსფერის სანაცვლოდ აურელიო დე ლაურენტისი.სწორედ “ნაპოლის” პრეზიდენტს გაესაუბრა ჯუზეპე მაროტა და კიდევ ერთხელ შესთავაზა ბარტერის სახით რამდენიმე ფეხბურთელი ფულთან ერთად, თუმცა პასუხი უცნობია.ამ ოფერზე უარის შემთხვევაში, ბებერი ქალბატონი პიპიტას კონტრაქტში არსებულ პუნქტს აამოქმედებს და გონსალოს უკვე მიმდინარე კვირაში ტურინში ჩამოიყვანს.

რა ხდება ამასობაში პოგბას გარშემო ? – როგორც ვთქვით, მანჩესტერი კიდევ უფრო ზრდის შემოთავაზებას და სულ მალე ალბათ მზად იქნება, 140 მილიონი ევრო გადაიხადოს ფეხბურთელის სანაცვლოდ, აქედან 120 მილიონი ბიანკონერებს, 20 კი მინო რაიოლას.სწორედ ეს უკანასკნელია ამ მომენტისთვის პოგბასთან ერთად მაიამიში, სავარაუდოდ ამერიკის შეერთებულ შტატებში უნდა გადაწყდეს მოთამაშის მომავალი.მაროტა მზადაა უარი თქვას ძალიან დიდ თანხაზე, სავარაუდოდ 7-8 მილიონამდე გაუზარდოს ხელფასი ფრანგს და თუნდაც ერთი სეზონით შეინარჩუნოს იგი, რადგან “იუვენტუსი” ჩემპიონთა ლიგაზე უძლიერესი შემადგენლობით წარსდგეს, ბუნებრივია, მსოფლიოს ერთ-ერთ საუკეთესო დაცვასთან, არანაკლებ მრისხანე ნახევარდაცვასთან, მირალემ პიანიჩთან, გონსალო იგუაინთან, პაულო დიბალასთან და რაღა თქმა უნდაპოლ პოგბასთან ერთად მასიმილიანო ალეგრის უძლიერესი გუნდი ეყოლება, პლანეტაზე ერთ-ერთი საუკეთესო.

პოგბა გამოირჩევა სოციალურ ქსელში აქტიურობით, თუმცა ახლა თუ მის პოსტებს გადავხედავთ ინსტაგრამზე, საინტერესო არაფერია.ბოლო სურათი ვიდეო სამი საათის წინაა გამოქვეყნებული, სადაც ასახულია პოლის შეხვედრა ანტუან გრიზმანთან, რომელიც ასევე ოკეანეთსმიღმა იმყოფება შვებულებაში.აი ამ ვიდეომდე დადებული ფოტო კი ჩვენთვის გაცილებით საინტერესო უნდა იყოს, ნახევარმცველი თავის აგენტთან, მინო რაიოლასთან ერთად აუზში ნებივრობს და როგორც სჩანს, მშვენიერ ხასიათზეა.

ფოტოს საინტერესო სათაური აქვს, ფრანგულად წარწერა და შემდეგ თარგმანი ინგლისურად : “We say it all by saying nothing at all #holidays” – პოგბამ იცის, რომ მის გადაწყვეტილებას მთელი მსოფლიო ელის, თუმცა ჯერ-ჯერობით დუმს.ჩვენ საკუთარ სათქმელს დუმილით ვამბობთო, საინტერესოა, პოგბას სურვილი ტურინში დარჩენაა თუ მანჩესტერში გადაბარგება..

მოკლედ, ჯერაც ველით..