სერია ა-ს კლუბები დიდი ცვლილებებისთვის ემზადებიან

იტალია საფეხბურთო კუთხით ერთ-ერთი ყველაზე მომთხოვნი ქვეყანაა და ამიტომაც არის, რომ აპენინებზე მწვრთნელები ისეთივე სისწრაფით იცვლებიან, როგორც საქართველოში ქვეყნის პირველი პირები. იტალიური ფეხბურთის ექსპერტის ლუკა მარკეტის მტკიცებით აპრილის თვე გახდება საკმაოდ მნიშვნელოვანი კალჩოს გუნდებისთვის. სწორედ ამ პერიოდში იწყება მომავალი სეზონისთვის მზადება. კონტურები თანდათანობით უფრო მკვეთრად ისახება. საკმაოდ ბუნდოვნად გამოიყურება სამპდორიას, ფიორენტინას და მილანის მთავარ მწვრთნელთა მომავალი. ცალკე სალაპარაკო თემაა ნეაპოლი, მაგრამ მათზე ოდნავ მოგვიანებით ვისაუბრებთ.

სამპდორიას მართველებს იმედი აქვთ, რომ წელს გუნდი ევრო სარბიელზე მოხვდება და თუ შედეგი მიღწეული იქნება გუნდში შესაფერისი ინვესტიციებიც ჩაიდება. რთულია იმის პროგნოზირება რამდენად შეასრულებენ ისინი მიზანს ამიტომ არ არის გამორიცხული სეზონის ბოლოს გუნდი მიხაელოვიჩმა დატოვოს, რომელსაც არცთუ დალაგებული სიტუაცია აქვს, როგორც ხელმძღვანელობასთან ისევე ფეხბურთელებთან. გაიხსენეთ მისი დაპირისპირება თუნდაც სამუელ ეტოოსთან. პარადოქსულია, რომ ეს ყველაფერი კამერუნელის ტრანსფერიდან მომდევნო დღესვე დაიწყო. მაშინ ხელმძღვანელობა ჩაერია და მეტ ნაკლებად დაასტაბილურა ურთიერთობა. მილანი კი ამ სიტუაციას მშვიდად აკვირდება და ერთ-ერთ კანდიდატად სწორედ ყოფილ “ინტერისტას” განიხილავს. პიპოს, რომ წყალი აქვს შემდგარი ამას ყველა ღიად აცხადებს. კლუბი საკმაოდ არა სტაბილურია და პლიუს ამასთან ევრო სარბიელზე გასვლის შანსი ფაქტობრივად არა აქვს.

ფლორენციული “ფიორენტინა” პრინციპში არ უნდა იყოს უკმაყოფილო შედეგით. მეხუთე პოზიციაზე იმყოფებიან, ევრო სარბიელზე სავარაუდოდ იასპარეზებენ, მაგრამ დელა ვალეს ეტყობა საბოლოოდ უმტყუნა ნერვებმა მას შემდეგ რაც იტალიის თასის საპასუხო ნახევარფინალში ბებერმა ქალბატონმა სტუმრად დაამარცხა ვინჩენცო მონტელას გუნდი 3-0. არ არის გამორიცხული, სერია ა-ში გადმობარგდეს მანუელ პელეგრინი და ერთ-ერთ ადგილად იები სახელდებიან, ხოლო მონტელა? რა ბედი ელის ახალგაზრდა სპეციალისტს? აქვეა მილანიც! როსონერი მის კანდიდატურასაც განიხილავს, ოღონდ 5 მილიონი ევროს გადახდა მოუწევს თუ გალიანის მთელი გულით სურს მონტელა მილანში. ჩენცოს მოქმედი ხელშეკრულება აქვს იებთან და მასში დევს პუნქტი, რომლის თანახმადაც მის მსურველ კლუბს 5 მილიონის გადახდა მოუწევს. გალიანის ბოლო პერიოდის ძუნწობას თუ უსახსრობას გავითვალისწინებთ, ჯერჯერობით მიხაელოვიჩი მომგებიან სიტუაციაში.

ტორინოს პრეზიდენტი ცდილობს აქტიურად კაიროს შენარჩუნებას. და მართლაც, ბოლო პერიოდში ტორო საკმაოდ კარგად და უფრო ხმამაღლა ვთქვათ, იტალიაში ერთ-ერთ ყველაზე სანახაობრივ ფეხბურთს აჩვენებს და ბუნებრივია ბობოლა კლუბები დაინტერესდებოდნენ მათი თავკაცით. მითუმეტეს, რომ ლამის სერია ა-ს მთელი ზედა ცხრილი აპირებს მწვრთნელების შეცვლას. კაირო სასურველია როგორც ნაპოლისთვის, ასევე მილანისთვისაც. დიახ, ისევ ის მილანი.. მაგრამ როგორც ჩანს ტურინში გინდა იუვე იყოს და გინდა ტორო, გადაწყვეტილებებს გულით იღებენ და ამიტომ როგორც მასმედიის წარმომადგენლები აცხადებენ კაირო დარჩება ტოროში..

და ეხლა ყველაზე საინტერესო.. ანტონიო კონტე – ადამიანი რომელმაც ტრიუმფი მოახდინა იუვესთან ერთად და ფაქტიურად გამოაფხიზლა იტალიური ფეხბურთი შესაძლოა ნაპოლის სათავეში ვიხილოთ, როგორც ამას ლუკა მარკეტი აცხადებს. საქმე იმაშია, რომ ანტონიო თავს გარიყულად მიიჩნევს. მისი გარემოცვა აცხადებს, რომ კონტეს უსაზღვროდ ენატრება ყოველდღიური საქმიანობა და მისი მხრიდან ეს იყო შეცდომა, როდესაც ასეთ ახალგაზრდულ პერიოდში სანაკრებო საქმიანობას მოეჭიდა. იუვეს ექს თავკაცს ისევ სურს უიკ ენდის ჯახები, ევროპული თავგადსავლები და ყოველდღიური საკლუბო ყოფა. დე ლაურენტისი ყველაფერზე წავა ოღონდ დაიყოლიოს ანტონიო, მაგრამ ფედერაციას არ სურს მასთან შელევა. უახლოეს პერიოდში უფრო ინფორმაცია გახდება ცნობილი. ნეაპოლიტანელებს იმედი აქვთ, რომ ახალ სეზონში კლუბს თავკაცად კონტე ეყოლება, ხოლო ფედერაცია ჯერჯერობით კატეგორიულად უარყოფს საქმის ამ სცენარით განვითარებას, მინიმუმ ზაფხულამდე. აი მერე კი რა მოხდება არავინ იცის..