“ცუდი ბიჭები”

ბევრი ფეხბურთელია ისეთი რომელიც ცუდი ხასიათით, ხისტი თამაშით და ჩხუბით გამოირჩევა თანაგუნდელებისგან. სრულიადში გთავაზობთ იტალიური ფეხბურთის ე.წ. “ცუდი ბიჭების” ათეულს, რომელიც იტალიურმა გამომცემლობამ გაავრცელა. თანამედროვეობის ყველაზე ცნობილი საფეხბურთო პროვოკატორი მარკო მატერაცი ამ ათეულში მხოლოდ მეხუთე ადგილს იკავებს. ვინ არიან პირველ ხუთე­ულში, ძნელი მისახვედრი არ უნდა იყოს. ათეულში არის ტურინის “იუვენტუსის” ყოფილი 5 ფეხბურთელი…

10. ჯორჯო კანალია

თავის დროზე კანალია რომში პაპზე უფრო პოპულარული ადამიანი იყო. თუ პაპს გაზეთები მხო­ლოდ მესამე გვერდს უთმობდნენ, კანალიას პოპულარული გამოცემების პირველ გვერდზე ადგი­ლი გარანტირებული ჰქონდა. ჯორჯო “ლაციოში” 1969-დან 1976 წლამდე თამაშობდა და 98 გოლი გაიტანა. კანალიას წყალობით “ლაციომ” 1974 წელს სკუდეტოც მოიგო. ეს ფეხბურთელი, კარგი თა­მაშის გარდა, ჭირვეული ხასიათითაც გამოირჩეოდა. სწორედ ამის გამო არ აეწყო მისი კარიერა იტალიის ნაკრებში. მსოფლიო ჩემპიონატზე, იტალია-ჰაიტის მატჩში, “სკუადრა აძურას” თავკაცმა კანალია შეცვალა. განრისხებულმა ფეხბურთელმა ჯერ მწვრთნელს დაარტყა, შემდეგ კი გასახდელ­ში დიდი აურზაური მოაწყო. კანალიამ იტალიის ნაკრებში სულ 14 მატჩი გამართა. ჯორჯო კარიე­რას ამთავრებდა ამერიკულ “კოსმოსში”, სადაც პელესთან წაჩხუბება მოახერხა.

9.კრისტიან ვიერი

საუკუნეების მიჯნაზე მსოფლიოში ვიერიზე ძლიერი ცენტრფორვარდი შეიძლება არც არსებობდა. 2004 წლის ევროპის პირველობის შემდეგ კრისტიანის საფეხბურთო ვარსკვლავი ჩაესვენა. მას და­ძაბული ურთიერთობა ჰქონდა მედიასთან. ერთხელ “ბობომ” ჟურნალისტებს უთხრა: “მე უფრო მა­გარი კაცი ვარ, ვიდრე თქვენ, ყველანი ერთად”. “ინტერში” თამაშისას კლუბის მესვეურებთან ჰქონ­და კონფლიქტი და გატანილ გოლებს არ აღნიშნავდა. კრისტიანი ცნობილი მექალთანეც იყო. რო­გორც ამბობენ, მას თითქმის ყველა ცნობილ და პოპულარულ იტალიელ მანდილოსანთან ჰქონდა რომანი. მისი საყვარლებიდან მხოლოდ ელისაბედ კანალისისა და მელისია სატას დასახელებაც კმარა.

8.ფრანჩესკო ფლაკი

უნიჭიერესი ფორვარდი, რომელმაც საკუთარი კარიერა დაანგრია. ფლაკის უდიდეს მომავალს უწინასწარმეტყველებდნენ, მაგრამ თავს ვერ მოერია. ორთვიანი დისკვალიფიკაცია მიიღო აზარ­ტული თამაშების სიყვარულისთვის, შემდეგ კი კოკაინის გამო ორწლიან დისკვალიფიკაციას გა­მოჰკრა ხელი. 2009 წელს ფეხბურთს დაუბრუნდა და დეკემბერში კოკაინზე კიდევ ერთხელ გამოი­ჭირეს. მას 12-წლიანი დისკვალიფიკაცია მისცეს, რაც კარიერის დასრულებას ნიშნავდა.

