პეპე – ბრუნო ალვეში: შედგება ბარტერი?

ყველას კარგად მოგვეხსენება, რომ ფეხბურთში გამორიცხული არაფერია. აქ მოვლენები ელვისებური სისწრაფით იცვლება. პრესტიჟული იტალიური გამოცემა, Tuttosport – ი, ავრცელებს ინფორმაციას იმის შესახებ, რომ ბრუნო ალვეშის “ზენიტიდან” გადმობირებისთვის მთავარი გასაღები შესაძლოა სიმონე პეპე აღმოჩნდეს. გაგრძელება იხილეთ სრულიადში…

გემახსოვრებათ, შარშან ზაფხულს აქტიურად მიდიოდა საუბრები იმის თაობაზე, რომ “იუვენტუსის” ფეხბურთელი აუცილებლად რუსეთში გააგრძელებდა კარიერას და მისი ტურინული მომავალი ბურუსით იყო მოცული, თუმცა ანტონიო კონტე თავად ესაუბრა საკუთარ შეგირდს, სადაც მთავარმა მწვრთნელმა დაადასტურა, რომ პეპეს არსად გაშვება არ სურდა და ამით ყველა ჭორს წერტილი დაუსვა. როგორ წარიმართა განვლილი სეზონი ამ ფეხბურთელისთვის, ყველას კარგად მოეხსენება. განსაკუთრებით სეზონის პირველი ნახევარი იყო პეპესთვის შთამბეჭდავი. იგი ძირითად შემადგენლობაში შეუცვლელად ასპარეზობდა და მნიშვნელოვან მატჩებში გადამწყვეტი გოლებიც გაიტანა. ზამთრის პერიოდში ცოტა ფორმიდან ამოვარდნა დაეტყო, რაც შეიძლება “ატალანტასთან” დაპირისპირებაში მიღებული ტრავმის ბრალიცაა, მაგრამ, ამასთან ერთად, უნდა აღინიშნოს ისიც, რომ 4-3-3 სისტემიდან 3-5-2 სქემაზე გადასვლამ, უხეშად რომ ვთქვათ, პეპე ძირითადიდან ამოაგდო. თუმცა, საერთო ჯამში, 2011/12 წლების სეზონი ამ ფეხბურთელისთვის შთამბეჭდავი აღმოჩნდა და დღევანდელი გადმოსახედიდან მისი გუნდიდან წასვლა თითქმის წარმოუდგენელი ჩანს. მაგრამ, ამის მიუხედავად, არსებობს ამ საკითხის მეორე მხარეც. ანტონიო კონტე ბოლო პერიოდში 3-5-2 სისტემას ანიჭებდა უპირატესობას, ამასთან ერთად, გუნდმა სულ ახლახანს მაურისიო ისლა გაიფორმა, რაც გვაძლევს საფუძველს იმაზე ფიქრისა, რომ “იუვენტუსის” მე-7 ნომერს შეიძლება მართლა მოუწიოს გუნდთან გამომშვიდობება. თან, “ზენიტის” მთავარ მწვრთნელ ლუჩიანო სპალეტის ძალიან სურს პეპეს საკუთარი გუნდის რიგებში ხილვა, თავის მხრივ “იუვენტუსი” კი ბრუნო ალვეშის გაფორმებას ცდილობს. ასე რომ, მოვლენების განვითარება ნებისმიერი კუთხითაა შესაძლებელი.

წყარო: Tuttosport