ციგლერი: ” ჩვენი ბედი მხოლოდ ჩვენს ხელთაა “

რეტო ციგლერმა ტურინული კარიერა ოცნებას შეადარა. “სამპდორიას” ყოფილმა მცველმა “იუვენტუსის” რიგებში თავისი პირველი პრეს-კონფერენცია გამართა, ჟურნალისტებთან შეხვედრა პირველი სავარჯიშო სესიის შემდეგ შედგა…

” აქ ყოფნა და “იუვეს” მაისურის ტარება ნამდვილი ახდენილი ოცნებაა. ვიცი, რა პასუხისმგებლობა მაკისრია, მაგრამ ფაქტი, რომ ამ გუნდში ვირიცხები ძალას მმატებს. ჩემი კანდიდატურით სხვა კლუბებიც ინტერესდებოდნენ, ტრანსფერი “მილანსა” და “ლაციოს” სურდა, თუმცა შეთანხმება არ შედგა. “იუვენტუსს” კი უარს უბრალოდ ვერ ეტყვი.”

” რაც შეეხება კონტეს, ანტონიომ ჩემზე დიდი შთაბეჭდილება მოახდინა. “იუვესთან” ერთად მას უდიდესი წარმატებებისთვის მიუღწევია და პირველივე ვარჯიშზე საჭირო ენთუზიაზმი ჩაგვინერგა. სურს, რომ კლუბი ჩვეულ სიმაღლეებზე დააბრუნოს. ვარჯიშები დამღლელია, მაგრამ ეს ბედნიერებაში ხელს არ მიშლის. მწვრთნელი გვეხმარება, გავიგოთ რას ნიშნავს “იუვეში” თამაში. ” იუვენტუსი” ახლა ძლიერი გუნდია, რომელშიც ბევრი ჩემპიონი ირიცხება, ასე რომ, ჩვენი ბედი მხოლოდ ჩვენს ხელთაა. “

” ლიხტშტაინერი? 2003 წელს მის გვერდით “გრასჰოპერში” ვთამაშობდი, მაშინ შვეიცარიის პირველობა გვერდიგვერდ მოვიგეთ. შვეიცარიული ფეხბურთი პროგრესირებს და ბევრი ჩემი თანამემამულე უკვე პრესტიჟული ევროპული გრანდის ღირსებას იცავს. რა თქმა უნდა, ჩემთვის ძალიან მნიშვნელოვანია, რომ საკუთარ ქვეყანას ასეთ დიდებულ გუნდში თამაშით წარმოვადგენ. “ -აცხადებს ციგლერი.

წყარო: “იუვენტუსის” ოფიციალური ვებ-გვერდი