ვის დაიმატებს და ვის გაასხვისებს ჯუზეპე მაროტა ?

იანვრის სატრანსფერო ფანჯრის გახსნამდე სულ უფრო და უფრო ცოტა დრო რჩება, ჯუზეპე მაროტა და მისი თანაშემწეები კი ცდილობენ, რაც შეიძლება მალე მიაღწიონ დასახულ მიზნებს.ფაქტია, ბიანკონერები რამდენიმე ტრანსფერს განახორციელებენ, მაგრამ მთავარი ისაა, რომელ პოზიციებს გააძლიერებენ ისინი.

მარკო ბორიელოსადმი ინტერესის შესახებ სპორტული პრესა უკვე კარგა ხანია წერს, მეტიც, იტალიელ ფორვარდს ტურინულ გრანდამდე ერთი ნაბიჯი აშორებს, ტრანსფერის დეტალები სავარაუდოდ უახლოეს დღეებში მოგვარდება.მაროტა “მილანის” ყოფილ ფეხბურთელს ან 8 მილიონად შეიძენს, ან 1 მილიონად 6 თვიან არენდას გაუფორმებს.როგორც გაცნობეთ, ანტონიო კონტეს ბორიელოს წაყვანა დუბაიში, ზამთრის შეკრებაზე სურს, აქედან გამომდინარე ლოგიკურია, რომ ტრანსფერისთვის სკაუტების განკარგულებაში სამი დღეა, რადგან უკვე 30 დეკემბერს, ბიანკონერები შორეულ გაერთიანებულ საამიროებს ეწვევიან.

პირლოს, მარკიზიოსა და ვიდალისგან შემდგარი ნახევარდაცვა მიმდინარე სეზონში მართლაც საუცხოოდ გამოიყურება, თუმცა ტურინელები მინიმუმ ერთი ნახევარმცველის დამატებას როგორც სჩანს, მაინც აპირებენ.ერთ-ერთ მთავარ სამიზნედ რიკარდო მონტოლივო სახელდება, მაგრამ რამდენად დათანხმდება იების ყოფილი კაპიტანი ტურინელთა შემოთავაზებას, მეორე საკითხია.გარდა მონტოლივოსა, ტურინელთა რადარზე იმყოფება ანჯელო პალომბოც, რომელიც სერია B – ში გავარდნილი “სამპდორიას” დატოვებასთან ძალზედ ახლოსაა.განიხილება “შტუდგარტის” შუახაზელის, ზდრავკო კუზმანოვიჩის ვარიანტიც.დაცვის გაძლიერების უმთავრესი კანდიდატი მარტინ კასერესი რომ არის, სიახლეს არავისთვის წარმოადგენს.”სევილიას” ცენტრალური მცველისადმი ინტერესს ბიანკონერები რამდენიმე თვეა იჩენენ და გასაკვირი არ იქნება, იანვრის დასაწყისშივე ურუგვაელი ტურინულ გრანდში თუ ჩაერიცხება.

რაც შეეხება გუნდიდან წასვლის პირას მყოფ ფეხბურთელებს, მათი რიცხვიც საკმაოდ მაღალია.უპირველეს ყოვლისა, მაროტა – პარატიჩის დუეტი შემტევი ხაზის შეთხელებას აპირებს, ამისთვის კი გუნდი სამმა ფორვარდმა უნდა დატოვოს.კარვალიო ამაურის დღეები ტურინის “იუვენტუსში” დათვლილია, უკანასკნელი ინფორმაციით, მაროტამ ბრაზილო – იტალიელი “ჯენოას” შესთავაზა და სავარაუდოდ, ეს ტრანსფერიც მალე მოგვარდება.ვინჩენცო იაკინტასადმი ინტერესს ძალიან ბევრი გუნდი იჩენს, მათ შორისაა “სიენა”, “ნოვარა”, “ლეჩე”, “ფიორენტინა” და “ჩეზენა”. ლუკა ტონი კი, კარიერას სავარაუდოდ საზღვარგარეთ განაგრძობს.ჯერ – ჯერობით უცნობია, დატოვებს თუ არა გუნდს წელიწადნახევრის წინ 15 მილიონად შეძენილი მილოშ კრასიჩი, თუმცა ევროპული გრანდების ინტერესი მის მიმართ ნამდვილად არსებობს.ფავორიტი სერბისთვის ბრძოლაში ლონდონის “ჩელსია”, თუმცა სახელდება მილანური “ინტერის” ვარიანტიც.

წყარო : Tuttojuve