“იუვენტუსმა” მოლაპარაკებები განაახლა?

გავრცელებული ინფორმაციის თანახმად, ტურინის “იუვენტუსმა” გონსალო იგუაინის ტრანსფერის თაობაზე მოლაპარაკებები განაახლა მას შემდეგ, რაც არგენტინელი ფეხბურთელის მამა ტურინში ჩავიდა. წინა კვირას თითქოს ყველაფერი დასრულებული ჩანდა “პიპიტას” განცხადების შემდეგ, როცა მან გამოთქვა სურვილი, რომ კარიერის გაგრძელება მხოლოდ მადრიდის “რეალში” სურდა, თუმცა ესპანური გამომცემლობა Sport – ის მტკიცებით, არგენტინელმა თავდამსხმელმა “რეალის” ხელმძღვანელობის მიერ შეთავაზებულ ახალ კონტრაქტზე უარი განაცხადა და თუ სხვადასხვა წყაროებს დავუჯერებთ, მან თავად გამოგზავნა საკუთარი აგენტი და მამა ტურინში “იუვენტუსთან” მოლაპარაკებების საწარმოებლად. თუმცა, ყველაფრის მიუხედავად, ჟოზე მაურინიუ ისევ ჯიუტად ცდილობს იგუაინის შენარჩუნებას და მის გუნდში დარჩენაზე დაყოლიებას:“დარჩი და ჩვენ ერთად მოვიგებთ ჩემპიონთა ლიგას.” – ასე მიმართა “რეალის” მთავარმა მწვრთნელმა საკუთარ შეგირდს. პორტუგალიელი სპეციალისტი პიპიტას ძირითადი შემადგენლობის გარანტიას ვერ აძლევს, თუმცა ჰპირდება, რომ კარიმ ბენზემასთან ერთად მომავალ სეზონში მას აუცილებლად გამოიყენებს.

წყარო: Football-Italia