სატრანსფერო ჭორები და სიახლეები ( 29 ივნისი )

მთელი დღის განმავლობაში ტურინის “იუვენტუსის” სატრანსფერო პოლიტიკის შესახებ არაერთმა გამოცემამ დაწერა, გთავაზობთ 29 ივნისის ჭორებისა და სიახლეების ერთგვარ რეზიუმეს.ანდრეა პირლოთი დავიწყოთ, რომელმაც ფაქტობრივად უკვე შეიგრძნო ამერიკული ატმოსფერო.ლეგენდარული ნახევარმცველი გუშინ “ნიუ-იორკ სიტისა” და “რედ ბულსს” შორის გამართულ დერბის დაესწრო, რომელიც მისმა მომავალმა კლუბმა 1-3 წააგო.მაესტრო საკმაოდ თბილად შეხვდა დავიდ ვილიასა და ფრანკ ლამპარდს, რომლებიც უახლოეს დღეებში ოფიციალურად გახდებიან მისი თანაგუნდელები.გავრცელებული ინფორმაციის თანახმად, მხარეებს შორის ყველანაირი დეტალი შეთანხმებულია და 36 წლის ნახევარმცველმა კონტრაქტს ხელი 8 ივლისს უნდა მოაწეროს.შეგახსენებთ, რომ ხვალიდან პირლოს ბებერ ქალბატონთან კონტრაქტი უმთავრდება და თავისუფალი აგენტი ხდება.

საუბარი არ წყდება სტევან იოვეტიჩის იტალიაში დაბრუნებაზე.მანჩესტერ “სიტი” მონტენეგროელის გუნდიდან გასაშვებად მზადაა და სასურველ წინადადებას ელის.25 წლის შემტევის მიმართ ინტერესს ტურინის “იუვენტუსი”, მილანის “ინტერი” და “რომა” იჩენენ, საინტერესოა, რომელი კლუბის წინადადება მოხიბლავს ყველაზე მეტად ჯერ ქალაქელების ხელმძღვანელობას, შემდეგ კი თავად ფეხბურთელს.

ანჯელო ოგბონა ნისლიან ალბიონზე საკმაოდ მოთხოვნადი ფიგურაა.ბოლო დღეებში პრესა აქტიურად უკავშირებდა იტალიელ მცველს ჯერ “ვესტ ჰემს”, შემდეგ “ევერტონს”, ახლა კი როგორც სჩანს, საქმეში “საუთჰემპტონიც” ჩაერთო.წმინდანებს უკანახაზის გაძლიერება სურთ და მათთვის 27 წლის ფეხბურთელი იდეალური ვარიანტია, გავრცელებული ცნობებით, ბრიტანელები მზად არიან ოგბონას სანაცვლოდ 10 მილიონი ევრო გადაიხადონ.მოთამაშის გაყიდვის წინააღმდეგი არც ტურინის “იუვენტუსი” უნდა იყოს, მით უმეტეს, დანიელე რუგანის დაბრუნება 99 პროცენტით გადაწყვეტილია, რაც ანჯელოს სათამაშო დროს კიდევ უფრო შეამცირებს.

გადავიდეთ იმ თემებზე, რომელიც ბებერი ქალბატონის გულშემატკივრებს ყველაზე მეტად აინტერესებთ : პოლ პოგბასა და არტურო ვიდალის საკითხები.ჯანლუკა დი მარციოს ოფიციალური ვებ-გვერდის ცნობით, განსაკუთრებით დიდი შეტევა პოლ პოგბაზე მიმდინარეობს, მანჩესტერ “სიტი” და “ბარსელონა” მზად არიან, საოცარი თანხები გაიღონ ფრანგი ნახევარმცველის სანაცვლოდ.ბლაუგრანას პრეზიდენტობის კანდიდატების მთავარი დაპირება გულშემატკივრებისადმი სწორედ პოგბას ტრანსფერია და ნებისმიერ შემთხვევაში, კატალონიელები 22 წლის მოთამაშის ხელში ჩასაგდებად ყველაფერს გააკეთებენ.თუმცა საქმე არც ისე მარტივადაა, როგორც ესპანელებს ჰგონიათ.ბიანკონერების მთავარი მიზანი ლიდერების შენარჩუნებაა და პოგბა ამჟამად სატრანსფერო ბაზარზე დაყენებული არაა, შესაბამისად, ჯუზეპე მაროტა ფრანგის თაობაზე მიღებული არცერთი წინადადების განხილვას არ აპირებს და იმედს იტოვებს, რომ ტურინში დარჩენას თავად მანჩესტერ “იუნაიტედის” ყოფილი მოთამაშეც მოისურვებს.

არტურო ვიდალისადმი ლონდონის “არსენალის” ინტერესის შესახებ ჩვენი ვებ-გვერდის საშუალებით უკვე მოისმენდით.ტუტოიუვეს მტკიცებით, ტურინის “იუვენტუსს” ჩილელის თაობაზე არანაირი ოფიციალური შემოთავაზება არ მიუღია და მეტიც, ბიანკონერები 28 წლის ნახევარმცველთან განშორებას არ აპირებენ.გუნდიდან წასვლა არც თავად “ლევერკუზენის” ყოფილ ფეხბურთელს სურს და დიდი ალბათობით, მეფე არტურომ შემდეგი სეზონიც შავ-თეთრი მაისურით უნდა დაიწყოს.

და ბოლოს, მოჰამედ სალაჰზეც ვთქვათ, რომლისადმი ინტერესს ბებერი ქალბატონიც იჩენდა.ეგვიპტელი ფეხბურთელის აგენტს უახლოეს დღეებში იტალიაში ელიან და საბოლოოდ უნდა გადაწყდეს, დარჩება თუ არა 23 წლის ფორვარდი ფლორენციულ კლუბში.იები “ჩელსის” საკუთრებაში მყოფ მოთამაშეს შესანიშნავ კონტრაქტს სთავაზობს შესანიშნავი ანაზღაურებით, თუმცა საბოლოო სიტყვა მაინც სალაჰზეა, მას აქვს უფლება, ვეტო დაადოს “ფიორენტინას” შეთავაზებას და ლონდონურ კლუბში დაბრუნდეს.

წყარო : Tuttojuve