ფანკლუბი სამი წლისაა!

ტურინის “იუვენტუსის” ქართული ფანკლუბი სამი წლისაა. სამი წლის წინ “იუვენტუსის” ქართველმა ქომაგებმა მეგობარი იუვენტინოების შეძენის მიზნით მსოფლიოს საუკეთესო გუნდის ქართული ფანკლუბის შექმნა განიზრახეს…

სამი წლის წინ “იუვენტუსის” ქართველმა ქომაგებმა მეგობარი იუვენტინოების შეძენის მიზნით მსოფლიოს საუკეთესო გუნდის ქართული ფანკლუბის შექმნა განიზრახეს. ამ სამი წლის მანძილზე საოცრად გაიზარდა ქომაგთა ქართული საძმო, შეიქმნა საფეხბურთო გუნდი და დაიწყო მნიშვნელოვანი თამაშების ერთად ყურების ორგანიზებაც. მრავალჯერ შეიცვალა ვებ-გვერდის დიზაინი, მაგრამ ის ჩვენი ინტერნეტ-ბრაუზერების სწრაფი ძიების წიგნაკებში მუდამ სათანადო ადგილს იკავებდა, იყო გულშემატკივრების მუდმივი შეკრების ადგილი და მყუდრო სახლი, უფრო მეტი ვიდრე ვირტუალური სამყარო. ამ დროის მანძილზე ბებერ ქალბატონს არაფერი მოუგია, თუმცა ენთუზიასტები ისევ გვერდში ედგნენ ჩვენს საიტს და უზრუნველყოფდნენ ჩვენს ლიდერობას სპორტულ ინტერნეტ სივრცეში,ლიდერობას ინფორმაციის მოწოდების სისწრაფითა და, რაც მთავარია, მოძმე ქართული თუ უცხოური პორტალებისგან განსხვავებით, მისი სიზუსტით. ახლა, როცა ჩვენი გუნდი იბრუნებს კუთვნილს, მინდა მადლობა გადავუხადო ყველა მწერალსა თუ რედაქტორს გაწეული უანგარო შრომისათვის მაშინაც კი, როცა შიშველი ენთუზიაზმის ძალით პირადი მდგომარეობის მიუხედავად, არასდროს ივიწყებდა ჩვენს საიტს და ეწეოდა “იუვენტუსის”, ანუ თავდადების, “იუვენტუსის”, ანუ ერთგულების, “იუვენტუსის, ანუ ღირსების პროპაგანდას. და, რა თქმა უნდა, მადლობა ჩვენს ყოველდღიურ მრავალრიცხოვან სტუმრებს მთელი საქართველოს და არა მხოლოდ ჩვენი ქვეყნის მასშტაბით, ჩვენ არასოდეს გატყუებთ, არ დაივიწყოთ, სწორედ თქვენ და ჩვენ ვართ “იუვე”. ForzaJuve.Ge -ს ადმინისტრაცია.