ალეგრი : “ჩემპიონთა ლიგაზე ფიქრი ჯერ ადრეა”

“პალერმოსთან” მატჩამდე ერთი დღით ადრე ტურინის “იუვენტუსის” მთავარი მწვრთნელი, მასიმილიანო ალეგრი ჟურნალისტებს შეხვდა..

“ამ მომენტისთვის ჩემპიონთა ლიგის შეხვედრაზე საერთოდ არ ვფიქრობთ, ხვალ პალერმოს ვეთამაშებით და აუცილებლად უნდა მოვიგოთ.სიცილიელებს კარგად ორგანიზებული, სწრაფი და აგრესიული გუნდი ჰყავთ, გასავარდნ ზონაში იმყოფებიან და რა თქმა უნდა, იოლად არაფერს დათმობენ.სეზონის დასრულებამდე არც ისე დიდი დრო დარჩა და ახლა ნებისმიერმა შეცდომამ შესაძლოა დაღი დაასვას ჩვენს წარმატებულ ასპარეზობას.მინდორზე ბიჭები სწორი განწყობით უნდა გავიდნენ და აქტივში მორიგი სამი ქულის ჩასაწერად ყველაფერი გააკეთონ.”

“პიანიჩი ? – მირალემი თავს კარგად გრძნობს, იგი განაცხადში იქნება.ძირითად შემადგენლობასთან დაკავშირებულ დეტალებს ხვალ გადავწყვეტ, ჯორჯო კიელინი და ანდრეა ბარძალი რეაბილიტაციის პროცესს გადიან და კვირის ბოლომდე გაირკვევა, გაემგზავრებიან თუ არა გუნდთან ერთად პორტუგალიაში.რუგანი მატჩიდან მატჩამდე უმატებს და ეს ყველას ახარებს, ბონუჩი კი ოპტიმალურ ფორმასთან ახლოსაა.ხვალ ლეონარდო იუვეს მაისურით მესამასე შეხვედრას ჩაატარებს, ეს საოცარი მიღწევაა ნებისმიერი ფეხბურთელისთვის.მას ხვალ ბენატია ან რუგანი შეუწყვილდება.”

“სტურარო ? – სტეფანო სათამაშოდ მზადაა, გააჩნია, რომელი ტაქტიკით ვიასპარეზებთ.უნდა შეფასდეს მარიო მანჯუკიჩის მდგომარეობა, ბოლო შეხვედრებში მან დიდი ენერგია დახარჯა და შესაძლოა, დასვენება დასჭირდეს.მის პოზიციაზე ან სტურაროს ან პიაცას ვარიანტებს განვიხილავ, არ გამოვრიცხავ, რომ მინდორზე სამი ცენტრალური ნახევარცველით გავიდეთ.პიაცა თანამედროვე ფეხბურთის ერთ-ერთი გამორჩეული ტალანტია, მან დაუღალად უნდა იშრომოს და მჯერა, რომ წარმატებას მიაღწევს.”

“ჩემპიონთა ლიგის მატჩები ? – ორივე დღის შეხვედრებისგან სიამოვნება მივიღე, განსაკუთრებით პსჟ ბარსელონას გამოვყოფდი.პარიზელებმა საოცარი ფეხბურთი აჩვენეს და ყველას დაუმტკიცეს, რომ მაღალი დონის გუნდი ჰყავთ.ეს დღე კატალონიელების ნამდვილად არ იყო.რაც შეეხება გუშინდელ შეხვედრას, მინდა მაურისიო სარის ნაპოლი შევაქო, ნეაპოლელებს ევროტურნირებზე თამაშის დიდი გამოცდილება არ აქვთ და მიუხედავად ამისა, მადრიდის რეალს საკმაო წინააღმდეგობა გაუწიეს.შეხედეთ მოდრიჩს, მას რამდენიმე წამი სჭირდება იმისთვის რომ რონალდოს ბურთი ფეხზე დაასვას, ნაპოლის ბევრი მოთამაშე კი პირველად თამაშობდა ლიგის პლეიოფში.სარი ნამდვილად იმსახურებს კომპლიმენტებს, საპასუხო მატჩში მათ წარმატებებს ვუსურვებ.”

“რაც შეეხება იუვეს, ჩვენ პსჟს, ბავარიას და რეალის დონეზე რომ ავიდეთ, კიდევ უნდა მოვუმატოთ.ამ წელს ბავარიას საკმაოდ აკრიტიკებდნენ და ხომ ნახეთ, მიუნხენელებმა ყველა კითხვას გუშინ უპასუხეს.ჩემმა შეგირდებმა პირველ რიგში ტექნიკურ დონეზე უნდა მოუმატონ, მეტად უნდა აკონტროლონ ბურთი, გაათამაშონ იგი და კომბინაციურად შეუტიონ, სწორედ ამით გამოირჩევიან ევროპული გრანდები სხვებისგან.”