მაროტა : “კონტეს შეუძლია, “იუვენტუსის” ფერგიუსონი გახდეს”

ჯანჯრანკო ძოლას შეხედულებას იზიარებს და ჯუზეპე მაროტაც ფიქრობს, რომ ანტონიო კონტე ტურინის “იუვენტუსისთვის” ისეთივე პატივსაცემი გახდება, როგორიც სერ ალექს ფერგიუსონი იყო მანჩესტერ “იუნაიტედისთვის” : “თამამად ვიტყვი, რომ “იუვენტუსი” ტაქტიკურად წამყვანი ევროპული გრანდების გვერდით დგას.ანტონიო კონტე გუნდის წარმატებისთვის დაუღალავად შრომობს, შედეგი აქვს და ეს თავისთავად ხდის მას ერთ-ერთ საუკეთესოდ მსოფლიოში.ბებერი ქალბატონი – ისტორიული და უდიდესი კლუბია, მას საკუთარი ავტორიტეტი გააჩნია მსოფლიო არენაზე, მიუხედავად იმისა, რომ ეკონომიურად სხვა ქვეყნის წარმომადგენლებს ჩამოვრჩებით.”

“საერთაშორისო არენაზე კონტეს არ გაუმართლა, იტალიაში კი მისი გუნდი საუკეთესოა, მასთან თანამშრომლობა მოგვწონს და მომავალს იმედიანად ვუყურებთ.მჯერა, რომ ანტონიო ბიანკონერებისთვის ისეთი ლეგენდარული მწვრთნელი გახდება, როგორიც თვით ფერგიუსონი იყო იუნაიტედში, ან არსენ ვენგერი, “არსენალში”, დარწმუნებული ვარ, ასე იქნება.”

“უდიდესი გუნდის წარმომადგენელი ვარ და ამისთვის ანიელების ოჯახს ვუხდი დიდ მადლობას.ჩვენი მთავარი მიზანი – გუნდის სტაბილურობაა.”იუვენტუსის” წინააღმდეგ თამაში ყოველთვის, ნებისმიერი მეტოქისთვის რთულია და მათ უწევთ, მოედანზე 100 პროცენტით დაიხარჯონ.კონტემ ეს ყველაფერი კარგად იცის, იგი ხომ წლების წინ თავად იყო ფეხბურთელი.მას შეუძლია ნებისმიერი მეტოქე დაამარცხოს სწორი ტაქტიკისა და მებრძოლი ხასიათის წყალობით.თამაშისადმი მიდგომას იგი დეტალურად უნაწილებს თავის შეგირდებს და მათ კიდევ უფრო მოტივირებულებს ხდის.”

“მუდამ უნდა განვვითარდეთ, ერთ ადგილზე დგომა კარგ შედეგს ვერ მოიტანს.გუნდს აქვს გეგმა და სტრატეგია, მისი შესრულება აუცილებელია.ფაბიო პარატიჩის ერთ-ერთ საუკეთესო სკაუტად ვთვლი, დომენიკო ბერარდის და სხვა ახალგაზრდა ტალანტების გაფორმება – მისი დამსახურებაა.”

“ჩვენ ყოველთვის მაქსიმალური მიზნები გვაქვს, თუმცა უნდა გავითვალისწინოთ ბიუჯეტის მდგომარეობაც.რასაც მივაღწიეთ, სამწვრთნელო შტაბის, ხელმძღვანელობისა და ფეხბურთელების დამსახურებაა.ადრე თუ გვიან ჩემპიონთა ლიგის ფინალში უნდა გავიდეთ – ეს გუნდის ოცნება და მიზანია.როგორც უკვე ვთქვი, ბიუჯეტის მდგომარეობაა გასათვალისწინებელი, შეცდომების დაშვება ადვილია, მათი გამოსწორება კი გაცილებით რთული.”

“მართალია, ეკონომიურად სხვა ევროპულ გრანდებს ჩამოვრჩებით, თუმცა ვცდილობთ, თამაშის ხარისხითა და მიღწევებით მათ ვებრძოლოთ.სკუდეტო ? – ეს ისტორიული მოვლენა იქნება, საუბარიც კი ზედმეტია.”რომა” მხოლოდ ერთ ტურნირზე იბრძვის და სრული ყურადღებით იტალიაშია, “იუვენტუსსა” და “ნაპოლის” კი თებერვალ-მარტში ევროსარბიელზე ელით მნიშვნელოვანი მატჩები.ევროპის ლიგა ჩვენთვის მნიშვნელოვანი ტურნირია და მისთვის აქტიურად ვემზადებით, რთული გრაფიკი გვაქვს, არც ის უნდა დაგვავიწყდეს, მოთამაშეების დიდი ნაწილი ეროვნული ნაკრებების წევრები არიან.”

“მილანის პრობლემები ? – ეს იტალიური ფეხბურთის ტკივილია.როსონერი ლეგენდარული და ისტორიული კლუბია, თუმცა, სამწუხაროდ, ახლა გუნდს რთული პერიოდი უდგას.”

წყარო : Football Italia