ადმინისტრაცია თქვენს ყურადღებას ითხოვს

მოკლედ წარსულსა და მომავალზე…

ფრიულებზე მსაჯის პირველი სასტვენი მხოლოდ საფეხბურთო მატჩის დასაწყისის მანიშნებელი როდი იქნება. იტალიელმა არბიტრმა რომ იცოდეს, სწორედ იმ წამს აიღებს სტარტს სტუმარი გუნდის ქართული ფანკლუბის ახალი ოდისეა, ალბათ აპენინურ მზით დამწვარ ბეჭებზე დაწოლილი პასუხისმგებლობის ჭაპანი პირდაპირ მიწაში ჩაიტანდა. ერთგულ მომხმარებელს ემახსოვრება, იშვიათად, ახალი სეზონი შემაჯამებელი სტატიით არ დაწყებულიყო. ესეც რომ არა, ერთი ორი სიტყვის უთქმელად მივივიწყოთ უწინდელი საფეხბურთო წელი უსამართლობაც იქნება.

მოკლედ რომ ვთქვათ, ახალ წლამდე ჯახირ-ჯახირ, ბოგირ-ბოგირით მისული იუვენტუსი სეზონის მეორე ნახევარში პირველივე დაბრკოლებას გამოედო და ფეხი მოიმტვრია. ნელ-ნელა, სიდინჯით დაემშვიდობა ჯერ პირველ, შემდეგ მეორე, მესამე (და ასე მეშვიდემდე) ადგილის დაკავების შანსებს. გადიოდა დღეები მომავალი უქმეების მოლოდინში და ჩვენც ორშაბათ დილას სულ უფრო იშვიათად ვხვდებოდით სახეზე ღიმილით. სატურნირო ფსკერისკენ მიმავლებს სულზე მოგვისწრო სეზონის დასრულებამ და მეშვიდე ადგილზე გავჩერდით. ათასჯერ გაჩენილი იმედი ათასჯერვე მოისპო, ავად თუ კარგად სეზონი მივახრჩვეთ, მაგრამ ევროტურნირების მიღმა კი ამოვყავით თავი. მაგრამ, ქართველი კაცი რის ქართველი კაცია, ყველაზე უიმედო მდგომარეობასაც რომ არ უპოვოს პლიუსები: სამაგიეროდ, მთლიანად “სერია ა” -ზე ვიქნებით გადართულებიო -ამბობს ქართველი, იტალიელი კი თავს პირველივე ხეს ახლის და თავისთვის ქვას, მუცლისთვის კი სამართებლის ძებნას იწყებს. თუმცა ეს უკვე წარსულია, ამ შემთხვევაში კი არ აქვს მნიშნელობა რა იყო გუშინ, მთავარია რა იქნება ხვალ. იმედი ვიქონიოთ ხვალინდელი დღე უკეთესი იქნება, ვიდრე აწ უკვე დავიწყებული გუშინდელი…

