ანტონიო კონტეს წინასამატჩო პრესკონფერენცია

ანტონიო კონტე მომავალი მატჩის მნიშვნელობას სრულად აცნობიერებს. ხვალ “ბიანკონერები” იტალიის თასის მეორე ნახევარფინალურ შეხვედრაში “მილანს” დაუპირისპირდებიან. 42 წლის სპეციალისტი ოპტიმისტურადაა განწყობილი…

” ამ ტურნირს ჩვენთვის უდიდესი მნიშვნელობა აქვს, ქვეყნის შიგნით ხომ მხოლოდ ამ ორი ტიტულის მოგება შეიძლება, “სერია ა” და იტალიის თასი. საოცარი მატჩისწინა განწყობაა, ახალგაზრდებიც მთლიანად არიან ჩართული მზადებაში და ეს ძალიან მახარებს. ამას უნდა შეეჩვიონ, მომავალში ხშირად აღმოჩნდებიან ანალოგიურ მდგომარეობაში. ახლა ხვალინდელ დაპირისპირებაზე ვფიქრობთ, ის ჩვენი შანსია, მოვიპოვოთ თასი, და, შესაბამისად, ყველაზე მნიშვნელოვანი შეხვედრაც. იმედია, მომავალში ასეთები ბევრი გვექნება. ”

” დელ პიერო? ჩემს პირველივე პრესკონფერენციაზე ვთქვი, რომ ის და ბუფონი გადამწყვეტი ფიგურები არიან გუნდში. ამას მთელი სეზონის განმავლობაში ამტკიცებენ და მომავალშიც ასე იქნება. ხვალ მისი ძლიერი ხასიათი, გამარჯვების სურვილი და უდიდესი გამოცდილება გაგვაძლიერებს. დარწმუნებული ვარ, ეს დელ პიეროს დღე იქნება. ”

” კარში სტორარი იდგება, იტალიელის ნდობა ნამდვილად შეიძლება, სკამზე ადგილს მანინგერი დაიკავებს. ავსტრიელს ვერასდროს გადავუხდი მადლობას იმისათვის, რასაც აკეთებს. თამაშის შანსი არ მისცემია, ამის სიამოვნებას მოკლებულია, თუმცა ისიც და მარკოც გასახდელში თავის განსაკუთრებულ როლს თამაშობენ. ”

” სათამაშო ფორმაციის ორი შესაძლო ვარიანტი გვაქვს, ფეხბურთელები საშუალებას მაძლევენ, ის თამაშის მიმდინარეობის დროსაც შევცვალო. მთავარი – ეს აქამდეც მითქვამს – განწყობა და მენტალიტეტია, ფორმაცია მეორე ადგილზეა. მაქსიმუმი უნდა გავიღოთ და ვნახოთ, რას მოგვიტანს ეს. ჩემს ფეხბურთელებს ყოველთვის ამისკენ მოვუწოდებ, სეზონის დასასრულს სანანებელი არაფერი არ უნდა გვქონდეს. თუ არაფერს ვინანებთ, ესე იგი მიზნის მისაღწევად გაწეული შრომისთვის არაფერი დაგვიკლია. ” -აცხადებს კონტე.

წყარო: “იუვენტუსის” ოფიციალური ვებ-გვერდი