ალეგრი: “დროა ფინალში გავიმარჯვოთ”

შეშლილმა მაქსმა მისი ზედმეტსახელი მთლიანად გაამართლა. მთელი მატჩის განმავლობაში რეჟისორები არაერთხელ გვთავაზობდნენ ალეგრის ემოციებით აღსავსე სახეს. მატჩის შემდეგ, ალენატორე ჟურნალისტების წინაშე წარსდგა…

“ბიჭების გამო მოხარული ვარ. მათ ფინალში გასვლა მოახერხეს, თუმცა ხვალიდან ჩვენ შიდა ჩემპიონატზე მობილიზება გვმართებს, რადგან ჯერ ტიტული არ მოგვიპოვებია..

მე ჩემს საქმეს ენთუზიაზმით და სიმშვიდით ვაკეთებ. მე მხოლოდ შედეგი მაღელვებს, რასაც ჩემი ფეხბურთელების ხარისხიანი თამაშით ვიღებ. მწვრთნელობა მომწონს. ეს ჩემთვის განტვირთვაა. სტრესის დროს ამ საქმით ვმშვიდდები..

გლიკის ჯარიმა და მბაპეს გოლი? ამ ფოლმა და გოლმა გაგვაბრაზა. ვიცით, რომ თამაში მხოლოდ არბიტრის სასტვენის შემდეგ მთავრდება. ჩვენ მთელი შეხვედრა უნდა ვიყოთ მობილიზებულები. გაშვებული გოლის მომენტში მეტი კონცენტრაცია გვმართებდა..

ბუფონის სიტყვები? დიახ, ჯიჯი მართალია. საკმარი არაა მხოლოდ ფინალში თამაში. ჩვენ ის უნდა მოვიგოთ. ვიმედოვნებ, ეს სწორედ ის წელი იქნება. ვფიქრობ, იუვეს ჩემპიონობის კარგი შანსი აქვს. ამისათვის ჩვენ უფრო ხშირად უნდა დავიჭიროთ ბურთი და მომენტები უკეთ გამოვიყენოთ, მაგრამ მაქამდე კიდევ ერთი მნიშვნელოვანი შეხვედრა გველის. რომში გამარჯვება გვმართებს, რათა სკუდეტოსთვის ბრძოლაში ყველა კითხვას გავცეთ პასუხი.”