როსი უფრო რეალურია!

კუნ აგუეროს სატრანსფერო ფასის გათვალისწინებით, რომელიც ნებისმიერ კლუბს შიშის ზარს დასცემდა, ოფიციალური “იუვენტუსი” “გეგმა ბედ” ჯიუზეპე როსის განიხილავს…

ჯიუზეპე როსი სერხიო აგუეროს, ალექსის სანჩესსა და კარლოს ტევესთან ერთად ევროპაში საუკეთესო იმ ფეხბურთელთა რიცხვში შედის, რომლებიც სავარაუდოდ საკუთარ კლუბებს დატოვებენ. გასულ სეზონში გატანილი 32 გოლისა და გაკეთებული ცხრა საგოლე პასის შემდეგ სულ უფრო და უფრო მეტი საუბრობს “ვილიარეალის” წარმატებაში იტალიელის განუსაზღვრელ როლზე. ამის პროპორციულად, ცხადია, ფეხბურთელის მიმართ ინტერესიც იზრდება.

ასეა თუ ისე, არის რამდენიმე მიზეზი, რატომაც როსის ისევ აპენინებზე უნდა ელოდნენ. აგუერომ “კოპა ამერიკაზე” ბოლოვიის კარში გატანილი ულამაზესი გოლით უკვე დაიწყო საკუთარი სატრანსფერო ღირებულების ზრდა. მის ტრიუმფს მალევე მოჰყვა მადრიდის “რეალის” ინტერესი, “ბარსელონასგან” ზურგშექცეული როსი კი დიდი კლუბის შემოთავაზებას ელის.

ბეპე მაროტას არ დაუმალავს, რომ ერთადერთი მიზეზი, რატომაც შეიძლება აგუერო “იუვენტუსმა” ხელიდან გაუშვას ფინანსური აუქციონი და ამ აუქციონზე კლუბის ნაკლები კონკურენტუნარიანობაა. ამას ემატება ის საჯარიმო თანხები, რომლის გადახდაც კონტრაქტის გაწყვეტისთვისაა საჭირო და თვითონ ფეხბურთელის პირადი ხელფასი. ასე რომ, ადვილი სავარაუდოა არგენტინელი ტურინელთა ინტერესს გარეთ დარჩეს, როსი კი პირიქით, სამშობლოს დაუბრუნდეს, მით უმეტეს, რომ მისი ყიდვისთვის საჭირო თანხის ოდენობა აგუეროსას ნამდვილად არ გადააჭარბებს. “ვილიარეალის” პრეზიდენტმა ისიც აღნიშნა, მიუხედავად იმისა, რომ კონტრაქტის მიხედვით ხელშეკრულების გაწყვეტა მხოლოდ 40 მილიონიანი შემოთავაზებისას შეიძლება, მოლაპარაკებებს 30 მილიონი ევროს შემთხვევაშიც დავიწყებთო.

მაგრამ აქამდე მიჩნეული როსის ყიდვის უმთავრესი პრეტენდენტი, “ბარსელონა”, იტალიელის სანაცვლოდ ამ თანხასაც არ იხდიდა და “წყალქვეშა ნავების” ფორვარდი მათი ინტერესების სფეროში აღარაა. კატალონიელების პრიორიტეტები ახლა ალექსის სანჩესი და “არსენალელი” ფაბრეგასი არიან. ეს ინფორმაცია ფეხბურთელის აგენტი ფედერიკო პასტორელოც რომ არა, ოფიციალურმა “ვილიარელმაც” დაადასტურა. კიდევ ერთი გუნდი, ვის სახელსაც როსის უკავშირებდნენ მადრიდის “ატლეტიკოა”, მაგრამ ეს უკანასკნელიც, “ბარსელონასი” არ იყოს, ფასის უკმაყოფილოა.

თუ “იუვე” როსის მიუბრუნდება, კონკურენციის გაწევა ისევ და ისევ იტალიური “ინტერისთვის” მოუწევს. მილანელთა ახალმა მწვრთნელმა ჯიამპიერო გასპერინიმ უკვე აღნიშნა საკუთარ რიგებში 24 წლის თავდამსხმელის ხილვის სურვილი. გასპერინის იტალიელი 2009-2010 წლის სეზონებზეც ესიმპათიურებოდა, შეგახსენებთ, მაშინ სპეციალისტი “ჯენოას” თავკაცი იყო.

როსის სასიამოვნო სიურპრიზები უყვარს. 2007 წელს “ვილიარეალში” პირველ ან მეორე კი არა, მესამეხარისხოვან ტრანსფერად გადაბარგდა და დღეს ნომერ პირველია მათ შორის, ვისი დაკარგვაც “ყვითლებს” არ სურთ. გასცემს თუ არა “იუვენტუსი” იტალიელზე ავანსებს, სულ რამდენიმე დღეში უნდა გავიგოთ…

მომზადებულია რობ პატონის სტატიის მიხედვით