მაროტა ტრანსფერებზე საუბრობს (ვრცელი ინტერვიუ)

“კორიერე დელო სპორტთნ” საუბარში ბეპე მაროტამ ვრცლად ისაუბრა იმ გეგმებზე, რომლით ხელმძღვანელობასაც გუნდი ზაფხულის სატრანსფერო პერიოდის განმავლობაში აპირებს. “სამპდორიას” ყოფილი დირექტორი მნიშვნელოვანი ნაბიჯების გადადგმას გეგმავს…

” გვინდა რომ შემადგენლობა უფრო გაიზარდოს, რადგან მომავალ სეზონში მეტი შეხვედრის ჩატარება მოგვიწევს, ვიდრე წელს ჩავატარეთ. ამავე პრობლემაზე უკვე დაიწყეს მუშაობა ანტონიო კონტემ და მისმა შეგირდებმაც, ეძებენ ვარჯიშის გზებს, რაც ტრავმიანობის თავიდან აცილებაში დაგვეხმარება. ”

” “ჩემპიონთა ლიგის” მოგება უნდა ვცადოთ, ჩვენი პრესტიჟი გვაიძულებს ასეთი ამოცანები დავისახოთ. “იუვენტუსი” არ შეიძლება მხოლოდ მონაწილე გუნდი იყოს, მაგრამ მიზნის მიღწევა ბევრ ფაქტორზეა დამოკიდებული. შეხედეთ “ჩელსის”, ზოგმა ჩამოწერა ლონდონელები, მათ კი გაიმარჯვეს. ”

” ორი სამი უმაღლესი კლასის ფეხბურთელის ძიებაში ვართ, ვინც ჩვენს კოლექტივში ადვილად ჩაეწერება. ამასთან მხოლოდ საფეხბურთო კი არა, პიროვნულ თვისებებსაც მივაქცევთ ყურადღებას. ეს ყველაფერი, რა თქმა უნდა, ჩვენი ეკონომიკური მდგომარეობის ჭრილში განიხილება. ვან პერსი პლანეტის ერთ-ერთი საუკეთესო ფეხბურთელია და გასაკვირი არაა, რომ დიდი ფულიც ღირს. ვაპირებთ ჩვენი სატრანსფერო წინადადებები ბონუსებზე იყოს აქცენტირებული. ასეთი სქემა უკვე გამოივიყენეთ, ამ დროს ფეხბურთელი გუნდის წარმატების პროპორციულად იღებს თანხას. მთავარი კანდიდატები ვან პერსი, სუარესი და იგუაინი არიან. რაც შეეხება კავანის, ყველა მხარის მოთხოვნებსა და ინტერესების გათვალისწინება მოგვიწევს, პირველ რიგში, ეს “ნაპოლის” ეხება. ბალოტელი? ის იმ პროფილის ფეხბურთელი არაა, რომელიც ჩვენ დაგვაინტერესებდა. ”

დელ პიერო.” როცა მასთან კონტრაქტს მოვაწერეთ ხელი, მაშინვე იყო გათვალისწინებული, რომ ეს ბოლო სეზონი იქნებოდა.. “იუვენუსი” არ ივიწყებს მის ამაგს გუნდზე, პატივს სცემს მას იმის გამო, თუ როგორ წერდა ისტორიას აქ წლების განმავლობაში. მაგრამ ასეა თუ ისე, როცა საქმე სამოქმედო სტრატეგიას ეხება, ცივი გონებით მოქმედებაა საჭირო. ”

ბორიელო. ” მისი ბოლომდე გამოსყიდვის შესახებ ჯერ კიდევ იანვარში ვმსჯელობდით, მაგრამ მაშინ არენდა ვარჩიეთ. ახლა გადაწყვეტილების მისაღებად მხოლოდ ერთი თვე გვაქვს. ”

ჯიოვინკო. ” ყოველთვის ყურადღებით ვადევნებდით თვალს მის წარმატებებს და ჩვენთვის მნიშვნელოვანი იყო, რომ თავისი ტალანტი დაემტკიცებინა. ველოდებოდით, როდის დაამტკიცებდა, რომ დიდი ფეხბურთელი იყო. მის მომავალთან დაკავშირებით “პარმასთან” სერიოზული საუბრები გველის. მხოლოდ ამის შემდეგ გადავწყვეტთ, დარჩება პარმაში თუ ტურინში დაბრუნდება. ”

პოგბა. ” ყველა საფეხბურთო წესის დაცვით ვმოქმედებთ. ამ ახალგაზრდას “მანჩესტერთან” კონტრაქტის გახანგრძლივება არ სურდა და ჩვენც ჩვენი პირობები შევთავაზეთ. ვიწრო შეთანხმება უკვე არსებობს. ”

