ჩვენი მეტოქე: “ოლიმპიაკოსი” – ლეგენდა პირეოსიდან

ჩემპიონთა ლიგის 2014-15 წლების ჯგუფური ეტაპის ორი ტური მიილია და მივუახლოვდით გათამაშების ეკვატორს. კამპანიაში, სადაც ჩვენი “შავ–თეთრები” იმყოფებიან, საკმაოდ საინტერესო ვითარებაა. A ჯგუფში მოპოვებული ქულების თვალსაზრისით სრული თანაფარდობაა და ჩვენი კლუბი პირველ პოზიციაზე, მხოლოდ ბურთების დადებითი ბალანსის წყალობითაა. თითო მოგება–წაგებით ყველას 3–3 ქულა აქვს და ფაქტიურად, ყველაფერი თავიდან იწყება. ამდენად, „იუვეს“ უმნიშვნელოვანესი გასვლითი პაექრობა ელის ელინების ქვეყანაში და დროა, ახლოს გავიცნოთ “დაფნისგვირგვინოსნები.”

ეგეოსის ზღვის სანაპიროზე “ოლიმპიაკოსის” მშობლიური ქალაქი პირეოსი მდებარეობს და ატიკის ადმინისტრაციული ცენტრის უმნიშვნელოვანესი საპორტო რაიონია. უშუალოდ პირეოსის მუნიციპალიტეტში 200000-მდე მცხოვრებია და მიუხედავად იმისა, რომ ევროპული მასშტაბით – ეს არც თუ ისე დიდი მოსახლეობაა, სპორტული თვალსაზრისით ბერძნული ქალაქი ნამდვილად მისაბაძია. საქმე იმაშია, რომ მულტი-სპორტული კლუბი “ოლიმპიაკოსი” აერთიანებს ოცამდე სხვადასხვა მიმდინარეობის სათამაშო გუნდს. ყველასთვის ცნობილი საფეხბურთო და საკალათბურთო გუნდების გარდა, აქვეა კრივის, კანოეს, ცურვის, ფრენბურთის და კიდევ სხვადასხვა სახეობების კრებულები, რომელთაც საერთო სახელი – “ოლიმპიაკოსი” ეწოდებათ. ერთი სიტყვით, სპორტული მრავალფეროვნების კუთხით ჩვენი მეტოქის მშობლიური ქალაქი, ნამდვილად რომ გამორჩეულია არა მარტო ელინთა ქვეყანაში, არამედ სრულიად ევროპაში.

საბერძნეთის მასშტაბით „თეთრ–წითლებს“ ნამდვილი ჰეგემონია აქვთ დამყარებული. პირეოსული გუნდი უახლოეს მდევარ ათენის „პანათინაიკოსს“ 2–ჯერ აღემატება საჩემპიონო ტროფეების რაოდენობით – „ოლიმპიაკოსის“ ანგარიშზე 41 საჩემპიონო ტიტულია ათენელთა ოცი გამარჯვების საპირწონედ, ანუ ბერძნული „სუპერ ლიგის“ 87 წლიანი არსებობის მანძილზე, თითქმის ნახევარი პირეოსელთა გამარჯვებით დასრულდა. მთლად ასეთი ტოტალური უპირატესობა არა აქვთ „ლეგენდებს“ საკუთარი ქვეყნის თასის გათამაშებაში, მაგრამ 26 ტროფეით აქაც ლიდერობენ სიას. ევროპის მასშტაბით მცირეა იმ მეტ-ნაკლებად განვითარებულ საფეხბურთო ქვეყანათა ჩამონათვალი, სადაც ერთი გუნდის ასეთი დომინაცია აღინიშნებოდეს.

ეროვნული პირველობისგან განსხვავებით, ბებერ კონტინენტზე პირეოსელები რაიმე მნიშვნელოვანი წარმატებით ნამდვილად ვერ დაიკვეხნიან. მათ კლუბს არცერთი ევროპული ჯილდოს აღმართვის პატივი არ ჰქონია. მეტიც, ელინებს ფინალში თამაშის გამოცდილებაც კი არ აქვთ. მათი მაქსიმუმი ევროპულ საკლუბო ტურნირებზე მხოლოდ მეოთხედფინალია. საინტერესო ისაა, რომ ორივე შემთხვევაში გზა სწორედ იმ კლუბებმა გადაუკეტეს, რომელთა გვერდითაც ამჟამად უწევთ ასპარეზობა. პირველი ეს „როხიბლანკო“ იყო. 1992–93 წლების თასების მფლობელთა თასის გათამაშების მეოთხედფინალში, ესპანელებმა ორი მატჩის ჯამში 4–2 სძლიეს პირეოსელებს(შინ 3–1, გასვლაზე 1–1), ხოლო მეორე გუნდი, რომელმაც ასევე არ გაახარა ელინები, სწორედ ჩვენი „ბებერი სინიორაა“. ეს ის ლეგენდარული „იუვეა“, სადაც „პინტურიკიო“, ინძაგი, ზიზუ და ძმანნი მათნი ბრწყინავდნენ და მოწინააღმდეგისგან მხოლოდ სახელსღა თუ სტოვებდნენ. 1998–99 წლების ჩემპიონთა ლიგის მეოთხედფინალის ორმატჩიან დუელში იტალიელებმა შინ 2–1 იძალეს, ხოლო სტუმრად 1–1 დააჯერეს მეტოქე და ნახევარფინალში დაიბევევს თამაში შოტლანდიელი სერის ლეგენდარულ „მანიუსთან“. ზემოთ მოხმობილი ფაქტებიდან კი თავადაც მიხვდებით, თუ რაოდენ „სასურველი“ და „საყვარელი“ გუნდების გარემოცვაში არიან ბერძნები.