მაგრამ ნამდვილი გულშემატკივრობა გასაჭირში მყოფი საყვარელი გუნდის გვერდში დგომაა, თორემ “ბარსა” “ბარსას” ძახილზე ადვილი რაა; ასეთები კი სანთლითაა საძებნი. რომ არ გაგიჭირდეთ, მოკლედ აგიხსნით როგორ უნდა იცნოთ. თქვენთვის თუ მიტასაობთ და ვიღაცას იუვეს ზედა აცვია, ამით არ იცნობა გულშემატკივარი, ასეთს გვერდით ჩაუარეთ. თუ ავტომობილის წინა სარკეზე უკიდია ვიღაცას იუვეს სურნელოვანი ემბლემა, ნერვებისმომშლელად რომ ტრიალებს და ქანაობს, შეიძლება არც მისი პატრონი იყოს ნამდვილი იუვენტინო, ისღა დაგრჩენიათ მასაც გვერდით ჩაუაროთ. კიდე გაივლით რამდენიმე ნაბიჯს და გაიგონებთ, ტოტალიზატორის შესავლელთან როგორ უმტკიცებს ერთი მსხვილი მეორე წვრილს და წვერებიანს სად დელ პიერო და სად რონალდოო, ამასაც გაუარეთ, სავარაუდოდ მანიპულატორი დემაგოგია. როცა ჭეშმარიტი გულშემატკივრის მოძებნის თითქმის იმედგადაწურული ავტობუსის გაჩერებაზე სკამზე მოკალათდებით და თავს ხელებში ჩარგავთ, მარტო დავრჩენილვარ დუნიაზე მე ერთიო, ეს იქნება და ეს, რომ იქვე ჯინსებიან ახალგაზრდას დალანდავთ, გუშინდელი ნადეპრესიებს თვალები გადმოკარკვლაზე ექნება, ცნობისმოყვარეობით მიუახლოვდებით და ნელ-ნელა მიხვდებით, რომ მისი პირის ცმაცუნი და უცნაური ბგერები სინამდვილეში ჩუმი ღიღინია: “იუვეეე, სტორია დი უნდ გრაანდე ამოოოორეეეე”, გაგრძელება აღარ იცის და სიტყვებს თვითონ იგონებს, მაგრამ ეს რაღა მოსატანია, ჩვენებმაც არ იციან ხოლმე სიტყვები მარა შინამანა კენაო, იმის კენა, ამის კენაო და ისეთ ჰიტებს ურახუნებენ, ნუ იტყვი! აუცილებლად მიდით მასთან და მაგრად ჩამოართვით ხელი! ხოდა კიდე, ჩვენი საიტი მოასწავლეთ, ვინიცობაა არ იცოდეს…

და თუმცა აქაც ხშირად ვუმტკიცებთ ხოლმე ერთმანეთს, არა მე მიყვარს მეტად იუვე, ვიდრე შენო, მაინც მგონია, ნამდვილი გულშემატკივრის გარდა ამდენწლიანი წარუმატებლობების შემდეგ ვერავინ შემორჩებოდა იუვენტუსს. მერამდენე წელია, იმედგაცრუების გარდა არაფერი გვინახავს, ხან ერთი უბადრუკი გუნდი გაგვთელავს, ხან მეორე, მაგრამ მაინც იმედით ველოდებით მსაჯის სასტვენს, ახალ შაბათ-კვირას, ახალ სეზონს. ამდენი ცვლილების მერე ყველას აქვს რაღაცის იმედი, მათაც კი ვინც კატეგორიულად განზე დგანან, არადა არ მჯერა დღევანდელი იუვესიო. საბრძოლო განწყობა იგრძნობა, იგრძნობა ესე იგი არის! თანაც, იუვენტუსი ხომ მხოლოდ ის თერთმეტი კაცი არაა, მინდორზე რომ დარბის, ეს ჩვენით იზომება იუვენტუსის სიძლიერე, კარგად დაიმახსოვრეთ, ბატონებო და ქალბატონებო, ეს ჩვენ ვართ იუვე!

ახლა კი საქმე ცოტა ხნით: ყველაფერთან ერთად, ვებ-გვერდს ბრძოლის ახალი ძალებით გასაახლებლად ახალი სისხლი სჭირდება. გვჭირდება ნებისმიერი მსურველი, ვისაც თუნდაც რამით შეუძლია ჩვენი დახმარება. კერძოდ კი მწერალი – ადამიანი, რომელსაც ეცოდინება მინიმუმ რუსული, მშობლიური ენის გარდა, ცხადია, სასურველია სხვა ენებიც. წინასწარ გამზადებულ ინსტრუქციებს სტატიის დადებასთან დაკავშირებით მიიღებს სურვილის გამოთქმის შემდეგ (გაითვალისწინეთ, ადმინისტრაცია იტოვებს უფლებას იმ შემთხვევაში, თუ არ მოეწონება თქვენი წერის მანერა, თქვენი უნარები, ჩამოგართვათ სტატუსი, თუმცა, ვეცდებით, ამისგან თავი შევიკავოთ). ადმინისტრაციის თხოვნაა, სურვილის ქონის შემთხვევაში არ დაიზაროთ, დაიხარჯოთ ჩვენი საყვარელი საიტისათვის. გახდით ერთიანი გუნდის წევრი, დავამტკიცოთ სიყვარული საქმით და პირადი გამოცდილებიდან გეუბნებით, ეს საქმე თქვენთვის გართობად და დასვენებად იქცევა.

არ დაივიწყოთ, ეს ჩვენ ვართ იუვე…