ვერატი. ” “იუვენტუსი” ისევ მიმზიდველი გახდა ჩამოყალიბებული ფეხბურთელებთან ერთად ახალგაზრდებისთვისაც. მისი სურვილი ჩვენთან გადმოსვლისა, “პესკარასთან” მოლაპარაკებაში დაგვეხმარება. ამ ფეხბურთელში რესურსების ინვესტირება გვსურს, მაგრამ ჩვენ პრინციპებს არ ვუღალატებთ. ვერატი, როგორც პირლოს შემცვლელი? არა მგონია, ისეთ ფეხბურთელებს, როგორიც დელ პიერო და პირლო არიან, მალე გამოუჩნდეთ შემცვლელი. კონტე კი ისეთი მწვრთნელია, რომელიც ცვლილებებისთვის მზადაა და მარკოსნაირი ფეხბურთელისთვის მოედანზე ადგილის გამოძებნა არ გაუჭირდება. ”

ასამოა, ვიდალი, ვუჩინიჩი. კვადო ერთ-ერთი იმ ფეხბურთელთაგანია, ვისითაც სერიოზულად ვინტერესდებით. ვიდალი ჯერ კიდევ გერმანიაში იყო ბრწყინვალე, ნამდვილი მეომარი მოედანზე. მისი გულისთვის “ბაიერნთან” მოგვიწია კონკურირებამ, მაგრამ ახლა, ნაჩვენები თამაშის გათვალისწინებით, არ შეიძლება არ გაგვახაროს მომხდარმა. მისმა ფასმა აიწია. რაც შეეხება ჩერნოგორიელს, ფორვარდის თამაში მხოლოდ გატანილი გოლების რაოდენობით არ ფასდება. მირკომ ამ “სკუდეტოს” მოპოვებაში თავისი, სპეციფიური ძალიან სერიოზული როლი ითამაშა. მისი ტრანსფერით კმაყოფილები ვართ. ”

ახალი კონტრაქტი კონტესთან. ” მწვრთნელი რჩება. მისი დამსახურებები შეუმჩნეველი არ დარჩენილა. ის მთელი კოლექტივის ლიდერი და წარმატების მთავარი გასაღებია. უკვე ამ კვირაში მოვაწერთ ახალ კონტრაქტს ხელს, რომელიც ანტონიოს “იუვენტუსთან” 2015 წლამდე დააკავშირებს. ყველა ამ საუბრებმა სკანდალთან დაკავშირებით არანაირად არ იმოქმედა ჩვენს გადაწყვეტილებაზე. არც არანაირი სანქციები არ იქნება განხორციელებული. კონტეს უდანაშაულობის გვჯერა. როცა პირველ პლანზე ხარ და წარმატებისკენ მიგყავს გუნდი, მალევე ხდება პროვოკატორების სამიზნე. ახლა რომ მეორე ეშელონის გუნდი ჰყავდეს ჩაბარებული, ასეთი არაფერი მოხდებოდა. ”

მესამე ვარსკვლავი. “კალჩიოპოლიმ” “იუვენტუსი” ფინანსური და მორალური კუთხით გამოფიტა. ყველა, ვინც ამ გამარჯვებებში მონაწილეობდა ამბობს, რომ წარმატება მოედანზე დაღვრილი ოფლისა და სისხლის საშუალებით მოვიდა. ასეა თუ ისე, სასამართლომ ტიტულები ჩამოგვართვა, უამრავი რამ კი გაუგებარი იყო და გაუგებარი რჩება. ჩვენთვის ტიტულების ჩამორთმევა არაკანონიერი გადაწყვეტილებით მოხდა. საფეხბურთო სამყაროს უძლიერესი “იუვე” ჩამოშორდა. მესამე ვარსკვლავი? ამ საკითხზე ვმუშაობთ. ”

ლიდერების გაყიდვის პერსპექტივა. ” გავყიდით, თუ არა მთავარ გმირებს გრანდიოზული შემოთავაზების შემთხვევაში? ჩვენი მიზანი გამარჯვებაა, რაც მხოლოდ კარგი ფეხბურთელების გზით მიიღწევა. ამიტომაც ლიდერებთან მიმართებაში არც კი გვსურს სიტყვა “გაყიდვის” გამოყენება. ამ ბიჭებისგან არცერთ არ აქვს წასვლის სურვილი. ”

