ვუჩინიჩი: ” ჩვენ “იუვენტუსი” ვართ! “

მირკო ვუჩინიჩი ახალი “იუვენტუსის” ნაწილი გახდა. ჩერნოგორიელის ოფიციალურ პრეზენტაციაზე ფეხბურთელი საკმაოდ მოტივირებული ჩანდა. ბოლო თვეებში ტურინში ტოპ-კლასის ფეხბურთელის გადმობარგების შესახებ არაერთი გამოცემა იტყობინებოდა, აღმოჩნდება თუ არა ასეთი ვუჩინიჩი, დრო გვაჩვენებს…

“ სეზონი გვაჩვენებს ვარ თუ არა უმაღლესი კლასის ფეხბურთელი. მხოლოდ სიტყვა – “იუვენტუსი”, იმისთვის სრულიად საკმარისი აღმოჩნდა, რომ გადაწყვეტილება მიმეღო. როცა აგენტმა “ბებერი ქალბატონის” მხრიდან ინტერესის შესახებ შემატყობინა, ერთი წამითაც არ დავფიქრებულვარ. ჩემი მრავალწლიანი თავგადასავალი რომში დასრულებულია. მადლობა გადავუხადე როზელა სენსისა და კლუბის სხვა მაღალჩინოსნებს, მათი აზრი ჩემთვის ყოველთვის მნიშვნელოვანი იყო. მაგრამ ახლა მსოფლიოში ყველაზე პოპულარული იტალიური კლუბის ღირსებას ვიცავ. ”

კონტრაქტზე ხელმოწერის შემდეგ, ვუჩინიჩი პირდაპირ ვინოვოსკენ გაეშურა. ფეხბურთელი პირველივე დღეს აღმოჩნდა ანტონიო კონტეს დაქვემდებარებაში: ” კონტე მუშაობის უდიდეს სტიმულს გვაძლევს და იმედია, ის სეზონის ბოლომდე შენარჩუნდება. მწვრთნელს კონტრაქტის ხელმოწერისთანავე ვესაუბრე და ჩემზე საკმაოდ კარგი შთაბეჭდილება დატოვა. სატურნირო ცხრილის ზედა პოზიციებზე გუნდების განლაგებას ჩვენ უნდა ვკარნახობდეთ, რადგან “იუვენტუსი” ვართ. ვიცი, რომ “ჩემპიონთა ლიგის” მიღმა ვართ, თუმცა ეს ჩემთვის პრობლემა ნამდვილად არაა, დღეს “იუვე” ძლიერი გუნდია და ახალ სეზონში ევროთასებზე მოხვედრა არ გაგვიჭირდება. ”

” რაც შეეხება ნომერს, ცხრიანი იაკინტას ეკუთვნის და მეც 14 -ის აღება ვარჩიე. ამ ნომრით “ლეჩესა” და ეროვნული ნაკრების ღირსებას ვიცავდი. ” -განაცხადა ახალწვეულმა.

წყარო: “იუვენტუსის” ოფიციალური ვებ-გვერდი