გახსნითი ცერემონიალისადმი მიძღვნილი პრესკონფერენცია

ლოდინი თითქმის დასრულებულია. დღეს სტადიონი გულშემატკივარს პირველად გაუღებს კარს და თანამედროვე ხელოვნების ნიმუშის საკუთარი თვალით ხილვის საშუალებას მისცემს. გახსნის ცერემონიას “ნოთს ქაუნთისთან” ისტორიული დაპირისპირება დააგვირგვინებს…

მაგრამ სანამ ეს მოხდებოდეს, ახალი სტადიონის შემქმნელებმა პრესკონფერენციაზე საკუთარ ქმნილებასა და მომავალ გახსნით ცერემონიაზე ისაუბრეს. შეხვედრის მთავარი გმირები სტადიონის დირექტორი ფრანჩესკო ჯანელო, კომერციული დირექტორი ფრანჩესკო კალვო და კომპანია K-events -ის პრეზიდენტი მარკო ბალიჩი იყვნენ, ამ უკანასკნელს გახსნითი ცერემონიალის მოწყობა ევალებოდა.

პირველი სიტყვით ფრანჩესკო ჯანელო გამოვიდა: ” ტრიბუნების მინდორთან სიახლოვე, რაც 7.5 მეტრს შეადგენს, ახალი სტადიონის ერთ-ერთი განმასხვავებელი ნიშანი იქნება. ასევე, აღსანიშნავია, რომ ჩრდილოეთ და სამხრეთ ტრიბუნები მოედნიდან თანაბარი მანძილებით იქნება დაცილებული, რაც ასევე განგვასხვავებს მსოფლიოს მრავალი არენისგან. კიდევ ერთი დადებითი მხარე უსაფრთხოებაა. სტადიონზე მოსული გულშემატკივარი მხოლოდ სიამოვნების მიღებაზე უნდა ფიქრობდეს და არა ულტრასებისგან მომავალ საფრთხეზე. სტადიონზე განთავსებული ვიდეოკამერები კანონდამრღვევებს დააფიქსირებენ, რასაც მათი დანაშაულის აღკვეთა და სადამსჯელო ღონისძიებები მოჰყვება. “

საგულისხმოა სტადიონის ეკენომიკა და მასში განხორციელებული ინვესტიციები. ფრანჩესკო კალვო სწორედ ფინანსურ უპირატესობებზე საუბრობს: ” 8 -სექტემბრის შემდეგ, იტალიური ფეხბურთის განსაკუთრებული ნაწილი გავხდებით. ჩვენს ქვეყანაში სტადიონისგან შემოსული შემოსავალი სრული ბიუჯეტის 13% -ს თუ შეადგენს და ეს ყველაფერი ინგლისისა და გერმანიის 27% -თან შედარებით, არაფერია. გასულ სეზონში გუნდმა საშინაო არენისგან დაახლოებით 11 მილიონი ევრო მიიღო, ამ სეზონში კი ფანატებისათის გათვალისწინებული ადგილების რაოდენობის გაზრდისა და სხვა პლიუსების გათვალისწინებით, 32 მილიონის მიღების იმედი გვაქვს. ახალმა სტადიონმა მიიპყრო ახალი სპონსორების ყურადღებაც, მათგან გამორჩეულები “ნაიკი” და “სონია”. აქედან პირველი კომპლექსში სამ გასაყიდ პუნქტს გახსნის, მეორე კი სტადიონზე დიდ ტაბლოებსა და ეკრანებს განათავსებს. “

კალვომ სიტყვა პრესკონფერენციის მესამე მონაწილეს მარკო ბალიჩს გადასცა, რომელსაც მხრებზე გახსნითი ცერემონიალის გახსნის პასუხისმგებლობა დააწვა: ” შოუ, დაახლოებით, ერთ საათს გასტანს, ყურადღება კლუბის წარსულს, აწმყოსა და მომავალს დაეთმობა. ჩვენი შთამაგონებელი “იუვენტუსის” გმირები და ტრადიცია იყო. დღესასწაულის მთავარი მოქმედი პირები თავად “იუვე” და ფანატები იქნებიან. გახსნა ოთხ ძირითდ ნაწილადაა დაყოფილი: ყველაფერი მასობრივი ქორეგრაფიული დადგმით დაიწყება, რომელში მონაწილეობასაც 500 -ზე მეტი გულშემატკივარი მიიღებს. მეორე ნაწილში “იუვენტუსის” ლეგენდებისა და მოწვეული სტუმრების საზეიმო მსვლელობა შედგება. მესამე ნაწილში გულშემატკივრებს გუნდის საზეიმო და ტრაგიკული მომენტებისთვის თვალის გადავლება შეეძლებათ, ხოლო მეოთხე ნაწილი კი თვითონ შეხვედრა იქნება. “

წყარო: “იუვენტუსის” ოფიციალური ვებ-გვერდი