მაროტა: გომეში ჭორია, ჰიოვედესი რეალური…

ჯუზეპე მაროტამ კენჭისყრასთან და ტრანსფერებთან დაკავშირებით მცირე ინტერვიუ მისცა ჟურნალისტებს:

“ყველა ჯგუფშია წყალქვეშა დინებები. მთავარია ყველა თამაშს სწორი განწყობით მიუდგე. ყველა მათგანი ძლიერი მეტოქეები არიან. “ბარსელონა” ნეიმარის დაკარგვით, რა თქმა უნდა დასუსტდა, მისი შეცვლა ადვილი საქმე არ არის, მაგრამ ვნახოთ როგორ გაუმკლავდებიან ამ ამოცანას. ნებისმიერ შემთხვევაში მათ საკმაოდ სერიოზული გუნდი ჰყავთ.

ანდრე გომეში ამჟამად ჩვენს ინტერესთა სფეროში არ შედის, ეს ჟურნალისტების მოგონილია. ჩვენ ყურადღებით ვაკვირდებით ბაზარს და საინტერესო ვარიანტებს განვიხილავთ. ამ მომენტისთვის ჩვენი გუნდი საკმაოდ კონკურენტუნარიანია. ძნელია ბაზარმა ისეთი ვარიანტი შემოგვთავაზოს, რომელიც მნიშვნელოვნად გააუმჯობესებდა ხარისხს.

ახლა ჩვენი მთავარი საზრუნავი დაცვაა. ამ ამოცანაზე სატრანსფერო ფანჯრის ბოლომდე ვიმუშავებთ. თუ ისეთი ვინმე გამოჩნდა, რომელსაც ცენტრშიც შეეძლება თამაში და ფლანგზეც, საუკეთესო ვარიანტი იქნება. ჰიოვედესი? არ უარვყოფ, ჩვენ ამაზე ვმუშაობთ. ის გვაინტერესებს, მაგრამ ჯერ კიდევ ბევრია სამუშაო კლუბთან და კონტრაქტის დეტალებთან დაკავშირებით. დიახ ის ჩვენი ვარიანტია, უფრო მეტი, ვიდრე ჰიპოთეზა.

მარკიზიოზე, მართალი გითხრათ, არასოდეს მინერვიულია. ის არა მხოლოდ დიდებული ფეხბურთელი, არამედ გუნდის უდიდესი ფანატიკოსია. კლაუდიო ბავშვობიდან “იუვენტუსში” თამაშობს, ის ემოციურადაა მიბმული კლუბზე.”