სერია ა-ს ახალი რეფორმა

იტალიის ფეხბურთის ფედერაცია ახალი რეფორმის განხორციელებას იწყებს შემდეგი სეზონიდან გუნდების შემადგენლობასთან დაკავშირებით: რეფორმა ეყრდნობა უეფას წესებს, რომელიც რეგლამენტს უწესებს კლუბების შემადგენლობას ევროთასებზე მონაწილეობისათვის. რეფორმის შესახებ ჯერ კიდევ წინა სეზონში იყო ცნობილი, თუმცა კლუბებს დრო მისცეს ე.წ. “გარდამავალი პერიოდის” გასავლელად. La Gazzetta dello Sport-ის ცნობით, 2016/17 წლების სეზონიდან უკვე ძალაში შედის ახალი წესები, რომლის მიხედვით ყველა კლუბი ვალდებულია ჰყავდეს სულ მცირე 8 ფეხბურთელი, რომელიც კალჩიოს სამყაროსთანაა დაკავშირებული.

უფრო კონკრეტულად, კლუბს მოეთხოვება ჰყავდეს მინიმუმ 4 ფეხბურთელი, რომელთაც 16-დან 21 წლამდე ასაკში მინიმუმ 3 წელი აქვთ გატარებული კლუბის ახალგაზრდულ სტრუქტურაში. ამას გარდა, კიდევ 4 ფეხბურთელს 21 წლის ასაკამდე ნათამაშევი უნდა ჰქონდეს სერიას ა-ს ნებისმიერ კლუბში სულ მცირე 3 წელი. ეს ორივე წესი ეხება როგორც უცხოელებს, ისე იტალიელებს, თუმცა იტალიელებს პრაქტიკულად მეტი შანსი აქვთ უპასუხონ ამ მოთხოვნებს. 21 წლამდე ფეხბურთელები გათავისუფლებულები არიან ამ მოთხოვნებისგან.

რეფორმის მიზანია სერია ა-ში იტალიელი და იტალიაში აღზრდილი ფეხბურთელების რაოდენობის მომატება. ამ რეფორმამ დადებითი გამოხმაურება ჰპოვა ქომაგებში, თუმცა კლუბების მხრიდან კრიტიკა მოჰყვა მათი სატრანსფერო პოლიტიკის გამო.

“იტალიური ფეხბურთი მზად არ არის ასეთი ცვლილებებისთვის”, – აცხადებს იუვენტუსის გენერალური დირექტორი ჯუზეპე მაროტა, – “ჯერ საჭიროა წინასწარი ღონისძიებების განხორციელება და მხოლოდ ამის შემდეგ რეფორმის ძალაში შესვლა. გუნდი საკმაოდ შეიკვეცება, რაც არასასურველ მდგომარეობაში ჩააყენებს ფეხბურთელებს, რომლებსაც სარგებელი მოაქვთ გუნდისთვის მთელი სეზონის განმავლობაში. ეს განსაკუთრებით იუვენტუსს ეხება, რომელსაც 3 ტურნირზე უწევს მონაწილეობა და დაახლოებით 50 თამაში უნდა ჩაატაროს სეზონში.”

წყარო: Football-Italia