უცნობი ინფორმატორი “იუვენტუსის” მომავალზე

“იუვენტუსი” დელ ნერის შემცვლელს ეძებს, goal.com -ი კი ექსკლიუზიურ ინფორმაციას ავრცელებს. ავტორიტეტული გამოცემის თანახმად, მთავარი კანდიდატი “ზენიტელი” ლუჩანო სპალეტია…

კლუბთან დაახლოვებული წყარო, რომელსაც goal.com -ი საიდუმლოდ ტოვებს აცხადებს: ” “იუვენტუსმა” დელ ნერის შემცვლელის ძებნა უკვე დაიწყო. რეალურად კანდიდატებს ჯერ კიდევ იანვარში გადახედეს, როცა გუნდი რეგრესის გზას დაადგა. დელ ნერი ივნისში წავა, ამაში თითქმის დარწმუნებული ვარ. როგორც შექმნილი მდგომარეობიდან ჩანს, მინიმუმ 90% -ით ლუიჯიმ ტურინი უნდა დატოვოს. ”

“ბრეშია” ბოლო შანსია?

” გამორიცხული არც ისაა, რომ მომდევნო მატჩის წარუმატებლად ჩატარების შემთხვევაში ახალი მწვრთნელი სეზონის დასრულებამდეც მოვიდეს და გუნდი უკვე მომავალ კვირას ჩაიბაროს. ასე რომ ორი გამოსავალია: დელ ნერი ან ზაფხულში წავა ან “ბრეშიასთან” გამართული მატჩის დასასრულს. თუ მეორე ვერსია გამართლდება, ალბათ ანტონიო კონტეს, კლაუდიო ჯენტილეს ან თუნდაც ვან გაალს უნდა ველოდეთ, მისი გერმანიის დროზე ადრე დატოვების შემთხვევაში, რაც “ჩემპიონთა ლიგიდან” გამოვარდნის შემდეგ საკმაოდ რეალური ჩანს. ”

” მრავალწლიანი პროექტის თვალსაზრისით, “იუვენტუსს” უმაღლესი კლასის მწვრთნელი სჭირდება, ლუჩიანო სპალეტი ჯერაც ფავორიტად რჩება. ვან გაალი კიდევ ერთი შესაძლო ვარიანტია. ”

” რაც შეეხება კაპელოს, ეს წარმოუდგენელი მგონია, რისი უმთავრესი მიზეზი კი მისი ამჟამინდელი პოსტია. სიაში ვალტერ მაცარიც ხვდება, მაგრამ მისი კანდიდატურა ყველაზე ნაკლებად სავარუდოა. თითქოს რაღაც კავშირი იყო, მაგრამ ამ საკითხში “ნაპოლის” მიერ ნაჩვენები შედეგი ბევრს გადაწყვეტს. თუ ნეაპოლელები “ჩემპიონთა ლიგაში” ითამაშებენ, მაცარი სავარაუდოდ ამ გუნდთან ერთად ტიტულისათვის ბრძოლას გადაწყვეტს. დეშამის სახელი დიდი ხანია ფიგურირებს “იუვეს” გვერდით და “ოლიმპიკის” ევროპულ პირველობაზე წარუმატებლობა შანსებს ზრდის. ასეა თუ ისე, დიდიეს შემთხვევაში ხელმძღვანელობა მეტ სიფრთხილეს გამოიჩენს, ის ხომ ერთხელ უკვე იყო “იუვენტუსში”, უკან დაბრუნება კი უეჭველ წარმატებას ნამდვილად არ ნიშნავს. ვფიქრობ ამით მორჩა, მეტი კანდიდატურა აღარ განიხილება. ”

ჟურნალისტების შეკითხვას, არის თუ არა დელ ნერის დარჩენის შანსი, უცნობმა ინფორმატორმა ასე უპასუხა: ” ერთადერთი შანსი “ჩემპიონთა ლიგაში” კვალიფიცირებაა, თუმცა მეოთხე ადგილი ჩვენგან ძალიან შორსაა, დრო ლუიჯის საწინააღმდეგოდ მოქმედებს და სასურველი მიზნის მიღწევა ფაქტიურად შეუძლებელი ჩანს. თავიდან გუნდი მეორიდან მეოთხე ადგილზე გასვლას იმედოვნებდა, მაგრამ ეს არ მოხდა. დირექტორებს იმედი ჰქონდათ, რომ ახალი სტადიონის ინაუგურაცია “ჩემპიონთა ლიგის” შეხვედრაში მოხდებოდა, მაგრამ არც ეს იმედი გამართლდა. როგორც ჩანს, ნამდვილად ახალი პროექტის დაწყების დროა. ”

წყარო: goal.com