დღეს ალექს სანდრო ოფიციალურად წარადგინეს

დღეს ტურინში ალექს სანდროს ოფიციალური პრეზენტაცია შედგა. ფეხბურთელმა “იუვენტუს სტედიუმი” მოინახულა და საკუთარ შთაბეჭდილებებზე ჟურნალისტებს ესაუბრა. ბრაზილიელი მცველი ბევრ საინტერესო საკითხს შეეხო…

“იუვენტუს სტედიუმის შესახებ: ” “იუვენტუს სტედიუმზე” შესვლისას შესანიშნავი იყო, ფანტასტიური. სამწუხაროდ, გუშინ “იუვე” დამარცხდა, ერთი უყურადღებობის გამო გადავიხადეთ საფასური.”

მისი თვისებების შესახებ: ” ერთ-ერთი თვისება ჩემი ხასიათისა ისაა, რომ მოედანზე ყოველთვის მოსაგებად გავდივარ, ყოველთვის 100% -ით ვიხარჯები შეტევაშიც და დაცვაშიც, ვარჯიშებსა და თამაშებში ამ ყველაფერს დავამტკიცებ. ჩემი შთაგონების წყარო რობერტო კარლოსი და ევრაა. პატრისი აქ ჩემი თანაგუნდელი იქნება.

ალეგრის შესახებ: ” ალეგრის უკვე შევხვდი და ვისაუბრეთ, თუმცა დეტალებში ღრმად არ შევსულვართ. მხოლოდ ორი სიტყვით შემოვიფარგლეთ, მაგრამ მწვრთნელსა და ფეხბურთელებისადმი მის დამოკიდებულებაზე წარმოდგენა უკვე შემექმნა. ”

“იუვეში” ტრანსფერის შესახებ: ” რამ მომიყვანა აქ? სურვილმა მეთამაშა “იუვენტუსში”, აქ თამაში ყოველთვის ჩემი ოცნება იყო. ბავშვობაში დიდი ჩემპიონების, ტრეზეგესა და დელ პიეროს თაყვანისმცემელი ვიყავი, ამ სიყვარულს დიდი ხნის ისტორია აქვს.

ნაკრების შესახებ: ” ნაკრებს ჩამოვცილდი, რადგან დუნგას გეგმებში არ შევდიოდი, მაგრამ მუშაობას ვაგრძელებ და იმედი მაქვს, ერთ დღეს ისევ მომეცემა ეროვნული ნაკრების მაისურის ჩაცმის უფლება. ”

სერია ა -ს შესახებ: “იტალიურ ლიგას ყოველთვის ვადევნებდი თვალყურს, ვიცი, როგორი რთულია ტაქტიკურად, მაგრამ ეს უკეთესიც კია ჩემთვის, აქ თამაშით კიდევ უფრო გავიზრდები და უკეთესობისკენ შევიცვლები. ამ გზის გავლაში “იუვე” დამეხმარება. ”

რომა – იუვენტუსი: ” ეს კლასიკაა და ამდენად, დარწმუნებული ვარ, რთული მატჩი იქნება. მზად ვარ სათამაშოდ, ახალ მეგობრებთან ყოველდღიურად უფრო და უფრო უკეთ ვგრძნობ თავს, კვირას ოლიმპიურ სტადიონზე გასვლისთვის მზად ვიქნები. ”

ჩემპიონთა ლიგაზე: ” “პორტოს” გამოვარდნის შემდეგ, “იუვენტუსს” ვქომაგობდი. ბევრს ვიმუშავებთ ფინალში კიდევ ერთხელ გასასვლელად და ვეცდებით, ყველა ტურნირში გავიმარჯვოთ, რომელშიც მონაწილეობას ვიღებთ. ”

სატრანსფერო მოლაპარაკებებზე: ” “პორტომ” ახალი კონტრაქტი და კაპიტნის სამკლაური შემომთავაზა, მაგრამ მე “იუვენტუსში” წამოსვლა მინდოდა და ვფიქრობ, ეს ჩემთვის სწორი გადაწყვეტილება იყო. აქ თამაში გაზრდაში დამეხმარება. ”

მაისურის ნომერი: ” ნომერი 12 ჩემს ოჯახთან ერთად შევარჩიე. ამ ნომრიან მაისურს ჩემი დიდი მეგობარი ჰალკი ატარებდა “პორტოში” ყოფნისას. გადაწყვეტილების მიღებაში ესეც დამეხმარა. ”

წყარო: Canalejuve