ტონის ბოლო გაბრძოლება

მივესალმოთ ლუკა ტონის…

ლუკა ტონი – თანამედროვე იტალიური ფეხხბურთის ვარსკვლავი, პირისპირ ბრძოლისა და შორეული დარტყმების დიდოსტატი, გასულ სეზონში 19 გატანილი გოლის ავტორი, ტურინის “იუვენტუსის” უმთავრესი იმედი და “სკუდეტოსათვის” ბრძოლის უმნიშვნელოვანესი ბერკეტი – ეს ყველაფერი კარგი იქნებოდა, სიმართლე რომ იყოს. სინამდვილეში ტონი იმ “ვადაგასულ ვარსკვლავთა” რიცხვში შედის, ადრე რომ ბრწყინავდნენ და დღეს კალჩოს საშუალო კლუბში კარიერის დასრულებაზეც არ იტყოდნენ უარს, შეძლებს თუ არა კუალიარელას ჩანაცვლებას? -რა თქმა უნდა ვერა. ამ უკანასკნელის მიერ ნახევარ სეზონში მოპოვებული გულშემატკივართა სიმპათია ტონისთვის მხოლოდ სანატრელი იქნებოდა, მაგრამ მოდით ამ ყველაფერს სხვა კუთხით შევხედოთ.

ბოლო წლები ტონის კარიერაში აშკარა რეგრესის წლები იყო: საშინელი კრიტიკა, დამამცირებელი შეფასებები და უსახური თამაშით წარსულ წარმატებებზე გადასმული ჯვარედინი ხაზი. ახლა კი, კუალიარელას სრულიად შემთხვევითი ტრავმა და – ის “იუვეშია”. წარმოიდგინეთ და ხდება ტონის თავში: სარეაბილიტაციო ღვთისგან ბოძებული შანსი, შანსი, რომელიც აღარასოდეს განმეორდება. ან ახლა უნდა დაამტკიცოს თავისი ფასი ან არასოდეს, ან “იუვეში” ან არსად. ეს მისი კარიერის ბოლო გაბრძოლებაა. უკეთეს მოტივაციას ვერც ინატრებდა, ტრეზეგეს სწორედ ეს აკლდა.

ამასთან, “იუვენტუსის” სათამაშო სისტემა გარკვეულწილად მასზე იქნება მორგებული. თავადაც შეამჩნევდით, რომ ცენტრიდან ათი მეტრით დაშორებული სტანდარტიდანაც კი ბურთის მეტოქის საჯარიმოში ჩაწოდებას ვარჩევთ, შეტევები უმთავრესად ფლანგებიდან ვითარდბა, 194 სანტიმეტრიანი ტონის მოსვლა კი ამ “ჩაგდბებეს” ერთიორად სახიფათოს გახდის. “იუვენტუსის” მიერ ამ სეზონში არასტანდარტული მდგომარეობიდან გასული 28 გოლიდან 18 ერთი შეხებით, საჯარიმოდან გავიდა (ბევრი მეკარის საჯარიმოდანაც კი). მათში ტონის მთავარი მინუსის, ტექნიკის წილი ცოტა იყო, ასეთი გოლები სწორედ მისი სტილია. მანევრირებისათვის დიდი სივრცეები არც კუალიარელას ეძლეოდა, ამიტომაც ვერ ვიხილეთ ისეთი შორეული დარტყმები მისგან, ადრე რომ გვახსოვდა. ჩაწოდება ან დაბალი ძლიერი პასი, დარტყმა და გოლი. ეს “იუვეს” ფორმულაა, რამაც შესაძლოა ჩვენი ახალი ფორვარდის უგერგილო მოძრაობებს საჭიროება დაუკარგოს. ძირითადად უბრალოდ ბურთის ლოდინი, ანუ სწორი პოზიციის შერჩევა მოუწევს, რაც 33 წლის ფეხბურთელს, რომელსაც სად აღარ უთამაშია, არ უნდა გაუჭირდეს. ვთქვათ, იგივე “ნაპოლიში” მისი ყოფნა-არყოფნა ერთი იქნებოდა, თუმცა შესაძლოა, წლების მანძილზე “კუდ ქცეულმა” ტონის ტურინში “ფეხი გამოყოს.”

ასეა თუ ისე, ლუკა ტონი ახლა “იუვენტუსის” ფეხბურთელია, ნამდვილი “ბიანკონერო” ოცნომრიანი მაისურით. მიუხედავად ამ ტრანსფერის უამრავი უარყოფითი მხარისა, ის შავ-თეთრი მაისურით ითამაშებს. უკვე ხვალ მას საქმეში ვიხილავთ. რომ არაფერი ვთქვათ საკადრო პრობლემებზე, წლის ერთ-ერთ ყველაზე მნიშვნეოვან შეხვედრას საშინელი ფსიქოლოგიური მდგომარეობით ვხვდებით. კეთილი იყოს შენი მობრძანება ლუკა!”სან პაოლოზე” ბევრი რამ გაირკვევა…