ბარძალი :”ტაქტიკა? ამას მწვრთნელი წყვეტს”

მადრიდის რეალი ნამდვილად არ არის უცხო გუნდი იუვენტუსისთვის. ბოლოს ეს ორი კლუბი ერთმანეთს გასულ სეზონში შეხვდნენ ჯგუფურ ეტაპზე. მაშინ ტურინელებმა სტუმრად მარცხი იწვნიეს, ხოლო შინ ფრედ დაასრულეს შეხვედრა. ანდრეა ბარძალიმ ჟურნალისტებთან საუბარში საკუთარი მოსაზრება დააფიქსირა და ამ თემასაც შეეხო:“ნახევარფინალში იოლი მეტოქე არ არსებობს და ნებისმიერ შემთხვევაში ჩვენს წინააღმდეგ ტოპ კლუბი წარსდგებოდა. თუმცა, არანაირი დაძაბულობა და შიში არ იქნება ჩვენს ასპარეზობაში. გასული სეზონი? იმ პერიოდში გარკვეულ სირთულეებს განვიცდიდით და საერთოდაც ჯგუფური ეტაპის შედარება ნახევარფინალთან რთულია. გვაქვს დრო, რათა შესაბამის დონეზე მოვემზადოთ დაპირისპირებისთვის”..

“სამეფო კლუბი ზედმეტ რეკლამას არ საჭიროებს. ესპანელებს ფანტასტიური შემადგენლობა ჰყავთ, რომელთაც ძალუძთ ნებისმიერი მიზნის მიღწევა”.

“ტაქტიკური სქემა? სამი მცველით ვითამაშებთ თუ ოთხით ამას მწვრთნელი წყვეტს. მერწმუნეთ დაცვაში თამაში არ განისაზღვრება რაიმე ციფრებისგან. აქამდეც და მომავალშიც ჩვენი უკანა ხაზის საიმედოობას განაპირობებს ერთიანი მექანიზმი. ჩვენ მთელი გუნდით ვიცავთ და ვუტევთ. თითოეული ელემენტია ტაქტიკურად ჩართული როგორც მეტოქის შეტევისას, ისევე საპირისპირო მხარეს განხორციელებულ მანევრირებებში. ჩვენ ყოველთვის ვეხმარებით ერთმანეთს, რაც მეტად კომფორტულს ხდის თამაშს ნებისმიერი გუნდის წინააღმდეგ”.

და მაინც, ხომ არ ფიქრობთ რომ სამ მცველიან ტაქტიკაში უფრო მშვიდად იგრძნობთ თავს?

“3-5-2-ს ვთამაშობდით წლების მანძილზე და იგი ზეპირად გვაქვს შესწავლილი. თუმცა, მეორეს მხრივ 4 მცველიან ტაქტიკაზე ადაპტირება კარგად მოვახდინეთ მიმდინარე სეზონში. გადაწყვეტილებას იღებს მწვრთნელი და დარწმუნებული ვარ ალეგრი ზუსტად იმ წყობას აირჩევს, რომელიც საუკეთესო იქნება ამ მატჩისთვის”.

ბერლინის ფინალი..

“დღევანდელ დღეს ბერლინზე ფიქრი რთულია. ბუნებრივია ეს ის ადგილია სადაც მეც და პარტნიორებს, იღბალმა დაუვიწყარი წამები გვაჩუქა. წინ დიდი და გრძელი გზა გველის, თუმცა სასურველი კონცენტრაციით და სულისკვეთებით შეგვიძლია მიზნის მიღწევა”.

წყარო: tuttojuve