მაროტა: ” ჩვენ “ცუდი ბიჭების” ადგილი არ გვაქვს “

ტურინში ამ ეიფორიას დიდი ხანი ელოდნენ. დღესასწაულის მონაწილეები მხოლოდ გულშემატკივრები კი არა, გუნდის ხელმძღვანელებიც არიან. ბეპე მაროტა მიღწეულ წარმატებაზე ჟურნალისტებთან აღტაცებით საუბრობს და კლუბის სატრანსფერო მომავალს განიხილავს…

” არც კი მიძინია, დიდი აღტაცებაა ჩვენს ირგვლივ. წარმოუდგენელ მიზანს მივაღწიეთ, ამაზე სეზონის დასაწყისში არავის უფიქრია. რამდენიმე კომპონენტის შეთანხმებული სწორი მუშაობით ოცნება რეალობად ვაქციეთ. ანტონიო კონტეს ფაქტორი გადამწყვეტი იყო, ჩვენი რესურსები მან მაქსიმალურად გამოიყენა. ”

” რაც შეეხება სატრანსფერო ფანჯარას, უნდა გავითვალისწინოთ, რომ “სკუდეტო” მოვიგეთ, რადგან ეს გუნდი დიდებულია პრიმა დონას გარეშეც. გუნდი აუცილებლად უნდა გაძლიერდეს, მაგრამ ისე, რომ ეს ბალანსი არ დაირღვეს. პრესაში მსოფლიო დონის ფეხბურთელებზე საუბრობენ, მაგრამ ჩვენ მხოლოდ კარგი ფეხბურთელები კი არა, კარგი ადამიანები გვჭირდება. არ გვინდა ის ყველაფერი დაიკარგოს, რაც ამ წელს შევქმენით, გუნდი, რომელიც მუდამ ძალიან ბევრს შრომობს და არასოდეს ნებდება. “ცუდი ბიჭებისთვის” ადგილი არ გვაქვს. ”

” ვან პერსი? მსოფლიოში ერთ-ერთი ყველაზე სრულყოფილი ფეხბურთელია, მაგრამ “არსენალთან” კიდევ ერთწლიანი კონტრაქტი აკავშირებს და მეც მხოლოდ აზრის გამოხატვა შემიძლია. კონკრეტული გვარების დასახელება არ მინდა, ეს ამ ფეხბურთელებისა და მათი კლუბების მიმართ უპატივცემულობა იქნებოდა. ბორიელოს გამოსყიდვის საშუალება 20 ივნისამდე გვაქვს, ამ დროში მოცემულ საკითხზე უნდა ვიმსჯელოთ. თავიდან პრობლემები შეექმნა, მაგრამ შემდეგ ძალიან დაგვეხმარა. კონტეს ყოველთვის ჰქონდა მის მიმართ სიმპათიები. ”

” რაც შეეხება ელიას, შეიძლება უცნაურად მოგეჩვენოთ, მაგრამ ეს ერთი წელი გუნდის ნაწილად ქცევის კუთხით, მისთვის ძალიან მნიშვნელოვანი იყო. “სერია ა” “ბუნდესლიგისგან” განსხვავდება და მიდგომის შეცვლის აუცილებლობას თავადაც გრძნობდა. უდაოდ სჭირდება მუდმივი სათამაშო დრო. გვიხარია, როცა ვეხმარებით ჩვენს ფეხბურთელებს მაშინ, როცა ეს სჭირდებათ. მაგრამ იტალიის თასის ფინალამდე არანაირი შეხვედრა არ იგეგმება. ”

წყარო: football italia