7.პასკუალე ბრუნო

კლაუდიო ჯენტილეს შემდეგ ბრუნო ერთ-ერთ ყველაზე ხისტ მცველად ითვლებოდა. სათამაშო სტილის გამო მეტსახელად “ცხოველი” შეარქვეს. “იუვენტუსის”, “ტორინოსა” და “ლეჩეს” ყოფილი ფეხბურთელი ერთხელ მსაჯის ცემისთვის იყო დისკვალიფიცირებული. იმ დროს, როცა პასკუა­ლე მინდორზე მსაჯს ცემდა, თანაგუნდელებმა მისი დაშოშმინება სცადეს და… მსაჯთან ერთად გაილახნენ. იტალიიდან ბრუნო შოტლანდიაში გადაბარგდა და იქ ნამდვილ საკულტო ფიგურად იქცა. ბრუნო კარიერის დასრულების შემდეგაც იქცევდა ყურადღებას. არც ისე დიდი ხნის წინ მან იბრაჰიმოვიჩის შესახებ თქვა: “ნეტავ ახლა ვთამაშობდე, მაგ თქვენს ზლატანს ჭკუას ვასწავლი­დი”.

6.ომარ სივორი

სივორი მხოლოდ ყველა დროის ერთ-ერთი საუკეთესო ფეხბურთელი როდია. 1961 წლის ევრო­პის საუკეთესო ფეხბურთელად დასახელებული სივორი უჟმური ხასიათით გამოირჩეოდა. “იუვენტუსში” გატარებული შვიდი წლის განმავლობაში სივორი ათჯერ გააძევეს მინდვრიდან. სა­მოციანი წლების მარადონად წოდებულმა სივორიმ 1965 წელს მწვრთნელთან ჩხუბის გამო დატო­ვა ტურინის “იუვენტუსი”.

5.მარკო მატერაცი

თანამედროვე ფეხბურთის მთავარი პროვოკატორი. ყველას კარგად ახსოვს “მატრიცას” გამოხდო­მები. მისი “დამსახურებაა”, რომ ზიდანის საფეხბურთო კარიერა მსოფლიო ჩემპიონატის ფინალ­ში მიღებული წითელი ბარათით დასრულდა.

4.მარიო ბალოტელი

ის მხოლოდ 20 წლისაა და თითქმის მთელი საფეხბურთო სამყარო გადაიმტერა. განელი ემიგრან­ტების ოჯახში დაბადებულმა ჭირვეული ხასიათის გამო ვერც “ინტერში” მოიკიდა ფეხი და ალ­ბათ “სიტის” დატოვებაც მოუწევს. ბალოტელის გამონათქვამები მუდამ ხდება მედიის განსჯის სა­განი. “კრიშტიანუ რონალდუ? ადამიანი, რომლისაც არ მესმის”, – ასე მოიხსენია პორტუგალიელი ბალოტელიმ. როდესაც მარიო ინგლისში ჩავიდა, “არსენალის” ახალგაზრდა ფეხბურთელ ჯეკ უილშირზე მთელი ბრიტანეთი აღტაცებით ლაპარაკობდა, ბალოტელიმ კი თქვა: “ვინ უილშირი? ასეთი ფეხბურთელიც არებობს?”