„იუვესთან“ ელინებს კიდევ ერთი „ტკბილი“ მოგონება აკავშირებთ. მათი ყველაზე დიდი ანგარიშით მარცხი ევროპულ საკლუბო ტურნირებში იტალიელთა კისერზეა. ეს მატჩი ჩვენი თაობის იუვენტინოებს უთუოდ კარგად ემახსოვრებათ . 2003–04 წლების ჩემპიონთა ლიგის გათამაშების ჯგუფური ეტაპის ბოლო მატჩში, ჯგუფიდან ნაადრევად გასულმა და თითქმის უმოტივაციო „ბიანკონერიმ“ გაჩენის დღე აწყევლინა პირეოსელებს და მართლაც რომ სამარცხვინო ანგარიშით – 7:0 გაარაფრა მოწინააღმდეგე.

საერთო ჯამში „იუვე“ ბერძენთა წინააღმდეგ 8 შეხვედრაში მდგარა. აქედან 5 ტურინელთა სასარგებლოდ მორჩა, ორში აღინიშნა ყაიმი და მხოლოდ ერთი მატჩი მოიგეს „ლეგენდებმა“. საგულისხმოა ის ფაქტიც, რომ ის ერთადერთი შერკინება, რომელშიც წარმატებას მიაღწიეს, არა საკუთარ მოედანზე, არამედ იტალიაში გამართული პაექრობა იყო.

ისტორია ისტორიად, მაგრამ დღეს სხვა ვითარებაა. მართალია, ელინები ციდან ვარსკვლავებს ვერ წყვეტენ, მაგრამ საკუთარ მოედანზე ნამდვილად ანგარიშგასაწევ ძალას წარმოადგენენ და ეს პირველ ტურშიც დაამტკიცეს „ელ ჩოლოს“ შეგირდებთან. ამჟამინდელი მდგომარეობით პირეოსელებს უეფას საკლუბო რეიტინგში 56.900 საკოეფიციენტო ქულით 26-ე ადგილი უჭირავთ. ტურინელებთან მატჩში „ოლიმპიაკოსის“ მოთამაშეები მაქსიმალურად შეეცდებიან საკუთარი კედლების უპირატესობით ისარგებლონ, ხოლო „გეორგიოს კარაისკაკისის“ ტრიბუნებზე ზოგადად რაც ხდება, ყველას კარგად მოგვეხსენება. არც ფეხბურთელები დაეწუნებათ პირეოსელებს. არის რამდენიმე გამორჩეული ვისი დასახელებაც ნამდვილად ღირს და ვისგანაც მთავარ საფრთხეს უნდა ველოდოთ, ესენია: მეექვსე და მეშვიდე ნომრები – ბარსელონადან იჯარით აყვანილი იბრაჰიმ აფელაი და საბერძნეთის ნაკრების მთავარმეგოლე კოსტას მიტროღლუ. „ოლიმპიაკოსის“ ღირსებას იცავს თანამედროვე ფეხბურთში უდაოდ გამორჩეული პერსონა – მძიმე სენთან ბრძოლაში გამარჯვებული და სპორტში სასწაულებრივად დაბრუნებული ფრანგი ვეტერანი ერიკ აბიდალი. ერთი სიტყვით, „წითლების“ მწვრთნელს, წარსულში „რეალის“ გამორჩეულ ფეხბურთელ მიჩელს, საინტერესო შემადგენლობა ჰყავს და ორი აზრი არაა, დაძაბული მატჩის მოლოდინში ვართ.

ამგვარად, მოახლოებულ შეხვედრაში „ოლიმპიაკოსი“ თავისას კი ეცდება, მაგრამ ჩვენმა კლუბმა ექვსამდე არ უნდა გაზარდოს ჩემპიონთა ლიგის ეგიდით გამართულ იმ საგარეო მატჩთა რაოდენობა(ბოლო გასვლითი გამარჯვება გლაზგოში, ადგილობრივ „სელტიკთან“ 0-3 მოგებული პაექრობა იყო), რომელშიც „შავ-თეთრებს“ წარმატებისთვის არ მიუღწევიათ.

გვჯერა, ასეც იქნება!

სტატია მოამზადა „იუვე-ლირმა“