ალეგრი : “პოგბა ამ მომენტისთვის იუვენტუსის ფეხბურთელია”

“ვესტ ჰემთან” მატჩამდე ერთი დღით ადრე ტურინის “იუვენტუსის” მთავარი მწვრთნელი, მასიმილიანო ალეგრი ვინოვოს მედია ცენტრში ჟურნალისტებს შეხვდა..

 “დანი ალვეშთან და შტეფან ლიხტშტაინერთან ერთად ჩვენი გუნდი კიდევ უფრო ძლიერია, მათ შეუძლიათ როგორც ოთხ, ისე სამმცველიან ტაქტიკაში ასპარეზობა.რაც შეეხება პიანიჩს, მირალემს გამოვიყენებ მცველების წინაც და ფორვარდების უკანაც, ისეთი სტილის ფეხბურთელია, მუდამ მოვლენების ეპიცენტრში უნდა იყოს.პიაცა ახალგაზრდა და უნიჭიერესი ფიგურაა, ტრეკუარტისტად ან ვინგერად შეუძლია ასპარეზობა.ბენატიას კარგად იცნობთ, იგი იტალიის ჩემპიონატში ნაცნობი ფიგურაა.რაც შეეხება იგუაინს, მასზე კარგის მეტი არაფრის თქმა შემიძლია, გასული წლის საუკეთესო ბომბარდირი, მანჯუკიჩთან, ძაძასთან და პიაცასთან ერთად ძლიერი წინახაზი გვყავს.”

“ხვალ ოთხი მცველით ვითამაშებთ, შემიძლია შემადგენლობაც გაგიმხილოთ : ბუფონი, ალვეში, ბენატია, რუგანი, ალექს სანდრო, ლემინა, ასამოა, პიანიჩი, პერეირა, დიბალა, მანჯუკიჩი.მეორე ტაიმში ნეტო ითამაშებს.”

“პოგბა ? – ჟოზე მაურინიომ მასზე არ ისაუბრა, რადგან იუვენტუსის ფეხბურთელია, პოლს ხვალ საღამოს ტურინში და ორშაბათიდან ვინოვოს ბაზაზე ველით.მის ჩანაცვლებაზე ამ მომენტისთვის არ ვსაუბრობთ, პოგბა იუვეს ფეხბურთელია.”

“ხვალინდელი მატჩი ? – ვესტ ჰემი ფიზიკურად ჩვენზე უკეთეს მდგომარეობაშია, ისინი ევროპის ლიგის საკვალიფიკაციო ეტაპში მონაწილეობდნენ.ყველა ფეხბურთელი მზადაა, შტეფან ლიხტშტაინერს აწუხებს მხოლოდ მცირე დაზიანება.ზოგიერთი ფეხბურთელი მხოლოდ 10 დღეა ვარჯიშობს, უმეტესი მათგანი კი ერთი თვის განმავლობაში ემზადებოდა, ნელ-ნელა უნდა მოვუმატოთ და გავაუმჯობესოთ თითოეული დეტალი.სამომავლო მიზნები ? – არ მოვიტყუებ თავს და არ ვიტყვი, რომ სკუდეტო ჯიბეში გვაქვს, ან ჩემპიონთა ლიგის ფინალში აუცილებლად გავდივართ, ყველა იუვეს ჰეგემონიის დამხობას ცდილობს და ამაში ხელი უნდა შევუშალოთ.”

“იგუაინი ? – ხვალ გონსალოს იხილავთ, რამდენიმე წუთით მაინც.იუვენტუსმა სატრანსფერო კუთხით საოცრად იმუშავა, გუნდში მოვიდა ხუთი ახალი ფეხბურთელი.მათ მალე უნდა გაიარონ ადაპტაცია და გუნდისთვის მნიშვნელოვანი ფიგურები გახდნენ, გასული სეზონივით პირველი ათი თამაში არ უნდა ჩავაგდოთ, ამას არავინ გვაპატიებს.არ დაგავიწყდეთ, სუპერკოპასთვის მატჩიც სათამაშოა.”

წყარო : Football Italia