კონტეს პირველი კრახი: შეცდომებზე სწავლობენ

პირველი სერიოზული გამოცდა კონტეს შეგირდებს…

ანგარიში 14′ წუთზე იანიკ ჯალუმ გახსნა. კუთხურიდან მოწოდებულ ბურთს თავი მისმა თანაგუნდელმა დაუხვედრა, პასი იდეალური გამოდგა და პორტუგალიელ ფეხბურთელსაც ბევრი აღარაფერი დარჩენოდა. თუმცა, ის, რომ მეკარის ცხვირწინ მეტოქეთა ფეხბურთელებმა 6-7 “იუვენტუსელის” გარემოცვაში კომბინირება და თავისუფლად დარტყმა შეძლეს, კონტეს ყურადღების მიღმა ნამდვილად არ დარჩება. მეორე გოლი ცენტრში დაშვებულ შეცდომას მოჰყვა. ბურთი პაციენცას მოპარეს და შორეული დარტყმით გადაგზავნეს ბუფონის კარში. დარტყმამდე ჯალუმ 15 მეტრი დაუბრკოლებლად ირბინა და იტალიის ნაკრების კარის დარაჯი მოძრაობაზე დაიჭირა. ერთადერთი საპასუხო გოლი დელ პიეროს ანგარიშზეა. საკუთარი ნახევრიდან დასარტყმელ პოზიციაზე კაპიტანი მარტინესმა გაიყვანა, ურუგვაელის პასმა ერთდროულად რამდენიმე ფეხბურთელი გამოთიშა თამაშს.

კონტეს შეგირდები, როგორც სავარაუდო იყო, ბურთის მასიურ კონტროლს შეეცადნენ. თუმცა დაცვაში ჩაკეტვას არც პორტუგალიელები აპირებდნენ, “სპორტინგმა” სწრაფი, ტექნიკური და აგრესიული ფეხბურთი აჩვენა, შედეგად, თავის დაცვა სწორედ “იუვენტუსს” უწევდა. ტურინელები მაქსიმალურად ცდილობდნენ ბურთი თამაშში ჰქონოდათ, სწრაფად მოეძებნათ პარტნიორი და შეტევა წამოეწყოთ, თუმცა მეტოქეთა პრესინგის ქვეშ ამას იშვიათად ახერხებდნენ. 4-2-4 ფორმაცია ცენტრში სანდო დუეტს მოითხოვს, პირლოს გვერდით დაცვაზე კონცენტრირებული საყრდენი უნდა ყოფილიყო, თუმცა პაციენცამ მოვალეობები ვერ შეასრულა. რომ არაფერი ვთქვათ მის ბრალზე მეორე გაშვებულ გოლში, დამაჯერებლად არც სხვა ეპიზოდებში გამოიყურებოდა. პირლო არაფრისგან ცდილობდა რამის შექმნას, მარგამ არც მის გადაცემებს მოჰყოლია შედეგი. ეს იყო განწირული პასები დანარჩენ გუნდს მოწყვეტილი შემტევი წყვილის მისამართით. წინა ხაზი ფაქტიურად მხოლოდ ფლანგებიდან მარაგდებოდა, არც მატრისა და არც კუალიარელას მნიშვნელოვანი საგოლე მომენტი არ შექმნიათ, ფონს გასვლას ტურინელები, ძირითადად, ფლანგური შეტევებით ცდილობდნენ. სისწრაფეში მეტოქეებს კრასიჩი ადვილად ჯაბნიდა, მაგრამ მიზნამდე მის არცერთ ჩაწოდებას არ მიუღწევია, უშედეგო იყო მარკიზიოს გარღვევებიც, ოცდახუთმეტრიანი სპრინტის შემდეგ მარტო რჩებოდა მეტოქეთა გარემოცვაში და ფარას მოწყვეტილი ცხვარივით აცეცებდა თვალებს, მასირებული შეტევები, გაგრძელება არ ჩანდა.

ქება არც დაცვის ხაზმა დაიმსახურა. თავი ვერ გამოიჩინა ბარცალი-კიელინის დუეტმა. ნახევარდაცვის არარსებობამ შექმნა გრანდიოზული სივრცეები საკუთარ ნახევარზე, პორტუგალიელები დაუბრკოლებლად გადიოდნენ დასარტყმელ პოზიციაზე, ამის ნათლად ნახვა მეორე გოლის ეპიზოდში შეიძლება. რამდენიმეჯერ სცადეს საჯარიმოსგარეთა დარტყმით ბუფონის კარის აღება. დამაჯერებლად არც “იუვენტუსის” კარის დარაჯი გამოიყურებოდა, მის იმედზე კუთხურიდან მოწოდებული ბურთი პირდაპირ ბადეში გაეხვეოდა. საბოლოო ბუფონის კარი ხარიხამ იხსნა. აუღებელი არც მეორე გოლი უნდა ყოფილიყო. მშვენივრად ჩაერთო თამაშში ხორხე მარტინესი, ახერხებდა ბურთის შენარჩუნებას, გააკეთა საგოლე გადაცემა და მონაწილეობა მიიღო რამდენიმე სახიფათო შეტევაში. საერთოდაც, მეორე ტაიმში “სპორტინგი” იშვიათად აწუხებდა “იუვენტუსის” მცველებს და როცა აწუხებდა, ბონუჩისთან შეწყვილებული კიელინი შედარებით ადვილად აგვარებდა პრობლემებს. მარცხენა ფლანგი მეორე ნახევარში დე სილვესტრომ დაიკავა. ახალგაზრდა იტალიელს რამდენჯერმე მიეცა მეტოქეთა კარის აღების შანსი, მაგრამ საჭირო დროს ბურთს ვერაფერი მოუხერხა, საჯარიმო ოთხკუთხედში შესული ან უიმედო დარტყმით ამთავრებდა შეტევას, ან საერთოდაც კარგავდა ბურთს.

გუნდი რამდენიმე კვირაა შეიკრიბა და საკმაოდ ორგანიზებული კლუბის წინააღმდეგ მოუწია თამაში. გამოიკვეთა პრობლემები, რომელთა გადაჭრაზეც ახლა კონტემ უნდა იფიქროს. მიუხედავად იმისა, რომ შეხვედრას ამხანაგური ერქვა, მხარეები საკმაოდ სერიოზულად მოეკიდნენ თამაშს. ორჯერ საქმე სიტყვიერ დაპისირპირებამდეც მივიდა. შეცდომებზე სწავლობენ, ზეგ “ბაინკონერები” ნიუ იორკის “სიტი ფილდს” დაუპისირპიდებიან…