კონტე: ” კიდევ და კიდევ მუშაობა! “

კონტე გულშემატკივარს მოთმინებისკენ კიდევ ერთხელ მოუწოდებს. დღეს “იუვენტუსმა” რიგით მეორე შეხვედრა დაასრულა ფრედ, ანტონიო კონტეს გუნდი 49-ე წუთამდე აგებდა, სანამ მილოშ კრასიჩის დარტყმის წყალობით არ გაქვითა ბერგესიოს გოლი…

“წინ გრძელი გზა გვაქვს გასავლელი, რადგან, როცა წინა სეზონს მეშვიდე პოზიციაზე ასრულებ, წელს “სკუდეტოსთვის” ვერ იბრძოლებ. ვიცით, რომ ბევრი გუნდი ჩვენზე უკეთეს ფორმაშია. მიწაზე უნდა დავრჩეთ და მუშაობა გავაგრძელოთ, მიუხედავად იმ პოზიციისა, რომელსაც სატურნირო ცხრილში ვიკავებთ. “სკუდეტოზე” საუბრით არავისთან გაჯიბრება არ გვსურს. არასწორი იქნებოდა, გვეთქვა, რომ გოლი დაცვის შეცდომით გავუშვით, გონსალო ბერგესიო ბურთზე დასასწრებად კარგად გაისარჯა. ამ ეპიზოდის ანალიზსა და დასკვნების გამოტანას ვეცდებით, როგორც ამას ყოველთვის ვაკეთებთ ხოლმე. “

” რაც შეეხება ტაქტიკას, პირლო, მარკიზიო, ვიდალი, მარონე და პაციენცა როტაციის საშუალება გვაძლევენ, რაც მეტოქეებს ჩვენი ტაქტიკის განსაზღვრის შანსებს უმცირებს . ვიცი, რომ ამ ალტერნატივების გამოყენება შემიძლია და თანაც არა მხოლოდ მატჩის სტარტში.  ჩემი ბიჭების თამაშით კმაყოფილი ვარ, რადგან ქულების დათმობა ნამდვილად არ სურდათ, ჩვენი სლოგანი არ იცვლება: უნდა ვიმუშაოთ! საკუთარი თავის მოტყუება არ შეიძლება, შეცდომაში არც ფანები უნდა შევიყვანოთ, რადგან ზოგჯერ ჭორები მეტად გტკენს გულს, ვიდრე შედეგი. “ -აცხადებს კონტე.

წყარო: “იუვენტუსის” ოფიციალური ვებ-გვერდი