გიორგი ქასრაშვილის ყოველკვირეული მიმოხილვა

სალამი იუვენტინოებო, მოვლენებს დავასწრებ და წინასწარ მოგილოცავთ იტალიის თასის ფინალში გასვლას. ასევე გილოცავთ მსოფლიოში ნომერ პირველი მეკარის დაბადების დღეს, რომლის პირად კარიერასაც სულითა და გულით ვგულშემატკივრობთ.

ეხლა კი რაც შეეხება გუშინდელი იტალიის თასის 1/2 ფინალურ დაპირისპირებას.

მოლოდინისამებრ, ალეგრიმ კვლავ 3-5-2 ტაკქტიკა აირჩია. კარს როგორც თასის თამაშებზე მივეჩვიეთ, ნეტო იცავდა. დაცვის ტრიოს კი კასერესი-ბონუჩი-კიელინი შეადგენდნენ. თუ მარჯვენა ფლანგზე კუადრადოს გამოჩენა მოსალოდნელიც და გამართლებული იყო, მე პირადად გამიკვირდა ევრას ძირითადში გამოჩენა, რამეთუ რომასთან დიდი ბრძოლა გადატანილი ფეხბურთელის ასევე ასეთ მძიმე მატჩში დაყენება, რომელსაც ერთვის მისი ასაკი, ცოტა არ იყოს და გასაკვირია.

ნახევარდაცვაში წინასწარვე იყო ცნობილი რომ ხედირა დაისვენებდა, გამომდინარე აქედან ველოდით რომ მის ადგილს სტურარო დაიკავებდა, მაგრამ ალეგრიმ ასამოას მისცა სათამაშო დრო და არც შემცდარა. წინა ხაზში კი ძაძას დისკვალიფიკაციიდან და დიბალას დასვენებიდან გამომდინარე მანძუკიჩი-მორატას დუეტი მოგვევლინა, რომელთაგანაც ამ უკანასკნელმა გაამართლა და იმედია საკუთარი თავის რწმენაც დაიბრუნა.

ეხლა კი მივყვეთ მატჩის პერიპეტიებს. ტაიმის პირველი ნახევარი თანაბარ ორთაბრძოლაში წარიმართა, იყო დაშვებული შეცდომა მსაჯის მხრიდან, 100%-იანი არ დანიშნული თერთმეტმეტრიანი ინტერის კარის მიმართულებით, მაგრამ მეორე ეპიზოდში უკვე მსაჯმა თვალები ფართოდ გაახილა და პენალტი დანიშნა იუვენტუსის სასარგებლოდ, რომელიც კუადრადომ მოიპოვა.. რეალიზება კი ალვარო მორატამ მოახერხა. 1-0 და ტაიმიც მიმდინარე ანგარიშით დასრულდა.

მეორე ტაიმში მოსალოდნელი იყო ინტერის გააქტიურება, მაგრამ არც იუვენტუსი იტყოდა უარს ანგარიშის გაზრდაზე, რამეთუ წინ კიდევ საპასუხო მატჩია ჩასატარებელი. კუადრადოს აქტიურობას მოჰყვა ევრას დიაგონალური, გამჭოლი პასი საჯარიმოში, სადაც ფელიპე მელომ კარგი ასისტობა ,,იკისრა” და მორატამ დუბლი შეასრულა. გულშემატკივრები ხარობენ, სკანდირებენ მორატას და ერთ ნაბიჯში ვუახლოვდებით ფინალს. ინტერი დაიბნა, რასაც მოჰყვა მათი მხრიდან ნერვების ვერ მოთოკვა და მურილოს სახის წინ აფრიალებული წითელი ბარათი.

70-ე წუთი, 2-0, 10 კაცით დარჩენილი მოწინააღმდეგე, ეს უკვე საკმარისი იყო სიხარულისათვის… მაგრამ შეცვლაზე შემოსვლიდან 6 წუთში კვადვო ასამოას პასი, გოლად აქცია პაოლო დიბალამ და მოწინააღმდეგის განადგურებას და ფიქრს თუნდაც მიზერულ შანსებზე ფინალში გასვილას წერტილი დაუსვა.

ასე და ამგვარად, გაშვებული გოლის გარეშე გადავლახეთ 1/8 ფინალი, 1/4 ფინალი და 1/2 ფინალის პირველი ეტაპი. ვიმედოვნებ, რომ ფინალში გაშვებული გოლის გარეშე გავალთ და თასსაც გოლის გაშვების გარეშე მოვიპოვებთ.

განმეორებითი მატჩი 2 მარტს გაიმართება.

მანამდე კი ვაგრძელებთ სერია-ას გათამაშებას, სადაც 2 ქულიანიანი ჩამორჩენა გვაქვს აღმოსაფხვრელი. წინ გველის დაპირისპირებები კიევოში, შინ ჯენოასთან, სტუმრად ფროსინონე და სკუდეტოსათვის გარდამტეხი მატჩი ტურინში ნაპოლის წინააღმდეგ, რომელიც 13 თებერვალს გაიმართება. იმედს ვიტოვებ, რომ შინ ნეაპოლისტებს ლიდერის რანგში დავუხვდებით, რამეთუ 3 თებერვალს ლაციოში გასვლითი მატჩი ელით მათ.

გილოცავთ კიდევ ერთხელ ფინალში გასვლას და იუვეს ასეთ წარმატებულ ასპარეზობას.

კეთილი სურვილებით თქვენი იუვენტინო ,,QASRA“