ალეგრი: ” ფინალურ ეპიზოდებში საშემსრულებლო ოსტატობა დაგვაკლდა “

“იუვენტუსმა” იტალიის ჩემპიონატი “უდინეზესთან” შეხვედრაში მარცხით დაიწყო. “ბიანკონერის” სირილ ტეროს ერთადერთი გოლით ფრიულელებმა გასვლით მატჩში სძლიეს. მატჩის შემდეგომ, მომხდარზე მასიმილიანო ალეგრიმ ისაუბრა: “ კარგად დავიწყეთ, მაგრამ შემდეგ ცოტა ორგანიზებულობა დავკარგეთ. ფინალურ ეპიზოდებში საშემსრულებლო ოსტატობა დაგვაკლდა. მატჩის ბოლოსკენ დავიღალეთ კიდეც, რადგან 70 წუთი მაღალი ინტენსივობით ვთამაშობდით, სტუმრები კი კონტრ-შეტევებზე ცდილობდნენ ჩვენს გამოჭერას. შედეგის მიხედვით, შესაძლოა, ჩანდეს, რომ ცუდად ვითამაშეთ, მაგრამ სინამდვილეში ასე არაა, უმეტესად კარგი ფეხბურთი ვაჩვენებთ და “უდინეზეც” არაა ადვილი მეტოქე. მათთან თამაში ყველას უჭირს. კომანი? კინგსლი ძალიან კარგი ახალგაზრდა ფეხბურთელია და რამდენიმე კარგი ეპიზოდიც შექმნა, თუმცა რაც აკლია, დამაგვირგვინებელი სვლაა. განსაკუთრებით პირველ ნახევარში, კარგად მოძრაობდა, არ უნდა დაგვავიწყდეს, რომ ჯერ ახალგაზრდაა და გასაზრდელად დრო სჭირდება, ისევე როგორც სხვა ფეხბურთელებს, რომლებიც ზაფხულში შემოგვიერთდნენ. “-აცხადებს ალეგრი.

დღევანდელი მარცხი მოულოდნელი იყო ლეონარდო ბონუჩისთვისაც. “იუვენტუსის” ცენტრალური მცველი იმედგაცრუებულია, თუმცა მომავალს ოპტიმიზმით უყურებს. ბოლოჯერ ჩემპიონატის გახსნითი მატჩი “იუვემ” 2010 წელს “ბარისთან” დათმო, საშინაო მარცხი კი ტურინელებმა ისტორიაში პირველად იწვნიეს: ” არავის მოსწონს წაგებით ჩემპიონატის დაწყება, განსაკუთრებით მაშინ, როცა “უდინეზემ” კარის ჩარჩოში პირველად 78-ე წუთზე დაარტყა. მუდმივად წინ მივიწევთ და ვცდილობთ ხოლმე ორგანიზებულობა არ დავკარგოთ. სამწუხაროდ, დღეს ბოლო ფაზაში საკმარისად კარგები არ აღმოვჩნდით. მომავალ კვირას უაღრესად მნიშვნელოვანი შეხვედრა გველოდება და ვეცდებით, ჩვენი ნამდვილი ძალა სწორედ “რომასთან” ვაჩვენოთ. ყველა მოთმინებით უნდა აღიჭურვოს, რადგან ეს გარდამავალი წელია ჩვენთვის. თუმცა ეს არ ნიშნავს, რომ უკვე წავაგეთ, მაშინ, როცა ბრძოლა არც კი დაწყებულა. ბევრი ახალბედა გვყავს გუნდში და კარგი შედეგის მისაღებად, მათ საუკეთესო ფორმაში შესვლაში უნდა დავეხმაროთ. ” -აცხადებს ბონუჩი.

“უდინეზესთან” საშინაო დაპირისპირება იმაზე რთული გამოდგა, ვიდრე ბევრი ელოდა. სადებიუტო მარცხის შემდეგ, ყველაზე მნიშვნელოვანი, სწორი დასკვნების გამოტანა და დაშვებული შეცდომებისგან გაკვეთილის მიღებაა. ტურინელთა მცველი, ჯიორჯიო კიელინი სწორედ ამის გაკეთებას გეგმავს და უკვე მომავალ შეხვედრაზე ფიქრობს: “ “რომასთან” მნიშვნელოვანია, რომ გავიმარჯვოთ, რაც დადებითი სიგნალი იქნება ჩვენგან. დიახ, სტარტი ცუდი გამოვიდა, უნდა გვეცადა და პირველებს გაგვეტანა. 60 წუთის განმავლობაში თითქმის იდეალურები ვიყავით, სულის მოთქმის საშუალებაც არ მივეცით მეტოქეებს. ბოლოსკენ კომპაქტურობა დავკარგეთ, თამაში უფრო არეაული გახდა და წავაგეთ შეხვედრა, რომელიც ყველაზე უარეს შემთხვევაში 0-0 უნდა დასრულებულიყო. გუნდში ცვლილებები აუცილებელი იყო კონკურენტუნარიანობის შესანარჩუნებლად, წინააღმდეგ შემთხვევაში, ყველაფრით ვრისკავდით. პადოინი? პირლო ვერასდროს ვერ იქნება, თუმცა გააკეთა ის, რაც უნდა გაეკეთებინა. მარკიზიო, მორატა და ხედირა მნიშვნელოვანი ფიგურები არიან გუნდისთვის. ახლა “რომას” დამარცხებაზე ვფიქრობთ, დასვენების შემდეგ კი ახალი ძალებიც შემოგვიერთდებიან, დაწყებული ალექს სანდროთი. ” -აცხადებს კიელინი.

წყარო: football italia