ანტონიო კონტეს პრეზენტაცია ( დეტალები )

11.12 სთ – “იუვენტუსი” ოფიციალურად ადასტურებს ლუიჯი დელ ნერის თანამდებობიდან განთავისუფლებას.

12.35 – ანტონიო კონტე კორსო გალილეო ფერარისზე მივიდა.

14.00 – ანდრეა ანიელი : “ჩვენ გამარჯვება გვსურს, ამის გაკეთებას კი ანტონიო კონტესთან ერთად ვაპირებთ.ეს წარმატებისკენ გადადგმული პირველი ნაბიჯია.”

14.20 – ანტონიო კონტე ჟურნალისტებს ხვდება.მასთან ერთად ჯუზეპე მაროტა, ანდრეა ანიელი და ფაბიო პარატიჩი იმყოფებიან.

15.00 – ანტონიო კონტე ბებერი ქალბატონის მთავარი მწვრთნელი ოფიციალურად გახდა.

პრესკონფერენცია იწყება :

მაროტა : “მოგესალმებით.მინდა მადლობა გადაგიხადოთ, რადგან დღეს ჩვენთან ერთად იმყოფებით.ანტონიო კონტეს იუვენტუსის მთავარ მწვრთნელობას ვულოცავ.ანტონიო ბიანკონერების კაპიტანი წლების მანძილზე იყო და ყველაფერი მოიგო.გამარჯვება შემთხვევითობა არაა, მისთვის ბრძოლა და თავდადებაა საჭირო.მინდა კონტეს წარმატებები ვუსურვო.მჯერა, რომ ჩვენი გუნდი სწორედ ანტონიოსთან ერთად დაიბრუნებს ძველ დიდებას.”

კონტე : “მოგესალმებით.ბედნიერი ვარ, რომ სახლში დავბრუნდი.შვიდი წელი გავიდა და ოცნება ამიხდა – ბიანკონერების მთავარი მწვრთნელი გავხდი.ხელმძღვანელობას დიდ მადლობას ვუხდი, მათ ნდობა გამომიცხადეს.”

კითხვა : უკვე მეორე წელია, “იუვენტუსი” კრიზისიდან თავის დაღწევას ცდილობს.როგორ ფიქრობთ, რამდენად რთული იქნება გუნდისთვის გამარჯვების მენტალიტეტის დაბრუნება ?

კონტე : “მთავარი რა თქმა უნდა გამარჯვების გზაზე დაბრუნებაა.იუვენტუსის ისტორია სრულიად სხვაა, ეს ის გრანდია, რომელიც რთულ მომენტებშიც ერთიანობით გამოირჩევა და წარმატებას აღწევს.”

კითხვა : “რა შეგიძლია თქვათ ტაქტიკაზე ? ნახევარდაცვაში გუნდს ჰყავს მარკიზიო, რა როლს შეასრულებს პირლო ? ამკითხვაზე პასუხის მოსმენა ჯუზეპე მაროტასგანაც საინტერესო იქნებოდა.”

კონტე : “დიდი ფეხბურთელი მოედანზე საკუთარ თავს ყოველთვის იპოვის.ჩვენ იტალიის ნაკრების ორ ნახევარმცველზე ვსაუბრობთ.პირლო გამარჯვების მენტალიტეტით დაჯილდოვებულია.მოხარული ვარ, რომ კლაუდიოც და ანდრეაც ჩემს კლუბშინ ასპარეზობენ.”

მაროტა : “მარკიზიო ჩვენი გუნდისთვის მნიშვნელოვანი ფიგურაა.ის საკუთარი საქმის დიდი პროფესიონალი და სისხლით იუვენტინოა.ყველა ჭორი, რომლებიც გაზეთებზე კლაუდიოს ტრანსფერთან დაკავშირებით იწერება – ჟურნალისტების ფანტაზიის ნაყოფია.ვფიქრობ, რომ კონტე ორივე მოთამაშის საუკეთესო მხარეებს ჩვენს სასარგებლოდ გამოიყენებს.”

კითხვა : როდის მიიღეთ “იუვენტუსიდან” პირველი ზარი ?

კონტე : “ასე ვიტყვი – საჭირო მომენტში.კონკრეტული რიცხვის დასახელებას თავს ავარიდებ.”

კითხვა : რა გრძნობაა, როცა თქვენს განკარგულებაში ჯიჯი ბუფონი და ალესანდრო დელ პიერო არიან  ?

კონტე : “ბუფონმა და დელ პიერომ შესანიშნავად იციან, რას ნიშნავს იყო გამარჯვებული და მოიგო კიდევ.ჩემი სამწვრთნელო შტაბი განვითარების სტადიაშია.ჩვენ მაქსიმალურად ძლიერი სამწვრთნელო შტაბი უნდა ჩამოვაყალიბოთ.პრეზენტაციის შემდეგ დირექტორებს შევხვდები და ჩემს გეგმებს კონკრეტულად გავაცნობ.”

კითხვა : რას ფიქრობთ, გუნდმა ერთი მოთამაშის სანაცვლოდ 45-60 მილიონი ევრო გადაიხადოს თუ საშუალო ღირებულების მეტი მოთამაშე დაიმატოს ?

კონტე : “ფული სწორად უნდა გადანაწილდეს.45-60 მილიონის დახარჯვა ხშირ შემთხვევაში მეტად დადებით შედეგს იძლევა, ვიდრე 15 მილიონად მოთამაშის დამატება.”

კითხვა : იუვენტუსმა ბოლო წლების მანძილზე ძალიან ბევრი მწვრთნელი დაითხოვა.რას გააკეთებთ, რომ ამ “მიწისძვრაში” თქვენც არ მოჰყვეთ ?

კონტე : “აწმყოზეც და მომავალზეც ძალიან ბევრს ვფიქრობ.წარსულში წარმატებული მოთამაშეები ჩემზე კარგს ფიქრობენ, ეს ძალიან მნიშვნელოვანია.ვფიქრობ, რომ ეს დავიმსახურე.ახლა ჩემს გვერდით ის ხალხია, რომლებიც მენდობიან და მხოლოდ წარმატებაზე ფიქრობენ.”

კითხვა : გქონდათ თუ არა “იუვენტუსიდან” პირობა იმისა, რომ გუნდი წარმატებისთვის ინვესტიციებს ჩადებდა, თუ შემოთავაზებას ნებისმიერ შემთხვევაში დათანხმდებოდით ?

კონტე : “ყველამ იცის, როგორ მიყვარს გუნდი და გულშემატკივრები.ეს უმთავრესია, რის გარეშეც გუნდში მუშაობას არ დავთანხმდებოდი.”

კითხვა : სკეპტიკოსებს რას ეტყოდით ?

კონტე : “ეს ჩემი საქმეა.ყოველთვის ვამბობ და ვიტყვი : დროს სწორად გაგება სჭირდება.ბევრი მუშაობა მხოლოდ მაშინ იძლევა შედეგს, თუ იგი სწორად გაკონტროლებული და დაგეგმილია.”

წყარო : Tuttojuve