სატრანსფერო ციებ-ცხელება

მანამ, სანამ ჯუზეპე მაროტა შემადგენლობის გაძლიერებაზე ფიქრობს, ტურინის “იუვენტუსის” სპორტული დირექტორები მოთამაშეებთან კონტრაქტის გახანგრძლივებაზე მსჯელობენ.ლეონარდო ბონუჩისთან და მასიმილიანო ალეგრისთან ერთად სულ მალე თავის მომავალს კიდევ უფრო დიდი ხნით კლაუდიო მარკიზიო დაუკავშირებს, რომელთანაც ხელშეკრულების გაფორმება 2019 წლამდე იგეგმება.ამჟამად 29 წლის ნახევარმცველი შვებულებაშია და ტურინში დაბრუნებისთანავე ეს საკითხი წარმატებით დაიხურება, მხარეებს ურთიერთთანამშრომლობის გაგრძელება სურთ და საერთო ენის გამონახვა პრობლემა არ უნდა იყოს.

იტალიური პრესა არ ადასტურებს ჩილეში გავრცელებულ ინფორმაციას, თითქოსდა არტურო ვიდალი ახლოსაა მადრიდის “რეალში” გადაბარგებასთან.ტურინული და მადრიდული მხარეები მოლაპარაკებებს არც კი აწარმოებენ, ამის მთავარი მიზეზი კი ისაა, რომ ბიანკონერები ერთ-ერთი ლიდერის გასხვისებას არ აპირებენ.მაინც აღვნიშნოთ, რომ მინიმუმი თანხა, რომელზეც ჯუზეპე მაროტა მოლაპარაკებების მაგიდას მიუსხდება, 50 მილიონი ევროა, კოპა ამერიკაზე შესანიშნავი მატჩების შემდეგ ჩილელის სატრანსფერო ღირებულება საგრძნობლად გაიზარდა.

რაც შეეხება ფერნანდო ლიორენტეს, მისით არაერთი ევროპული გუნდი ინტერესდება, თუმცა მეტ-ნაკლებად რეალური ვარიანტი ფრანგული “მონაკოა”, რომელიც დიდი ხანია თავს დასტრიალებს ესპანელს.მარიო მანძუკიჩის ტრანსფერის შემდეგ 30 წლის ფორვარდი ტურინის დატოვებასთან ახლოსაა და დიდი ალბათობით, ლუი მეორეს ბინადრები ბასკის გასაფორმებლად ყველაფერს გააკეთებენ.

ლუკა მარონეზეც ვთქვათ, რომლის აგენტი, ჯუზეპე ბოცო აქტიურად განიხილავს რამდენიმე ვარიანტს.ჰორიზონტზე ყველაზე ახლოს “ბოლონიაა”, რომელიც უახლოეს დღეებში შეხვდება მოთამაშის წარმომადგენლებს და პირადი კონტრაქტის დეტალებზე შეუთანხმდება.25 წლის შუახაზელი მაქს ალეგრის სამომავლო გეგმებში არ შედის და ტურინს სულ მალე დაემშვიდობება.

წყარო : Tuttojuve