სავარაუდო თერთმეტეული “ბაიერნთან” შეხვედრისთვის

მიუნხენის “ბაიერნთან” განმეორებითი შეხვედრისთვის ანტონიო კონტეს მიერ “იუვენტუსის” ძირითად შემადგენლობაში შეტანილი ცვლილებები გარდაუვალია. მთავარი მწვრთნელი დისკვალიფიკაციის გამო ორი ფეხბურთელის, არტურო ვიდალისა და სტეფან ლიხტშტაინერის ნაკლებობას განიცდის. რაც შეეხება სებასტიან ჯოვინკოს, იგი აღნიშნულ მატჩში “პესკარასთან” მიღებული ტრავმის გამო ვერ იასპარეზებს. იტალიის ჩემპიონს ორბურთიანი სხვაობა აქვს აღმოსაფხვრელი. უდავოა, რომ კონტეს ძალიან ბევრი ფიქრი უწევს იმაზე, თუ რა შესთავაზოს მეტოქეს, რათა გუნდმა სასურველ შედეგს მიაღწიოს. პრაქტიკულად გადაწყვეტილია, რომ არტურო ვიდალს ნახევარდაცვის ცენტრში პოლ პოგბა ჩაანაცვლებს. რაც შეეხება მარჯვენა ფლანგს, აქ კონტეს რამდენიმე მოთამაშეს შორის მოუწევს არჩევანის გაკეთება. აღნიშნულ პოზიციაზე მოცემულ მომენტში სამ ფეხბურთელს ( ისლა; პადოინი; კასერესი ) შეუძლია ასპარეზობა, თუმცა ბოლო პერიოდში ნაჩვენები თამაშის მიხედვით ძირითად შემადგენლობაში მოხვედრის ყველაზე დიდი შანსი სიმონე პადოინს აქვს. მაურისიო ისლას სათამაშო დრო თითქმის არ ეძლევა, რადგან სეზონის პირველ ნახევარში მან ვერაფრით შეძლო საკუთარი პოტენციალის გამომჟღავნება. რაც შეეხება მარტინ კასერესს, ურუგვაელმა მცველმა სულ რამდენიმე დღეა, რაც ვარჯიში დაიწყო ავტოავარიაში მოყოლის შემდეგ და მის მოედანზე გამოყვანას ჯერჯერობით კონტე ვერ რისკავს. მარცხენა ფლანგზე ფედერიკო პელუზოს ნაცვლად, როგორც ჩანს, კვადვო ასამოა გაირჯება. თავდასხმის ხაზში კი მთავარი კითხვის ნიშანი ისაა, თუ ვინ შეუწყვილდება მირკო ვუჩინიჩს. ამ პოზიციაზე საუკეთესო კანდიდატად ფაბიო კუალიარელა განიხილება. ალესანდრო მატრი სავარაუდოდ სათადარიგოთა სკამზე იჯდება. რაც შეეხება მთლიანად თერთმეტეულს, დიდი ალბათობით, გულშემატკივარი ტურინში ამ შემადგენლობას იხილავს: ბუფონი; ბარძალი, ბონუჩი, კიელინი; პადოინი, პოგბა, პირლო, მარკიზიო, ასამოა; ვუჩინიჩი, კუალიარელა.

წყარო: Football-Italia