კონტე: ” “კიევო” მხოლოდ თავს იცავდა “

ვერონაში ფრედ დასრულებული შეხვედრის შემდეგ ანტონიო კონტე პირველ კომენტარებს აკეთებს. “ბებერი ქალბატონის” დამრიგებელი “ბიანკონერების” მიერ ნაჩვენები ფეხბურთით კმაყოფილია.

” ნელ-ნელა “იუვე” დიდი გუნდის მენტალიტეტს იბრუნებს, ახლა მცირე ასპექტებზე უნდა გავაგრძელოთ მუშაობა. სამი თვის განმავლობაში ფაქტიურად, ყველაფერი შეიცვალა. გასაგებია, ყველა ყოველთვის გამარჯვებას ელოდება, თუმცა “კიევო” ფიზიკურად ძალიან ძლიერი გუნდია. დაკარგული ქულების გამო ვწუხვარ, მაგრამ ჩემი ბიჭების მიერ ნაჩვენები შემართებითა და გამარჯვების წყურვილით კმაყოფილი ვარ. ინიციატივა პირველიდან ბოლო წუთებამდე არ გაგვიშვია ხელიდან. შესაძლოა, 14 ფეხბურთელის ეროვნულ ნაკრებებში გაშვების გამო ვაგეთ პასუხი, მაგრამ, დამიჯერეთ, ვერონელებს ცხრა ქულა შემთხვევით არ აუღიათ. “

” მშვენივრად ვიცოდით, რომ “კიევოს” მოძრაობა უყვარს და აქ ბრძოლა ფიზიკურ კონდიციებს შორის იქნებოდა. ადვილი არაა, აქ ჩამოხვიდე და მეტოქეს სახიფათო მომენტის შექმნის საშუალება არ მისცე, რადგან როცა ასე არ ხდება, გოლისგან დაზღვეული ვერ იქნები. სიცილიაში პირველი ტაიმი ჩავაგდეთ და მეორეში შევძელით ჩვენი თამაშის ჩვენება. დღეს ზოგადი სურათი ორივე ტაიმში კარგი იყო. რთულია, როცა მეტოქე 11 კაცით საკუთარ ნახევარზეა, სახიფათო მომენტები შექმნა, ასეთ დროს სივრცეების გამოძებნა ჭირს. მარკიზიოს ან დელ პიეროს დარტყმას რომ მოჰყოლოდა შედეგი, ნამდვილად სხვა თამაშს ვიხილავდით. კრასიჩი? მას დიდი შესაძლებლობები აქვს და მისი გამოვლენა ახლა მე მევალება. მთელ ჩემს რესურსებს გამოვიყენებ, რომ “იუვენტუსისთვის” გადამწყვეტ ფიგურად ვაქციო. ” -აცხადებს კონტე.

წყარო: “იუვენტუსის” ოფიციალური ვებ-გვერდი ; football italia