გვჭირდება კი აგუერო?!

“იუვენტუსის” მთავარი სატრასნფერო სამიზნე სერხიო აგუეროა. მაგრამ შეძლებს კი მხოლოდ არგენტინელი იმ მიზნის მიღწევას, რასაც “იუვენტუსის” დაბრუნება ჰქვია?..

სერხიო აგუერო უაღრესად ნიჭიერი ფეხბურთელია, ამის კითხვის ნიშნის ქვეშ დაყენება არ შეიძლება. გასულ სეზონში არგენტინელმა “ლა ლიგაში” 20 -ჯერ აიღო მეტოქის კარი, რითაც ამ მხრივ პერსონალური რეკორდი გააუმჯობესა. თუმცა მომავალში ამასაც რომ არ დასჯერდება ნათელია, ფეხბურთელი მხოლოდ 23 წლისაა. ყოველი დაპირისპირების დროს ტერორის ქვეშ ამყოფებს “ჩელსის”, “ბარსელონას”, “ინტერისა” და მადრიდის “რეალის” დონის გუნდებს, ფაქტიურად ყველა ევროპული გრანდის დაცვის ხაზს ეშინია სამხრეთ ამერიკელის. ამასთან ერთად აგუერო არც ეროვნულ ნაკრებში აჩვენებს ცუდ ფეხბურთს, უკვე მერამდენე წელია სტაბილურად მაღალი შედეგი აქვს.

აგუერო მსოფლიოს ნებისმიერი გუნდისთვის დიდებული შენაძენი იქნებოდა, საგრძნობლად გააძლიერებდა ამ გუნდის წინა ხაზს, ცხადია, ეს კონტეს “იუვენტუსსაც” ეხება. არც იმის ვარაუდი იქნებოდა სწორი, რომ არგენტინელი “სერია ა” -სთან მორგებას ვერ შეძლებს, რადგან ეს აქამდე არაერთ მის თანამემამულეს შესანიშნავად გამოსვლია. მათ შორის პირველ ადგილზე სწორედ აგუეროს სიმამრი უნდა დავაყენოთ.

მაგრამ, პირდაპირ რომ ვთქვათ, სერხიო აგუერო სულაც არაა ის ფეხბურთელი, რომელიც “იუვენტუსს” ჩემპიონთა ლიგაზე დააბრუნებს. ის მრავალსართულიანი ტორტის მწვერვალზე ალუბლის მარცვალს ჰგავს, მაგრამ ეს მაშინ, როდესაც ამ ტორტს უამრავი ინგრედიენტი აკლია. შემტევი პოტენციალი მომავალი სეზონისთვის გუნდს საკმარისზე მეტი აქვს. ფაბიო კუალიარელას განმაცვიფრებელი თამაშისა და 17 შეხვედრაში გატანილი 9 გოლით გუნდი იანვრამდე პირველი ადგილისთვისაც კი იბრძოდა. მის შემცვლელად “კალიარიდან” მოწვეულმა მატრიმ ასევე ცხრაჯერ შეძლო მეტოქეთა კარის აღება და საერთო ჯამში გატანილი 20 გოლით აპენინელ ფორვარდთა შორის ბომბარდირობაში მხოლოდ დი ნატალეს ჩამორჩა.

ამ ორს სრულაიდ უნდა შესწევდეს მთავარი ჭაპანის ზიდვა და “ბიანკონერებისათვის” ადგილის სამეულში დაბევება. ესეც რომ არა, კონტეს განკარგულებაში კიდევ რამდენიმე ფორვარდია, მათ შორის ლუკა ტონი, ვინჩენცო იაკინტა და ბოლოს და ბოლოს კლუბის კაპიტანი ალესანდრო დელ პიერო. “იუვეს” მიერ სეზონში გატანილი 57- გოლიანი ნიშნულის გაუმჯობესება მხოლოდ ექვსმა კლუბმა თუ შეძლო და ამ კუთხით გუნდს მესამედგილოსან “ნაპოლიმდე” მხოლოდ ორი გოლი დააკლდა.

სამაგიეროდ, პრობლემები უკან იქმნებოდა. დაცვა რომ აშკარად არადამაჯერებელი იყო ამაზე გაშვებული გოლების რაოდენობაც მეტყველებს, მაროტამაც დირექტორთა საბჭოსთან ერთად სწორედ ამ პოზიციის გაძლიერებაზე უნდა იზრუნოს. მოტას მოედანზე ყოველი გამოჩენა ნამდვილი კატასტროფა იყო, ფაბიო გროსომ კი სულ მცირედით თუ შეძლო რაიმეს გამოსწორება. ამასთან ფეხბურთელების ნაკლებობის გამო კიელინის ფლანგზე გადაწევა უწევდა, როცა ფრედერიკ სორენსენი სრულაიდ ამოვარდნილი იყო თავისი ნამდვილი ამპლუიდან. მგონი რომ გამარჯვების გზაზე დასაბრუნებლად გუნდს სწორედ დაცვის გაძლიერება სჭირდება.

როგორც ჩანს, ეს არც მაროტას გამოჰპარვია მხედველობის არედან და უკვე გადმოიბირა “ლაციოდან” შტეფან ლიხტშტაინერი “სამპდორიელ” რეტო ციგლერთან ერთად. დე ჩელიეს დაბრუნების შემდეგ “იუვენტუსის” დაცვა გასულ სეზონთან შედარებით საგრძნობლად იქნება გაძლიერებული. მაგრამ ამაზე გაჩერება უბრალოდ დაუშვებელია. ამ სამთაგან რომელიმეს ტრავმა კონტესაც იმავე თავის ტკივილს გაუჩენს, რაც ჯიჯი დელ ნერის ჰქონდა.

მისცე “აგუეროს” სანაცვლოდ მადრიდის “ატლეტიკოს” 45 მილიონი უბრალო გადაწყვეტილება არაა, ფეხბურთელი ხომ იაფფასიანი პირადი კონტრაქტის გამო არ დატოვებს გუნდს. “იუვენტუსი” არც მადრიდის “რეალი”, არც “ჩელსი” ან მანჩესტერ სიტია”. გუნდმა სატრანსფერო თანხები ჭკვიანურად უნდა გაანაწილოს.

თავდამსხმელში ამხელა ინვესტიციების ჩადება შესაძლოა არასწორი გადაწყვეტილება აღმოჩნდეს, რა აზრი აქვს მანქანის ძრავის გაძლიერებას თუ მუხრუჭები არაა წესრიგში. თუ კონტეს გუნდს მოწინავე პოზიციებზე სურს დაბრუნება, მაშინ სატრანსფერო ობიექტებად ტოპ-კლასის მცველები და ფლეიმეიქერები უნდა იქცნენ, ფეხბურთელები, რომლებიც მატჩის ბედის წარმართვას შეძლებენ.

ასე რომ, თუ აგუეროს ყიდვის შანსი მართლაც არსებობს, გუნდი დაცვის გაძლიერებაზეც უნდა ფიქრობდეს, მხოლოდ ასე თუ შეძლებს “იუვენტუსი” “სერია ა” -ში ისევ მოწინავე პოზიციებისვის იბრძოლოს.

მომზადებულია ჟულიან დე მარტინისის სტატიის მიხედვით