ახალი სამხილები “კალჩიოპოლის” საკითხზე

ათი დღის წინ ლუჩიანო მოჯიმ განაცხადა, რომ ისეთი სამხილების წარდგენას აპირებდა, რაც სრულიად შეცვლიდა სასამართლო პროცესის შედეგებს. გუშინ მოჯის ადვოკატებმა პაოლო ბერგამოსა და პასკუალე როდომონტის ახალი სატელეფონო ჩანაწერები წარადგინეს. როგორც მოგეხსენებათ, ბერგამო იტალიის შიდა ჩემპიონატში მსაჯთა დანიშვნას კურირებდა, როდომონტი კი უბრალო არბიტრი იყო. პირველი საუბარი 2004 წლის 26 ნოემბერს შედგა, მეორე კი ორი დღის შემდეგ, “იუვენტუსისა” და “ინტერის” დაპირისპირებამდე სამი საათით ადრე. ამ დროისათვის “იუვე” მდევარს 15 ქულით უსწრებდა და “სერია ა” -ში პირველ პოზიციაზე იყო განთესილი…

ბერგამო: გუნდებს შორის 15 ქულაა სხვაობა, შეხვედრისთვის ფსიქოლოგიურად კარგად მოემზადეთ.

როდომონტი: ყველაფერი კარგადაა, მშვიდად ვარ.

ბერგამო: თქვენი საქმე გააკეთეთ, მაგრამ რაიმე ეჭვი თუ გაჩნდა, იმ გუნდის სასარგებლოდ გადაწყვიტეთ, რომელიც ჩამორჩება და არა ლიდერის. გასაგებია?

რ. : კარგი, გპირდები, ყველაფერი კარგად იქნება.

ბ. : ოღონდ ეს მხოლოდ ჩვენ ორს შორის დარჩეს. ალბათ იცით, მწვერვალამდე ასვლა რა ძნელია და ფსკერზე დაბრუნება თქვენი მხრიდან სისულელე იქნებოდა. თქვენ ხომ ჭკვიანი ადამიანი ხართ.

რ. : კარგით, ყველაფერი გასაგებია.

ეს სატალეფონო ზარი ბერგამოსა და კარაროს შორის ცოტა უფრო ადრინდელი საუბრის შედეგი იყო, სადაც იტალიის ფეხბურთის ფედერაციის ყოფილი პრეზიდენტი (კარარო) ამბობს: ეს ძალიან მნიშვნელოვანი შეხვედრაა, “ლეგა კალჩოში” ( იგულისხმება “ლეგა კალჩოს” სხდომა, რომელიც მატჩის შემდეგ უნდა გამართულიყო) ძალიან დელიკატური მდგომარეობაა. ღვთის გულისათვის, ისეთი არბიტრი დანიშნეთ, რომელიც “იუვენტუსს” არ დაუჭერს მხარს. მსაჯობა სამართლიანი უნდა იყოს, მაგრამ “იუვეს” სასარგებლოდ შეცდომა არ დაუშვათ. ”

“კალჩიოპოლის” საკითხზე სასამართლო სხდომები ნეაპოლში ამჟამადაც მიმდინარეობს.

წყარო: tuttosport