იტალიური პრესა ვიტსელის ალტერნატივებს ასახელებს

აქსელ ვიტსელი ნელ-ნელა ჩინეთის ჩემპიონატს უახლოვდება, ტურინის “იუვენტუსის” ხელმძღვანელობა კი ალტერნატიულ ვარიანტებს განიხილავს..

ტომას რინკონის ტრანსფერის შემდეგ მასიმილიანო ალეგრი გუნდში კიდევ ერთი ნახევარმცველის მოყვანას ითხოვს და სატრანსფერო ფანჯრის გახსნისთანავე, ჯუზეპე მაროტა რამდენიმე კლუბთან დაიწყებს მოლაპარაკებებს.იტალიური პრესის მიერ გავრცელებული ინფორმაციით, მთავარ კანდიდატებად “ვოლსბურგის” შუახაზელი ლუის გუსტავო, “სევილიას” სტევენ ნ’ზონზი, “ლიონის” კორენტინ ტოლისო და “ატალანტას” რობერტო გალიარდინი სახელდებიან.

ნ’ზონზის კონტრაქტში არსებული პუნქტის თანახმად, მისი გამოსასყიდი თანხა 30 მილიონი ევროა, თუმცა არავინ იცის, რამდენად დათანხმდება ჩემპიონთა ლიგის 1/8 ფინალში მოასპარეზე “სევილია” ნახევარმცველის გასხვისებას.იგივე სიტუაციაა ტოლისოს გარშემოც, ოლიმპიკელები ახალგაზრდა შუახაზელს ერთ-ერთ ლიდერად თვლიან და საკმაოდ სერიოზულ თანხას ითხოვენ.

გალიარდინი “ატალანტას” რიგებში მოასპარეზე ერთ-ერთი უნიჭიერესი იტალიელი ნახევარმცველია, მისი სატრანსფერო ფასი კი ჯერ-ჯერობით უცნობია.

ყველაზე რეალური ვარიანტი მაინც ლუის გუსტავოა, “ვოლსბურგი” მზადაა ბრაზილიელი არენდის წესით გაუშვას გამოსყიდვის შესაძლო პერსპექტივით.

წყარო : Football Italia