ბუფონი, კრასიჩი, ელია. ” ბუფონს წასვლის სურვილი არასოდეს გამოუხატია. ტრავმიდან რეაბილიტირების შემდეგ გუნდი გვერდში დაუდგა, ნდობა გამოუცხადა და მანაც შედეგით გვიპასუხა. ბუფონი კარიერას “იუვენტუსში” დაასრულებს… დიდ გუნდში ყველა ვერ იღებს დიდ დროს. ზოგჯერ ვიღაც ვერ ეწერება ახალ პროექტში. კრასიჩი უკვე ჩამოყალიბებული ფეხბურთელია და მისი ტალანტის გახსნას არ დაველოდებით. ელიას შემთხვევაში კი არენდის შესაძლებლობას განვიხილავთ. იანვარში “ლაციო” სერბის სანაცვლოდ გარკვეულ თანხას გვთავაზობდა, მაგრამ წინადადება არადამაკმაყოფილებელი იყო. რამდენიმე წინადადება ახლაც გვაქვს. ”

ბიანკონერები იტალიის ნაკრებში. დი ნატალე. ” ნაკრების გაძლიერება ჩვენი ერთ-ერთი პრიორიტეტია. ეს იტალიელებს ეხმარებათ, ჩვენ კლუბში ადგილი იპოვონ, მაგრამ კარი არც უცხოელებისთვის გვაქვს დაკეტილი. ახალგაზრდულ სექტორში უამრავი ეროვნების ფეხბურთელი გვყავს, დიდი არჩევანით ვამაყობთ. რაც შეეხება დი ნატალეს, მისმა უარმა ყველაზე მეტად გამაოცა. თუმცა მის გადაწყვეტილებას გავუგე და ამ ადამიანის მიმართ უდიდესი პატივისცემა მაქვს. ”

” რა მოხდება, თუ სხვა გუნდში გადასვლის შანსს მივიღებ? “იუვენტუსი” მაქსიმუმია. ეს ისაა, რისკენაც მივიწევდი. ანიელისთან ბრწყინვალე ურთიერთობა მაქვს. პრეზიდენტი მთელს გუნდს ეხმარება, იმ გამარჯვების სულს ნერგავს გუნდში, რომელიც ჯერ კიდევ მამამისის “იუვემ” დატოვა. კლუბის სტრუქტურასთან დაკავშირებით ზუსტი გეგმა გვაქვს. ”

” ჩემპიონატს საოცარი ფინალი ჰქონდა. ტრიესტაში მოედანს ვუყურებდი და არ მჯეროდა მომხდარის. მთელი ცხოვრება წარმომიდგა თვალწინ, მთელი გზა რაც გავიარე. ამ წლების განმავლობაში მინიმალურ მიზნებსაც ვერ ვაღწევდით და უამრავი კრიტიკის მოსმენამ მომიწია. გამახსენდა ის დრო, როცა “ვარეზეში” ახალგაზრდული სექტორი მებარა. ”

” რაც შეეხება მოწინააღმდეგეებს, მომავალ სეზონში ჩვენი მთავარი მეტოქე “მილანი” იქნება. “ინტერთან” დაკავშირებით ყველაფერი მხოლოდ გუნდის განახლების შემდეგ გახდება ნათელი. “ნაპოლი” ლამაზ ფეხბურთს თამაშობს, “რომა” და “ლაციო” კი არასდროს არ უნდა ჩამოწერო. ურთიერთობები “როსონერისთან”? კარგი ურთიერთობა გვაქვს. ეს ორი გუნდი იტალიური ფეხბურთის სიმბოლოა, ერთმანეთში ჯანსაღი კონკურენცია გვაქვს. მომავალ წელს დერბი გვემატება. მთელი ქალაქი ჩვენი და “ტორინოს” ფერებშია. მივესალმებით თანაქალაქელების უმაღლეს ლიგაში დაბრუნებას. ”

მცველებსა და ახალგაზრდებზე. ” ჩვენი დაცვა მსოფლიოში ერთ-ერთი საუკეთესოა, მაგრამ ეს მის გაძლიერებას დღის წესრიგიდან არ ხსნის, იმდენად, რამდენადაც მომავალ სეზონში ბევრ გუნდთან მოგვიწევს ძალების მოსინჯვა. კონტეს ძლიერი, გამოცდილი პროფესიონალები სჭირდება. პელუზო? ის კარგი ფეხბურთელია და ნამდვილად გვაინტერესებს. რაც შეეხება დედეს, შესანიშნავი ფეხბურთელია, მაგრამ ბრაზილიური ბაზარი ძალიან არაპროგნოზირებადია. ახალგაზრდები? გაბრიელ აპელტმა თავისი ადგილი პირველ გუნდში უნდა იპოვოს, მასთან ერთად შანსი “პრიმავერას” არაერთ ფეხბურთელს აქვს. გვინდა დე ჩელიესა და მარკიზიოსნაირი ფეხბურთელები, რაც შეიძლება მეტი გვყავდეს. ”

წყარო: football italia, tuttojuve.