კონტე : “სტადიონზე განუმეორებელ ატმოსფეროს ველი”

ანტონიო კონტე ბებერი ქალბატონის ტიფოზებს აქტიურობისკენ მოუწოდებს.წინასამატჩო პრესკომფერენციაზე მთავარმა მწვრთნელმა “კალიარისთან” მატჩის განსაკუთრებულობას გაუსვა ხაზი : “მინდა იუვენტუს არენაზე განუმეორებელი ატმოსფერო სუფევდეს.ფეხბურთელებს ეს ძალიან სჭირდებათ.ხვალ რთული მატჩი გველის, მაგრამ დარწმუნებული ვარ, გულშემატკივრები ჩვენი მეთორმეტე ფეხბურთელი იქნებიან.”

გასულ კვირას ტურინელებმა “ლეჩე” დაამარცხეს და “მილანთან” ერთად კიდევ უფრო განიმტკიცეს ლიდერობა.ხვალ როსონერი მოსისხლე მტერს, მილანის “ინტერს” დაუპირისპირდება, თუმცა კონტესთვის დერბი მეორეხარისხოვანია : “უპირველეს ყოვლისა, “კალიარისთან” გამარჯვებაზე ვფიქრობ.ჩვენი მეტოქე კარგ ფორმაში იმყოფება, მათ “ჯენოა” 3-0 დაამარცხეს, ჩვენ კი გენუელებს ფრედ ვეთამაშეთ.”

ანტონიო კონტეს ბიანკონერებში დაბრუნება ტურინელი ტიფოზებისთვის განსაკუთრებული ფაქტია, რამეთუ “იუვენტუსი” მიმდინარე სეზონში არცერთხელ არ დამარცხებულა : “სიურპრიზს არავისთვის არ წარმოვადგენთ, ეს იმ თამაშებშიც იგრძნობა, რომელსაც მოწინააღმდეგეები ჩვენს წინააღმდეგ აჩვენებენ.ერთის მხრივ კარგია, გუნდი მეტად თავდაჯერებულია, თუმცა მეორეს მხრივ, “იუვესთან” დაპირისპირება ნებისმიერი გუნდისთვის დამატებითი მოტივაციაა.”

სარდინიელებთან მატჩს დისკვალიფიკაციის გამო ჯორჯო კიელინი გამოტოვებს.გავრცელებული ინფორმაციის თანახმად, დაცვის მარცხენა ფლანგს პაოლო დე ჩელიე დაიკავებს : “შემიძლია გითხრათ, რომ მარცხენა ფლანგზე ჩემი ფავორიტი პაოლო დე ჩელიეა, მაგრამ ჩემს მიერ შექმნილ ახალ სქემაში მას უფრო სათადარიგოთა სკამზე უწევს ჯდომა.დარწმუნებული ვარ, იგი “კალიარის” წინააღმდეგ იასპარეზებს.თუმცა მაქვს მეორე ვარიანტიც, მარსელო ესტიგარიბია.პაოლოსგან განსხვავებით, იგი შედარებით ნაკლებად ითვისებს დაცვით ფუნქციებს და აქტიურად უტევს, ამიტომ იმ გუნდების წინააღმდეგ, რომლებიც ჩაკეტილ ფეხბურთს თამაშობენ, მარსელოს გამოყენებაც შემიძლია.“

ინტერვიუს ბოლოს ანტონიო კონტე მარკო ბორიელოსაც შეეხო : “მარკო მხოლოდ 1 კვირის წინ შემოგვიერთდა და მას დრო სჭირდება, რათა ფორმა აღიდგინოს.ჯერ კიდევ არ გადამიწყვიტავს, იქნება თუ არა იგი განაცხადში.პროტესტი მისი მისამართით ? – გულშემატკივრების მესმის, მაგრამ უკვე განვაცხადეთ, რომ ეს ის ფეხბურთელია, რომელსაც არასდროს უთქვამს “იუვენტუსისთვის” უარი.მაქსიმალურ ყურადღებას ველი, დარწმუნებული ვარ, გულშემატკივრები ჩვენს გვერდით იქნებიან.“

წყარო : Juventus.com