იუვენტუსი – პარმა (წინასამატჩო)

სერია ა, ტური მე -2

დრო: კვირა, 11 სექტემბერი, 14:30 სთ (თბილისის დროით)

ადგილმდებარეობა: “იუვენტუს არენა”

ტურინის ” იუვენტუსისთვის ”  სერია ა-ს 2-ე ტურის მატჩი , ახალი ეპოქის დასაწყისი უნდა გახდეს . ყოველი შემთხვევისთვის , იტალიის 29 გზის ჩემპიონები ამ კუთხით უყურებენ შექმნილ სიტუაციას . სხვათაშორის სწორედ პარმამ დაანგრია ერთ ერთი ეპოქა , რომლის შექმნასაც ბიანკონერი 2010/11 სეზონში ცდილობდა ლუიჯი დელ ნერის ხელმძღვანელობით . მაშინ ტურინელებს 13 მატჩიანი წაუგებელი სერია ჰქონდათ , მაგრამ 2011 წლის 6 იანვარს გამართული დაპირისპირება კატასტროფული გამოდგა მათთვის . მატჩის დაწყებისთანავე უმძიმესი ტრავმა მიიღო გუნდის მთავარმა დამრტყმელმა ძალამ – ფაბიო კუალიარელამ , ხოლო შემდეგ ტურინულ იმედებს ცივი წყალი ბიანკონერის ექს ფეხბურთელებმა სებასტიან ჯიოვინკომ და რაფაელე პალადინომ გადაასხეს .

დღეისათვის სიტუაცია შეცვლილია . გუნდში ახალი ფეხბურთელები და ახალი მწვრთნელი მოვიდა , რომელმაც დელ ნერის 4-4-2 , გაცილებით აგრესიულ და შემტევ ტაქტიკად გარდაქმნა . თუ ადრე ტურინელებს სერიოზული საკადრო პრობლემები ჰქონდათ გარკვეულ პოზიციებზე , დღეისათვის ეს საკითხი დღის წესრიგში აღარ დგას , რადგან მაროტამ საკმაოდ ნაყოფიერი სატრანსფერო პოლიტიკა გაატარა , რის შედეგადაც გუნდში მოვიდნენ : ანდრეა პირლო , სტეფან ლიხტშტაინერი , ელჯერო ელია , ემანუელე ჯიაკერინი , მიკელე პაციენცა , არტურო ვიდალი , მარსელო ესტიგარიბია და მირკო ვუჩინიჩი .

ამ ეტაპზე საკმაოდ რთულია რაიმე კონკრეტულ მიზნებზე  საუბარი . გუნდი შენების პროცესშია და როგორც ანტონიო კონტე აცხადებს , მცირე დრო აუცილებლად დასჭირდება იმისთვის , რომ ფეხბურთელებმა ბოლომდე გაითავისონ მისი ტაქტიკური ჩანაფიქრები . მიუხედავად ამისა , გუნდს ამ რესურსით მინიმუმ ჩემპიონთა ლიგის ზონისთვის თამამად შეუძლია ბრძოლა . ანდრეა ანიელი , გუნდის პრეზიდენტი , ასევე ფრთხილობს და არ აკეთებს ხმაურიან განცხადებებს , თუმცა აშკარაა , რომ ტურინში ძალზედ წარმატებულ სეზონს ელიან ბებერი ქალბატონისგან . დამატებითი სტიმული კი რა თქმა უნდა  იქნება ახალი , სუპერ თანამედროვე არენა , რომელიც გუშინ ოფიციალურად გაიხსნა .

შედარებით მოკრძალებულია პარმას წლევანდელი ამბიციები . გუნდის მთავარი მწვრთნელი ფრანკო კოლომბა , მაქსიმალურად შეეცდება , რომ პარმას  მთელი სეზონის განმავლობაში არ მოუხდეს ვნებათაღელვა და ცხრილის ფსკერზე ყოფნა . კლუბისგან  გაცილებით მშვიდ სეზონს ელიან  .

სატრანსფერო ბაზარზე , ყველაზე დიდი თავისტკივილი გუნდს წინა ხაზში ჰქონდა გადასაჭრელი . მას შემდეგ რაც არენდით აყვანილი ამაური , ტურინში დაბრუნდა , გუნდმა სერჟიო ფლოკარი დაიმატა , რადგან ბრაზილო/ იტალიელის სახელფასო მოთხოვნილების დაკმაყოფილება , მოკრძალებულ კლუბს ამ ეტაპზე არ შეეძლო .

საინტერესო სტატისტიკა სუფევს ურთიერთ შეხვედრებში . პარმამ ბოლო სამ დაპირისპირებაში , მოგებით დაასრულა უკლებლივ ყველა . აღსანიშნავია , რომ აქედან ორი გასვლაზე ტურინში სტადიო ოლიმპიკოზე . თუმცა , ამ ჯერად ამის გაკეთება წარმოუდგენლად რთული იქნება , რადგან ბიანკონერი ახალ არენაზე ნამდვილად შეეცდება პირველი ოფიციალური შეხვედრის მოგებას .

რაც შეეხება დანაკარგებს . კონტეს განკარგულებაში არ იქნება ვინჩენცო იაკინტა , საეჭვოა ასევე მილოშ კრასიჩის , მირკო ვუჩინიჩისა და ალესანდრო მატრის ასპარეზობა . პარმას რიგებში კი მასიმო გობი , რაფაელე პალადინო , ხაიმე ვალდესი და დანილო პერეირა არ იასპარეზებენ .

მთავარი გმირი : ყურადღებით დააკვირდით სებასტიან ჯიოვინკოს . მან უკვე ორ დაპირისპირებაში მოახერხა ბიანკონერისთან თავის გამოჩენა და მაქსიმალურად ეცდება ეს კიდევ ერთხელ გააკეთოს . ფაქტია , რომ ჯიოვინკო ეცდება დაუმტკიცოს ყველას რას წარმოადგენს და თან ახალ არენაზე , ამის ჩინებული შანსი მიეცემა .