3.პაულო დი კანიო

ერთ-ერთი საუკეთესო იტალიელი ფეხბურთელი, რომელიც იტალიის საზღვრებს მიღმა თამაშობ­და. მისი სანაკრებო კარიერა კი ჭირვეული ხასიათის გამო არ აეწყო. პაულო “იუვენტუსმა” მას შემდეგ გაყიდა, რაც ახალგაზრდა ფეხბურთელმა მწვრთნელ ჯოვანი ტრაპატონისთან იჩხუბა. იტალიიდან დი კანიომ ინგლისს მიაშურა და იქ ნამდვილ ვარსკვლავად იქცა. “შეფილდისა” და “არსენალის” მატჩში მსაჯმა პოლ ალკოკმა ის მინდვრიდან გააძევა. დი კა­ნიომ ვერ მოითმინა და მსაჯი მინდორზევე გალახა. “ვესტ ჰემში” დი კანიო ნამდვილ ლეგენდად ჩამოყალიბდა. საფეხბურთო კარიერას პაულო იტალიაში, კერძოდ, “ლაციოში” ამთავრებდა და აქაც გამოიჩინა თავი, როდესაც გულშემატკივრებს ფაშისტური ჟესტიკულაცით მიესალმა.

2.კლაუდიო ჯენტილე

ფეხბურთის ისტორიაში ერთ-ერთი ყველაზე ხისტი მცველი. 1982 წლის მუნდიალზე თამაშისას მან ჯერ მარადონას შემოახია მაისური, შემდეგ – ზიკოს. ლეგენდარულმა არგენტინელმა ფეხბურ­თელმა, 1978 წლის მსოფლიო ჩემპიონმა, მარიო კემპესმა ჯენტილეს შესახებ თქვა: “ფორვარდი სა­პირფარეშოშიც რომ წავიდეს, ჯენტილე მას ბოლომდე მიჰყვება”. “იუვენტუსთან” ერთად ჯენტილემ ექვსჯერ მოიგო სკუდეტო და ტურინული კლუბის კერპად იქ­ცა. არსებობს ერთი ლეგენდა: როდესაც კევინ კიგანს ევროპის საუკეთესო ფეხბურთელის ტიტუ­ლით აჯილდოებდნენ და ბრიტანელი “ოქროს ბურთის” მისაღებად მიდიოდა, ჯენტილემ ჩასჩურ­ჩულა: “ჩემს წინააღმდეგ რომ გეთამაშა, შენ ვერც ერთ ტიტულს ვერ მოიგებდი”.

1.ანტონიო კასანო

ამ ერთგვარ რეიტინგში პირველობას არავის უთმობს ანტონიო კასანო. 1982 წელს იტალიის ნაკრებ­მა მსოფლიო ჩემპიონატის ფინალში გერმანიის ნაკრები დაამარცხა, მეორე დღეს კი სამყაროს ან­ტონიო მოევლინა. 17 წლის ასაკში ის უკვე ვარსკვლავი იყო, თუმცა საშინელი ხასიათის გამო კა­რიერა ვერ აეწყო. არც ისე დიდი ხნის წინ ანტონიომ გამოსცა ავტობიოგრაფიული წიგნი “ყველაფერს გეტყვით”, რო­მელშიც აღიარებს, რომ თითქმის ყველა მწვრთნელი, რომელთანაც უმუშავია, ნაგინები ყავს. წიგნში კასანომ ისიც გაგვიმხილა, რომ 25 წლის ასაკში უკვე 600 ქალი ჰყავდა “გასინჯული”. სწო­რედ ამის გამო არ აეწყო მისი კარიერა “რეალში”. “სამეფო კლუბის” მესვეურებისთვის ცნობილი გახდა, რომ ყოველი თამაშის წინ სასტუმროში კასანოს ახალგაზრდა გოგონები აკითხავდნენ. 2010 წლის მუნდიალზე კი ანტონიო მხოლოდ იმის გამო ვერ გაემგზავრა, რომ ღამის ბარში მარჩელო ლიპის ვაჟი დავიდი უმოწყალოდ ცემა. ანტონიოს დასახასიათებლად ერთი ეპიზოდი კმარა: საკუ­თარ სოფელში მან მოპედი მოიპარა. და ეს მოხდა მას შემდეგ, რაც “რომასთან” მარავალმილიონია­ნი კონტრაქტი გააფორმა.