დელ ნერი “იუვენტუსს” ემშვიდობება

ლუიჯი დელ ნერიმ კლუბის გადაწყვეტილება, რომელიც გუნდიდან მის წასვლას გულისხმობს, ჯერ კიდევ “ნაპოლისთან” მატჩამდე გაახმაურა. “ევროპის ლიგის” საგზურის მოსაპოვებლად “ბებერ ქალბატონს” ნეაპოლელთა დამარცხება და გენუური “სამპდორიას” დახმარება სჭირდებოდათ, თუმცა “რომამ” გამარჯვება იზეიმა, “იუვე” კი სეზონის დასკვნით მატჩში ქულას დასჯერდა…
” ძალიან ჩახლართული წელი გამოდგა, კონკრეტული მიზნებისა და ამოცანების ჩათვლით, რომლებიც დასაწყისში დაგვისახეს. სტარტი კარგი გვქონდა, რითმი დავიჭირეთ და შედეგიც იყო. ყველაფერი იანვარში შეიცვალა. მაგრამ მიუხედავად ამდენი პრობლემისა, მიუხედავად მიჯრით სამი მარცხისა გამარჯვების გზაზე დაბრუნების შანსი გაგვიჩნდა. ასეა თუ ისე, ვერც ეს შანსი გამოვიყენეთ. იყო საშინელი მომენტებიც, “კატანიასთან” ბოლო წამს დათმობილი ქულები ძნელი გადასატანია. საუკეთესო, რაც აქ გადამხდა ტურინში მიღებული შეუფასებელი გამოცდილებაა. შანსი ახალგაზრდებსაც მივეცი და ზოგადად რომ ვთქვა, ანდრეა ანიელის სიტყვებს ვეთანხმები, ამ პირობებში შეიძლება ითქვას კარგი სამუშაო შევასრულე. როცა გუნდის ნელ-ნელა შენება გინდა, მაშინ ჩვენი შემადგენლობა ამისთვის გამოდგება, მაგრამ ამ გუნდით “ბაიერნს” და მადრიდის “რეალს” ვერ დაუპირისპირდები. შეიძლება ზედმეტად ბევრს ელოდნენ ჩემგან. ცვლილებები და გამარჯვება ერთად ძნელია, ეს ორი ცნება ერთმანეთს ვერ უდგება. ბევრ ჩემს ფეხბურთელს ამ დონეზე არასოდეს უთამაშია, შემადგენლობის ნაწილი ნაკლებად ძლიერი კლუბიდან გადმობარგდა. მათ გამოცდილების დაგროვება, გუნდთან შეჩვევა სჭირდებათ, ეს კი დროს მოითხოვს, რაც მშვენივრად მესმის, რომ “იუვეს” აღარ აქვს. ჩემს სამუშაოს არასოდეს დავზარებივარ, მაგრამ ეს წინსვლისთვის საკმარისი არ აღმოჩნდა. ვამაყობ, რომ ამ გუნდს ვედექი სათავეში. ფეხბურთელებთან კარგი ურთიერთობა მაქვს და იმედია ეს არც მომავალში შეიცვლება. ” -შეგახსენებთ, რომ “უდინეზემ” “ჩემპიონთა ლიგის” საგზური მოიპოვა და მომავალ წელს ფრიულელები იტალიას კონტინენტის ყველაზე პრესტიჟულ ტურნირზე წარმოადგენენ.

წყარო: “იუვენტუსის” ოფიციალური ვებ-გევრდი ; goal.com