სატრანსფერო ჭორები და სიახლეები – 27 აგვისტო

ტუტოსპორტის მიერ გავრცელებული ინფორმაციით, დღეს ტურინის “იუვენტუსის” ხელმძღვანელობა კორსო გალილეო ფერარისზე მდებარე ბებერი ქალბატონის ოფისში შეიკრიბება და ბოლო ოთხ დღეში განსახორციელებელ სატრანსფერო სვლებს განიხილავს.შეხვედრას დაესწრებიან ჯუზეპე მაროტა, ფაბიო პარატიჩი და თვით ანტონიო კონტეც კი.სწორედ დღეს გადაწყდება, გაიფორმებენ თუ არა ბიანკონერები ტოპ-ფორვარდს და თუ გაიფორმებენ, რომელ მათგანს.გარდა წინახაზელისა, გასარკვევია ცენტრალური მცველის ვარიანტიც, რომელიც შესაძლოა კონტეს ტრავმირებული ლუსიოს შემცვლელად დასჭირდეს.

პარალელურად კი იტალიური პრესა რამდენიმე ფეხბურთელს “იუვენტუსიდან” უშვებს, ზოგიერთი კი პირიქით, ტურინში ჩაჰყავს.პირველ კატეგორიას ვინც მიეკუვნება, იმ მოთამაშეებს შორის ერთ-ერთი ვინჩენცო იაკინტაა, რომლის გაფორმებაც, “უდინეზეს” სურს.შეგახსენებთ, რომ ვინჩენცო ფრიულიზე შვიდი წლის მანძილზე თამაშობდა : 2000 – დან 2007 წლამდე.იმ შემთხვევაში, თუ სატრანსფერო ფანჯრის ბოლო წუთებამდე უდინელები სხვა ფორვარდს ვერ დაიმატებენ, ბოლო ვარიანტებად სწორედ იაკინტა და 34 წლის ტირიბოკი განიხილებიან.

რეტო ციგლერის მიმართ კი ინტერესს სიცილიური “პალერმო” იჩენს.ფედერიკო ბალძარეტის გასხვისების შემდეგ სპორტული დირექტორი, ჯორჯო პარინეტი მარცხენა მცველის ძიებაშია, ფედერიკო პელუზოსა და ჯამელ მესბასთან მოლაპარაკებების ჩაშლის შემდეგ კი ერთ-ერთი უკანასკნელი ვარიანტი შვეიცარიელი უკანახაზელია.გარდა იტალიური კლუბისა, რეტოს დამატება “ბენფიკასა” და “სტოკ სიტის” სურთ.

ფერნანდო ლორენტე კი მხოლოდ “ფორმალურადაა” ბილბაოს “ატლეტიკის” წევრი.ესპანელი ფორვარდი ზედიზედ მეორე შეხვედრაა განაცხადს მიღმა რჩება და გარდა ამისა, გუნდთან ერთად კი არა, განცალკევებით ვარჯიშობს.ნანდომ ხელმძღვანელობას ცხადად მიანიშნა, რომ ბასკებიდან წასვლა სურს, მწვანე შუქი აანთო ტრანსფერზე მარსელო ბიელსამაც ( მთავარი მწვრთნელი ), რომელიც აწი ლორენტეს განაცხადში შეყვანას არ აპირებს.

ანდრეა პოლის მომავალი კი, შესაძლოა უახლოეს დღეებში გაირკვეს.”სამპდორიას” ხელმძღვანელობას თავად ფეხბურთელთან აქვს შეთანხმება იმაზე, რომ წინადადების მიღების შემთხვევაში ანდრეას ექნება საშუალება, ბიანკონერებს მიაშუროს, ჯუზეპე მაროტა დღეს გადაწყვეტს, ახლა დაიმატოს იტალიელი ნახევარმცველი თუ 2013 წელს.Gazzetta Dello Sport – ის ინფორმაციით, ტურინელები ფეხბურთელს შეისყიდიან, თუმცა მომავალ სეზონს არენდის წესით გენუურ კლუბში დატოვებენ.

და ბოლოს, მესამე მეკარესთან დაკავშირებული საკითხი.La Gazzetta Dello Sport – მა რამდენიმე წუთის წინ გაავრცელა ინფორმაცია, რომლის თანახმადაც დღეს ტურინში სამედიცინო შემოწმებას ბრაზილიელი რუბინიო გაივლის, რომელიც ამჟამად უკლუბოა და თავისუფალი აგენტის სტატუსს ფლობს.30 წლის მეკარე ჯანმრთელობის ტესტის ჩაბარების შემთხვევაში ბიანკონერების წევრი გახდება, თუ ასე არ მოხდა, ფაბიო პარატიჩი უმალვე გაიფორმებს “ბრეშიას” კიპერს, 34 წლის მიკელე არკარის.

წყარო : Football Italia, Tuttojuve, Tuttosport