დელ პიერო: ” ნაბიჯ-ნაბიჯ მთავარი მიზნისკენ… “

ოლიმპიურ სტადიონზე “ლაციოს” დამარცხებას განსაკუთრებული გემო აქვს, მით უმეტეს, როცა ამ გუნდებს შორის დაპირისპირებას სატურნირო ცხრილში შექმნილი მდგომარეობა ამძაფრებს. რომში მოპოვებულ გამარჯვებას დელ ნერის მიერ ნებადართული ერთდღიანი შესვენება მოჰყვა. “ბიანკონერებმა” ძალები აღიდგინეს და ახალი ენერგიით დამუხტულები ვარჯიშებსაც აგრძელებენ. მიზნისკენ ნაბიჯ-ნაბიჯ სვლა, ეს ალესანდრო დელ პიეროს ფორმულაა. ლეგენდარული კაპიტანი “მფრინავ ვირებთან” შეხვერის მოლოდინშია…

საკუთარ ვებ გვერდზე დელ პიერო წერს: “ დედაქალაქიდან სამი ქულა ჩამოვიტანეთ, ახლა კიდევ ერთ სამ ქულაზე უნდა ვიფიქროთ და ერთი კვირის შემდეგ კიდევ ერთზე. ბოლოს “ნაპოლისთან” აღებული სამი ქულის დროც დადგება. “ლაციოს” დამარცხების შემდეგ მხოლოდ მომავალ ორშაბათზე უნდა ვკონცენტრირდეთ და სეზონის გამარჯვებებით დასრულებას ვეცადოთ. ”

““ლაციოსთან” სირთულეებს გადავაწყდით, მაგრამ ვაჩვენეთ გუნდური სულისკვეთება, ერთიანობა და უნიშვნელოვანესი უნარი, იბრძოლო ყოველი შანსის გამოყენებისა და გამარჯვებისთვის, განსაკუთრებით, ბოლო წუთებში. დასასრულს გატანილი გოლის აღნიშვნა ბრწყინვალე გრძნობაა, ისევე როგორც შეხვედრის დასრულების შემდეგ ფანებთან სიხარულის გაზიარება. რა თქმა უდნა, ორშაბათი დღე დავიწყებას არ უნდა მიეცეს, ეს ამაღლებული განწყობა “კიევოს” დასამარცხებლად უნდა გამოვიყენოთ. ”

როგორი იქნება სატურნირო ცხრილი ჩემპიონატის დასასრულს, მხოლოდ 270 წუთის შემდეგ გამოჩნდება. აქამდე უბრალოდ მომავალ დაპირისპირებებზე ფიქრია საჭირო: ” სეზონს მხოლოდ სამი ტურის შემდეგ შევაჯამებთ. მაშინ გამოვიტანთ დასკვნებს და იმედი მაქვს შედეგის მაქსიმუმსაც მივაღწევთ. იმ პრობლემების გათვალისწინებით, რომელთაც გადავწყდით, ეს ამ სეზონის ღირსეულად დასრულების ერთადერთი გზაა. ” -აცხადებს დელ პიერო.

წყარო: “იუვენტუსის” ოფიციალური ვებ-გვერდი